'India râh liata apatupakhina hluhna chhâpa he MUSLIM-na vâta a châ : BJP MP
Faizabad: Uttar Pradesh liata BJP MP pakha chata, "India râh liata apatupakhina zy, athietuna zy a tlô tyhna chhâpa cha Muslim maluh ama pôh chahratuhpa vâta a châ" a tahpa chata chyhsa hluhpi no a pa-âhsa kaw.
He MP, Hari Om Pandey, Ambedkar Nagar, UP tawhta MP a tlohpa heta, he hawhta Muslim maluh ama pôh chahra kawpa he sawhkhâ ta a kohki lei khiahta la India râh liata Pakistan hawhpa âvaw duahpapua aw, a tah hra.
BJP MP heta, "Terrorism, apatupakhina, chanô-chapaw châna kyh liata atlahnaona athata India rãh liata a pôhna chhâpa he Muslim maluh ama pôh chahra tupa vâta a châ. Muslim zy he India khotalaina eima hmô rakha tawhna khata athata ama pôh" a tah hra.
BJP MP Pandey heta a rei lymâna liata, "Imdia sawhkhâ heta thlaita he hawhta Maluh pôh chahra tu hapa kohkina awpa BILL parliament liata ã ngiakhei lei khiahta la, India râh heta achhaihna (Partition) hropa eimâ tyh heih aw" a tah hra.
Zâhnia khata BJP MLA pakha chata, India râh liata viahchaosa eima nie chhôhta la zawpi ta atlahnaona (Lynching) he pai aw vei, vaw tah ta; BJP MLA pakha heih hra ta, "Hindu zy ta saw 8 chhâ eima sa awpa a châ; Hindu maluh athata eima pôh thei n'awpa ta" avaw tah heih hra.
BJP MLA/MP/Politician zy heta reikah no-âhchhih kawpa, India aryhna châta chichhihpa reikah pathlie amã paoh kaw. He heta chyhsa hluhpizy no a pa-âhsa kaw.
Zawpi ryureina râh liata, zawpi vyuhpa ta aduahpazy reikah châta cha alyupâ lei kaw, ama ta.
