 |
| - By Beimozachhi Hlychho |
Bei pihna daihti a locho ha heih na. "Châ chhaih thei va na" tahpa hla ma paro via heih aw "Krismas nâma nahta" tahpa maw, pahno va na. Palôh, thla hluhpi thi leipa ta amô hapa pathyu heih awpa ta chho thlihua cha nai zualuapa ta pathli ha heih ta; he daihti ly-y kawpa lia heta ahy heta hmahta na palôh cha pasasa kh'ei se.
90's
"Laihsa pakha zie hlei tlai ma ei siahpathla thei hr'aw vá i" tahpa pachâna he vaw hnei pato via ha mawh sah la cha Vao liatapao kha ei hmaota tô beih aw va na. Krismas my, vao sâpa pyu rakhô tawhta theipa nah kha la ama thyu hawh kaw tahna a châ, kha daihti no khaw. Vao liatapao to lei awpa hlâta chi viapa rai hnei ma pi. Hlâno truck driver nah luck-zie ama reipa hlâta vaothiepa nah kha keimo hawti nah hrahryh liata ama luck via khiahma ei tah.
Vao liatapao ama vaw thaoh dyuta tlai kha leisadi liata charih charih pi ta, eima hmao liata phie pataih pi ta, ôh hlâta puah viapa ta eima tô ha tyh bao, kha daihti nota eima duphazie khaw krismas Vao hlâta hmahta eima pi via khiahma ei tah tyh. Atahmá deikua vyhai khôphei kiah hapazy hluhpi ama y viasa thokhazy la.
Krismas noh zâlâ vaw châ ta, chôtlapenawh ta kaliah dawrâ, hlachâh hna ama phawpa lia chata sa nata laoh sahpa cha vaw pachhi chaimâh ei ta, keimo zy, achuna lia raita palôh soh beih leipa satlia thokha puapâ kawpa nahzy line kha liata eimâ patlâhpa kha my thei va na. Kalâpa pheihnie âhno beih leina liata kaliah dawrâ ama phawpa kha avaw pha kaw, laikachha via lâta satihâ ama baopa kha keimo laikathi via lâtapazy chhaota eimâ pahlao thei khai ha chhy hra bao, kha tluta RSVP phapa kha pahno mâh va na! Eima nyu hrata rathôpa mongyu paw eih tiepa tlai kha miah chabasa ei ta; aw ahy saw ta hmah rathôpa liata satihá pahrao dâh miah pachu hra ei vâ, eima pakah chhôh lâta â ngiapa hlâta eima hmia liata eima leih tlamawpa kha a hluh via.
Chapawsaw kawpa ta eima reipazy kha ahy hro châ vei ei, line kha tawhta " a thaw-thawpa, a sa-sapa" tahpa ta liahsa áduahpa ta awh ngâhpa, hmaosah liata laohmô âbaipâpa nah kha tlao ama châ. Kha daihti no khata laihsa ei charei tyh hra aw, tahpa pachâna vaw hnei h'aw sah la cha, khati hmahta "a sa-sapa, a thaw-thawpa" tahpa ta awh beih thlyu va na.
Meithei, a lao pua thei leipa, meithei ahlao rai leipa chhaota pa theipa kha pavaw aby n'awpa ta hmâh chaimâh pi ta; aw kha hawpa daihti nota eima lôhrâ tlô dâh tyh kha satliapa uhthei lâ tawhta lahpinô a hmô tlamawpa hawh dei eima châ chamaw!
Laihsa chareipa hlâta bu tawtawta liata âriepa paphasa via pi ta; sa nata sahma hlâta chahnamei tlôna khata eima aoh a hria via. Py alypa kha viasa rihchâhzy nahta eimâ lyna chaina nata, pa-krismas-satuh chaipa a châ tah lei thei va na.
No comments