GUJARAT ASSEMBLY ATLYHNA 2017 : BJP ta sawhkhâna ama tao pazao thei lymâ ma?

Târi 9 nata 14 Di Thlâpâ 2017 liata manôh 182 yna 14th Gujarat Legislative Assembly atlyhna hnei awpa liata Gujarat liata Political Party nano nanopazy ta thapi phiapa ta Campaign helamaw siekheipa ta, sawhkhâna la cheingei achhuahpa ta amâ râpasua. Indian National Congress (INC) nata Bharatiya Janata Party (BJP)-zy cha a chatôh chai awpa châ ei ta. Sawhkhâ haipa BJP he ama duasu a pha viapa hawhta â lâ nota, atliata tawhta Politics ziza â nanopa hawhta pahnona a ypa vâta Opposition lâ chhao ama thapawh kaw pyly hra. 

Atlyhna chhaihkhana (1st Phase) cha tari 9-pa khata Vote pathlapa cha ta; Vote he 70% a tlapa hawhta pahnopa a cha.

Atahmâ ta Gujarat Legislative Assembly sie haipa he târi 22 Nawh 2018 khita chhâ aw ta. Term hmiatuapa kô 2012 liata amâ tlyhna liana khata BJP ta sawhkhâna taopa ta atahmâ ta PM a châ haipa Narendra Modi kha Chief Minister avaw châpa kha châ ta. Kô 2014 India atlyhna liata Modi kha Prime Minister avaw châ hapa vâta Anandiben Patel cha Chief Minister a kaw châ ha heihpa a châ. Patel he Patidars, Dalit chiphozy ta a sawhkhâ siekheina dâh kholeipa ta palôhtlâhleina ama palâsa tawhta Vijay Rupani cha Party ta CM awpa ta ama rao ha heihpa a châ. 

Gujarat he State lai kawpa a châna hawhta Voter chhao hluh ei ta. Atahmâ duasu liata Voter he 4,33,11,321 y hai ei ta; Assembly atlyhna chhao he chhaih 2 lâta târi 9 nata târi 14 liana hnei awpa ta ryraopa a châ hra.

BJP ta Candidate ama taopazy moh ama hmô tawhta BJP chhôhkha liata palôhtlâhleina ypa ta, manôh vâro tlaita bâna ama pangiapa ta ziza a tao kaw raohpa ta, Patidar chipho chhihthatuhpa nata PAAS chhihthatuhpazy chhao Congress Candidate-zy moh ama hmô tawhta ama palôhtlâh pyly hra vei. Gujarat Assembly atlyhna a hnia lymâpa liata ziza a pahieh lymâ ta. Chipho chyh viapazy sydie achhuahpa ta Party laipa BJP nata INC a râpasua ei ta. India Politics apahnopazy ta Congress ziza ama rei papha kaw nota, BJP pahnie awpa ta deikua a rairu kaw chy aw, ama tah pyly hra. 

Gujarat Atlyhna chôchâh liata Gujarat Politics apahno kawpa, Political Analyst Achyut Yagnik, ‘Shaping of Modern Gujarat : Plurality, Hindutva and Beyond’ tahpa châbu rohtuhpa chata, “Atahmâ Gujarat atlyhna liana heta kô hropa ta atlyhna hlâta Congress Vote share he athata a pôhpa ta pahno na ta, atlyhna hmiatuapa liana khata BJP nata Congress Vote share a hliena he 10% châ ta; atahmâ deikua Congress he Vote Share liata amâ kaw sâh hapa ta â lâ ta. Anodeikua he ama pôhna he BJP pahniena awpa ta âdaih ma?tahpa deikua pahno vana” a ta. He hleikhôna heta Hardik Patel, Alpesh Thakor nata Jignesh Mevani-zy chata sawhkhâ haipa BJP chhichâ n’awpa kyh liata yzie ama hnei kaw aw, a tah hra.

Patidar chipho ta atlyhna ama panano thei ma : Hardik Patel he Gujarat atlyhna liana heta ‘King maker’ a châ thei ma?

Photo : Hardik Patel

Gujarat atlyhna a hnia via lymâ ta, Hardik Patel thâtih chhao a lai via lymâ hra. Atliata liata Hardik Patel ‘Sex Video’ tahpa ta Social Media liata âvaw lâluah kawpa cha National Commission for Women (NCW) chata achupasia ha hra. He hawhta a châ nona heta Hardik chhihthapa py Patidar Anamat Andolan Samiti (PAAS) chata BJP ta he hawhpa Politics pualei kawpa ama hmâhpa he a pha lei kaw, tahpa ta Sex Video cha BJP ta Hardik Patel mohpachhie amâ chhuahna hawhta ama bai.

Gujarat atlyhna ziza pasâhsatuh chaipa pakha, kô 25 ta uhtheipa, Hardik Patel he India zawpi ta Gujarat atlyhna liata a hmotaotheina ta yzie a hnei ma?tahpa ama sai ngâkaw châ ta. Atliata liata Rahul Gandhi nahta aru lâta Hotel sâkha liata amâ hmôpa vâna khata INC a baokhâ awpa hawhta reina a y tawhta daihti rei leipa liata Hardik Patel cheingei ta BJP adyuhpa ta INC ama bao aw, tahpa a phuah ha hrapa kha a châ. Anodeikua, Hardik Patel mopakha heta Patidar chipho zydua INC Vote awpa a chhihtha thei ma?

Patidar chiphozy he hlâno tawhta Gujarat liata chyhsa râh liata leipalie ta nie a tlua tyhpa chipho châ ei ta. Kô 1970 rachhôh liana khata kha daihti nota India prime minister, Indira Gandhi ta râh hneina dâh a taopathi tawhna khata râh hnei hrapa ta, lyuzy amâ tao ha hrapa a châ. Kô hluhpi chhôh cha ama râh liata chicheipa chheipa ta niebaw a hmôpa ta ativy kaw tyhpa châ ei ta. Anodeikua chakâh nata râh rao lymâpa vâta niebaw hria papua khi y khao leipa ta, chyhsa pôh lymâpa vâta nata râh chyh via lymâpa vâta ama thyutliapazy ta raihria awpa hnei leipa ta, kuruapa ta amâ tyuh hôlô ha bâpa a châ. He vâna heta Patidar thyutliapazy heta lahpinô chhao hnei ngâh leipa ta, Patidar chipho cha ‘Satliapa’ ama hluh pachaipa hawhta reipa a châ hra.

Gujarat liata Patidar chipho pahrâna khih hluhpizy cha thyutlia rai hnei leipa, nietluana a phahlapa ypakhyna su vaw châ lymâ ta. Cha chata sawhkhâ liata ama tovyuh hnei hra awpa ta rai lana kyh liata tovyuh (Reservation) pie hra awpa ta ahnawna avaw sa papua hapa a châ. Kô 2015 Khihpa thlâpâ avaw pahiehpapua ta, Patidar chipho thyutliapa hry tawhta Gujarat Politics pananotuh awpa ama tahpa, Hardik Patel avaw luahpa ta, ano heta Patidar thyutliapazy pahmaohpakhypa ta Gujarat sawhkhâ nota rai lana kyh liata tovyuh taopa awpa ta ahnawna hmahlana avaw siekhei hapa a châ. Hardik heta Gujarat liata Patidar Vote he 1.28 crore a tloh aw, tahpa ta hmotaotheina ama hnei tahpa â pahnopa ta sawhkhâ dycharao lymâ ta. A py chhihthapa Patidar Anamat Andolan Samiti (PAAS), ta ama reipatina dâh ta cha Patidar vote thysy 70 (lakh) cha Congress ta ama hmô awpa hawhta ama reipati. 

Kô 2014 liata Patidar chipho ta sawhkhâ hnohta rai lana kyh liata Patidar chipho châta tovyuh taopa awpa ta amâ hnaw hlâna khata cha Patidar chipho he BJP ‘Vote Hnawh/Vote Bank’ chaipa ama vaw châ tyh. Atakô atlyhna liata deikua INC heta ama sawhkhâ khiahta cha Patidar châta rai lana kyh liata nata achuna kyh liata tovyuh ama taopa aw tahpa bie amâ taih hapa vâta a ziza â nano kaw bâ thei.