Whatsapp liata hmo â paphaopa vâta Pakistan liata Krizyhpa paw pakha cha thi awpa ta a chôchâh pachiapa a châ

Pakistan liata krizyhpa paw pakha cha Whatsapp liata Muslim zyhna hmôpapuatuhpa, Muhammad reipachhiena a tawhpapuapa hawhta baipa châpa ta, Court tat hi awpa ta a chôchâh a pachia.

Nadeem James, kô 35-ta uhtheipa, krizyhpa cha a viasapaw, Muslim-pa hnohta Whatsapp hmâpa ta Muslim zyhna reipachhiena a paphaopa hawhta baipa châ ta; he chôchâh vâna heta zâkô Khihpa thlâpâ liana khata ‘khazohpa reipachhiepa hawhta baipa châpa ta, patupa vaw châ’. He hawhta ‘khazohpa reipachhiena’ atlychakapa ta Muslim chyhsa a châ leipa patupa he Pakistan liata cha ama vaw tao tyhpa rai hawhta reipa a châ. He chhaichhi hmâpa heta Muslim zyhna leipa azituhpazy cha ama vaw cha-iechahmy tyhpa hawhta reipa a châ hra.

He biebuapa liata krizyhpa châta aduahpa, dâhpahnopa Anjum Wakeel chata, he biebuapa liana heta âduakheipa Nadeem James nata  a viasapawzy he chanô chôchâh vâta ama buapa hawhta reih ta. Anjum Wakeel heta, “Ei duakheipa James he pohbie noh khata thi awpa ta a chôchâh pachiapa châ ta, he he James hetaa  viasapaw ta he biebuapa liata a pa-ao khohpa vâta a taopa hawhta reihpa ta, Court â sâh viapa liata tlôkhei â chhuah” a ta. Dâhpahnopa ta a reina dâh liata cha James he Muslim laihsa nahta amâ hniahni kawpa hawhta reipa a châpa vâta a viasapaw heta he hawhna heta Muslim zyhna reipachhiepa hawhta â lâ thei n’awpa ta hmah a lapa hawhta a rei. Muslim râh, Pakistan liata cha Muslim zyhna hmôpapuatuhpa, Muhammad reipachhiena cha thina hmâpa ta hrie awpa tahpa a châ.

Zâkô Pachawh thlâpâ liana khata achuhaipa pakha, Mashal Khan ama tahpa cha Mardan liata ama University liata a viasazy nahta zyhna kyh liata amâ eichhia nota, Muhammed reipachhiena mobile phone tawhta a paphaopa hawhta baipa a châpa vâta ama vaw tusao ha hra. Mashal Khan thina vâna heta Pakistan râh su nano nanopa liata palôhtlâhna athata ama palâsapa a châ. 

Kô 1990 rakha tawhna khata Pakistan liana heta khazohpa reipachhiepa hawhta baina vâta chyhsa 67 thi ha ei ta; kô 2015 liana khata Muslim chyhsazy ta krizyhpa nôvah baokhazy cha Muslim zyhna châbu, Quran papua paleipa hawhta baipa ta vaw tusao ha ei ta; ama ri cha brick raona mei liata ama vaw phôh ha hra. 

Kô 20111 liana khata molaipa vaihtuhpa (bodyguard) pakha ta Pakistan liata Punjab Governor, Salman Taseer cha ‘khazohpa reipachhiepa ta âbaina dâh’ taopathi awpa tlâh a awhkheipa vâta avaw kasao ha heih hra