EI CHRISTMAS VIAHPAKAO MÂ A RU KAW HEIH VÂ MA I!

- By Amon Khaimeichhô 

Noh nata daihti ta maniah asiekhei lymâ pa hawhta, Krizypa zy pita ngiatialei kaw pata kô thaona tawhta eima vaw hâ-dyh tyh pa, cha-y noh rôna chaipa, maniah Pachhatuhpa pina thlâpâ DI cha eimâ vaw ngia pathao ha heih bâh hi! Khizaw nietluana nata thaina-sohna-tluana zy vâta râh nanopa nata suh nanopa liata a ypa zy chhao, ama liaritlohna Opi liata chhôkipa nata thapha kaw pata Beipina daihti dyh chyu awpa ta ama khih chyu ngai pata ama kaw tlôh ngâ kaw bâh hra hi!He noh rôna ngaita pa he, thokhazy châta cha kô hlupi vawh sie hapa liata ama kypachâ kawpa zy thina ku chakua pata a patu hapa vâta âmâ vawh chhaih ha pazy lôliah thierilina nata lôliena daihti châ aw ta, thokha châ deikua lôki kaw pata sanaw-rinô zy nata ahmôpakhyna daihti phapa chhao achâ hra aw. Chahrasala, lôliena nata thaphana tlymâ, Beipi noh rôna zie tlymâ, he reih ei chhuah chaipa za châ lei pata, Krismas eima chhuah dyh dâh nata he noh daihti châta eima pachhuapanoh dâh he tlao achâ hri.

Khizaw chyhsa zydua pi he zyna no-eihpa za hneih khai pita, eima zyna chyu liata cha-yna noh chhao eima hneih khai hra. Cha-y noh châta eimâ chhuanoh dâh nata patopatia dâh zy he alyu viarô khai hra sala; eima cha-y dâh nata noh deikua alyu tlâ vei. India liata apahrâpa eima châpa hawhta,zyna ahlu zie chhao pahno pita, cha-yhna noh a hlu zie chhao eima pahno hra. Râh utheihpa a châna hawhta, Khizaw liata zyna uthei chaipa athaona achâ hleikhô ta, râh kha chhô liata zyna hlu chaina chhao a châ hra. He zydua hry liata Hindu zyna apazipa ( Hinduism) he hlu chai ei ta, ama ku (Festival) ziza chhao maniah pahnie cha chai hra ta, he daihti avaw tlô awpa he eima râh liah ngâlâ dei châ lei pata khizaw râh zydua taihta chhaota ama fesitival ziza he pahno hlaopa a châ. Chavâta, Hindu nah zy ta ama festival rôna kawpa ama cha-y dâh nata he daihti avaw tlôh awpa chy ta ama chhuanoh dâh nata patopatia dâh he za sai tua ei sila.

Hindu nah he khizaw zyna liata cha-yhna ( Ku) hneih hlu chaipa ama châ zie reih hâ pita,cha-yhna ama hnei hlu zie cha thla charei rôta ahneihpa ama châ. Cha zy hry liata ku rôna chaipa, India zawpi nata khizaw pi taihta aziza maniah chahria papha theihpa cha Dussera (Puja),diwali etc. ama tah tyhpa zy he a cha. Puja ama tah tyhpa he phiata thla liata a hmâ tyh ei ta, rôna chhao a rôna ngai ta kaw . Dussera noh he ama beipa Lord Krishna tah sâtâ lu hraw a hneipa apahnie daihti/noh a châ. He festival he âmo Hindu nah ngâla dei châ lei pata, keimo marasaw taih chhao ta ama ku cha-yh dâh nata ku châta âmâ chhuadyh dâh/patopatia dâh a rôna zie pahno pita, apachai pata via râh liata marasaw a y pa zy pi cha; he daihti tlôh awpa he eima ngiatialei ngai tah kaw tyh. Achhâpa cha, he daihti tlôh awpa vâh heta,Hindu Sôpalietuhpa dypha kawpa zy cha ama Lord Krishna rônahna palâsa naw pata ama hmoh mâru kawpazy thata pahnai (discount) ty ei ta,keimo marasaw zy chhao pita nohro ta eimâ chalei theihleipazy kha he daihti no heta eima vaw chaleitheih tyh hrapa avaw châ. Tahmâ zy chhochhi cha, online shopping eima râh tawhta taotheihpa vawh châ ha bâ ta, hmoh eima khoh kawpa, châhrasala, a mâh ru kaw tlôh pa zy cha , “ A! Puja discount nota tlâ ei chalei hri aw” zy eima vawh tah pathao ha bâ hra hi!

Hindu nah zy ta ama ku vawh tlôh awpa châta ama chhuahnoh dâh nata ama parônasa zie pahno pita, ama zyna ama papeimawsa zie chhao reika ngâlâ dei châ lei pata, hmotaopa tlaita ama pamohsa tahpa chhao âlâ pasia hmeiseih. Âmâ chhuah chaipa cha, he ku rôna ngai ta kawpa vawh tlôh awpa daihti liahna heta, ahy torai, dychhie-dypha,hârapa nata o hneileipa taih chhao ta ama hnei khohpa cha hneitheih khai hra ei sala, heih-uavana zy y lei pata, lôhtlâ kawpa nata lôhrao kaw pata he noh rôna pa he â hmâh khai ei sila tahpa achhuana ama hnei vâ a châ. Cha vâh tlai cha ta, ama ku avaw tlô awpa thlâpâ tlô hlâ tawhta ama hmoh zydua noh hro ta ama zua tyhpa mâ hlâta nao via syulyu pata ama vaw zua pathao ty. He he ta ama ku ngâlâ dei châ lei pata, Hindusim ama parônasa zie nata papeimawsa zie chhao a palâsa pasia hmeiseih hra.

Chakhia ta la, Khazoh hroh achhyhpa/pazipa a tahpa zy pi heta eima Christmas he kheita tlai ma achhuahdyh pita eima papeimawsa hra tly i! Kô kha chhô tlaita eima hâpa Christmas vaw tlôh awpa he ahy rai achhuahnoh khai pita, eimâ ngiatia lei ngai ta kaw sai ty. He noh rôna vaw tlôh awpa he Marasaw hluvia syulyu châta cha chyhsia thiepa nata hmothiepa hneihna daihti achâ ty. Sawkha raih a hrialeipa nata nietluana phapa a hneileihpa chhôkhazy chhochhi cha kô thaona tawhta sahrozy pasapa nata a hlawfa pata he daihti he ama vawh hâdyh ty. Kô chhâna liata ama sahro pasa hualua pa zy cha zua ei ta, ahlu tlyma, achy tlyma, cha tawhta phusa ama lapangiapa nah ta cha chyhsia thiepa nata hmothiepa zy chalei hraw pata suh a hla kawpa taawta eima Siaha khihpi cha ama pangai ty. Sôpalietuhpa zachhi kawpa zy chhao hmoh thiepa nata chysia thiepazy râh hro nata suh hro liata a ypa zy cha Marasaw zy eima râh liah cheingei chaleithei awpa ta thata maniah la pangia pa hra ei ta,aly pa achâ ngai ta kaw! Âmo zy hriapasana vâ tlai heta, hara dychhiepa nata thotlâ khih chaki pa liata a y pa zy tai pita TV nata internet liata eima hmô ty pazy cha eima Siaha khipi lia cheingei ta eimâ vaw chalei theih tyh hrapa avawh châ,reithai tlâ chhao ama châ hmeiseih.He hriapasana zydua he Christmas avaw tlô awpa eima parônasa vâ nata pa papeimawsa vâ achâ tah leitheih va na.

Châhrasala, eima hmoh mâ zy he chyhsa to chaleitheih awpa ta panaopa (discount) achâ hra vâ ma i! Nothla achhyhpa eima tahpa Hindu nah zy hmâta ama beipa nata ama Puja parônasa nawpa ta ama hmoh mâ ru kaw pa zy, ahy torai chalei khai theih awpa ta ama pahnai ( Discount) theih hlâ khia ta cha, keimo Khozoh hroh achhyhpa zy chhochhi pi cha khazia eima theih vei aw, eima tao hialia awpa châ hri vei ma i!Cha tah châ leipa ta, kô hropa hawhta Christmasa tlô chyta hmoh mâ zy tlao paru via pa achâ hlâ heih khiata la he daihti he a hlu via syulyu châta la, heizy uavana nata paloru rietheina thla tlâ achâ cheingei heih aw.Chyhsa zydua pi eima hmoh taona liah maihta athôlei awpa he khoh tlâ tlai mapi. Châhrasala, tahtuh (over) hapa la phavei ama tah tyhpa hawhta,eima lana mâh hlâta 50% chhao châ leipa ta 100% zy, 200% zy taihta mârupa ta eima zua tyhpa hela,Christian ethic nata a pahlie hmeiseih. Eima râh hawhpa riethei hlu via na râh liah chhochhi la rie a pathei sah via rilina sâkha achâ tah sala ei tah chhei kaw nah ta pangiasa va na.

Chavâta, Adyhna Beipa, hârapa nata sipasapa zy Paw pina thlâpâ eima kaw ngia ha heih tawh cha,ahy toh rai pita baotuh phapa châ chyu achhuah pata,sôpalietuhpa nata achaleituhpazy hriapasana a theih thlâ na chôta a daoh vei châ ei sila, cha chata, Christmas eima parônasa zie eima palâsa hleikhô ta, eima chheipâ liata Kriszy leipa nah zy Christian ethics indirectly tah eima chhohtheina chhao achâ hmeiseih hra aw. Cha hawha châ lei pata,kô hro hawhta hmoh mâruna thla lâta eima pachâsa hlâ heih khia ta la, Beipina daihti he Marasaw hlu via syulyu châta uavana nata palôru rietheina thlâpa châ heih aw ta,thotlâ,riethei sipasapa zy no nata paw lu pahia heih awhta tahpa zy pachâ nah ta , takô tah ei 

CHRISTMAS VIAPAKAO MÂ A RU KAW HEIH VÂ MA I!