Premier League : Lukaku taochheipa vâta United tlô vei ei

Manchester City ta amâ iekhy zôzawpa Manchester United cha ama khichhaina tlyliah Old Trafford liata 2-1 ta pahniepa ta, Manchester Derby liata pahniena hladyu ama pathluah ha heih. City he atahmâ Season liata pahnie leipa hnei leipa ta ei 14 a sie theipa Club y chhôhpa châ chy ei ta; kô 2002 liata Arsenal ta Record ama vaw tao hapa cha amâ kaw kho ha tahna a châ. City heta minute 43-na liata Kevin De Bruyne tawhta Ball pha kawpa a hmôpa David Silva ta a pa-goal-pa hmâpa ta hmia amâ sa.

Pep Guardiola mohôhna ry liata Season khochhihpa a hmâh haipa City heta ama pahnie hapa, 2-na liata atyuh haipa United cha 11 points ta amâ râsai ha heih.

1st Half liata Old Trafford hneituhpa United kao by pahnie viatuhpa City heta minute 43-na liata ama tiamana lymâ hmô ei ta. Kevin De Bruyne ta Corner avaw chapiepa cha, Ashley Young pakhâpadiena hryta Silva ta â hnia kawpa tawhta a khô hapa a châ. Mourinho nawhtazy ta 1st Half chhôh cheingei ta a kaw pasu amâ chhuahna chhao hlaotlohpa ta, City defender Fabian Delph taochheipa tawhta Marcus Rashford ta United châta atahmâ Season liata a Goal chakina khôpa ta, 1-1 ta 1st Half ama pachhâ.

Anodeikua United heta ama opa City châta goal khô theina ryhpaohpa ama taopa ha heih. Silva ta freekick a vaw chapiepa cha Romelu Lukaku ta a nao kawpa ta a chapie papua thei nota, thlazohna chôta a tymâ hapa Belgian Lukaku heta a teammate Chris Smalling chapie thlupa ta, he tawhta ball avypa he Argentine defender Otamendi ta City goal nona lâta a pachâsa hapa a châ.

United heta daihti chhâna lâchhâh liata City defender Otamendi ta Ander Herrera a papaopa vâta penalty amâ hnabeiseih kaw nota, Referee ta Herera he a papaosa raruahpa hawhta tlao a tô haw. Lukaku nata Juan Mata ta goal khô theina ryhpaohpa hnei taraw hr’ei sala, Ederson ta City he a pabohsa hapa a châ.

Anfield liata Everton ta Liverpool ama patypamâ

Ei 229 amâ hmiachhyna liata Liverpool ta Mohammed Salah goal hmâpa ta Anfield liata hmia a sah ei ta. He he Egypt winger ta atahmâ Season liata khaih 12 tawhta goal 13 a khôna châ ta; anodeikua Liverpool heta goal nona khô thei khao vei ei. Everton akohkina pha kaw ta, ama tiamana zawzi ta referee Craig Pawson ta Penalty a pie haw. Rooney, a hawti nota a Club puasaipa ta Manchester United ta â pazao tawhta vaw kua heihpa ta penalty chapiepa ta Merseyside derby goal a khô ha heih. Daihti chhâ ta, 1-1 ta Everton nata Liverpool amâ pahniethai.

Arsenal-Southampton share spoils

Olivier Giroud ta daihti chhâ chyta liata a luhta a su pangiapa hmâpa ta Arsenal 1-1 ta Southampton cha ama khichhaina tlyliah liata amâ kei pahniethai khei.

Arsene Wenger nawhtazy he hâta hmiatuapa liata Manchester United hmiakô liata ama dua hapa chhiesana khata a pazi chy khiah maw tah awpa ta Charlie Austin ta minute 3-na liata Southampton hmia asahna khôpâ ha ta. Châhrasala he he daihti chhâ chyta liata France striker Giroud ta âvaw pasupa ta, amâ boh hapa a châ.