Mawrâh Governor Nirbhay Sharma ta zâkha â riepa ta Siaha tly

Zâhnia 17.1.2018 my dawh 9:30-pa khata Mawrâh Governor Nirbhay Sharma, Lt.Gen(Rtd), PVSM, UYSM, AVSM, VSM nata a lahpinô Jyotsna Sharma zy chata zâkha â riepa ta Siaha District ama vaw tly.

Governor Nirbhay Sharma  he Circuit House, Siaha liata hrua-eihpazy ta vaw dy ei ta. Circuit House Multipurpose Hall-liata MADC nata Mawrâh sawhkhâ ry liata Official zy meeting a hneikheipâ. He meeting-liana heta Siaha DC Harleen Kaur IAS chata “A brief Profile of Siaha District” tahpa biepipa ry liata Siaha District duasu a chyu sia kawpa ta Power point presentation hmâpa ta pamosa ta. Puhpa MH.Tiabi, EM (LAD) chhaota MADC duasu tlâhpipa power point presentation hmâpa ta a pamosa hra.  Puhpa N.Zakhai  CEM, MADC  ta “welcome Speech” hnei ta, Puhpa Hiphei, Speaker Mizoram Legislative Assembly nata Dr.K.Beichhua, MLA zy ta biereina ama hnei hra.

Nirbhay Sharma chata Official zy nahta meeting ama hneina liana heta Siaha District hmahsiena châta hmahlana kyh nano nanopa liata MADC nata Mizoram sawhkhâ ry liata officialzy chata information â pahnosa rairiepa ta, hriaparaohna pha kawpa hnei lymâ awpa ta bie tapa ta, Sawhkhâ Official-zy cha pa-ô pazypa tawhta asohsina kyh liata zawpi mopâtlâhpa ta eima hroh awpa a châ, a ta. Governor chata Siaha District  thyutliapa a hluh thei chaina hawhta pheisaih liata ama tloh thei n’awpa ta thyutliapazy cha amâ chhuahnoh awpa â ngiah kaw raohpa ta CEM, DC nata SP zy ta hriaparaohna nata ryraona sianô kawpa hnei a chhuah awpa ta bie a ta hra ei.

Circuit House-liata Sawhkhâ chyhsazy â pakyh khai tawhna heta Governor heta  Government Siaha College-liata  Siaha District chhôh liata chyhsa peimawhpa hrua-eihpazy nata College achuhaipazy nahta daihti hmâhkhoh ei ta.  He daihti liana heta Governor chata achuhaipa hawtipazy châta English nata Hindi thai awpa a peimawhnazie reihpa ta, Hindi he khizaw liata reih hmâh hluh chaipa 4-na châ hai ta. Achuhaipazy chata Hindi nata English thaipa he hmahsiena chhâhchabi peimawhpa miakha a châ tahpa ama pahno awpa a châ tahpa ta, achuhaipazy cha pa-ôpazy nata paritheipa tawhhta asohsi awpa ta bie a ta hra ei.

Governor heta Government Siaha College liata programme a hmâh khai tawhna heta District Civil Hospital nata  I.T.I. (Industrial Training Institute) zy a tly hra.

Governor heta zâhnia zâ Siaha liata â rie tawhta atanoh heta Siaha a puasai aw.