PUHPA F. LAWMKIMA, EM (FOREST) MADC TA LÔPU FOREST REST HOUSE A RÔNAH KAWPA TA PAHY

Târi 24, January, 2017 my dawh 11:30Am pa khata Lôpu khih liata Forest Rest House pha kawpa cha Puhpa F. Lawmkima, EM (Forest) MADC ta a pahy.

Puhpa F. Lawmkima, EM (Forest) MADC chata, Lôpu Forest Rest House he Lôpu khihsawzy ta nama mopakha O hawhta vaw mohôh ula tahpa chá haw khoh ei na ta; tlaw thysy 12 (lakhs) ta he hawhpa O phapa sa patlô awpa he keimo châ sihla eima thei na ta pangiasa vana, cha hawhta a châ nota Forest Department ta he tlupo ta phapa ta ama sa theipa he aly ama pachhihsa hmeiseih, a ta.

EM chata, Atahmâ cha Mara thyutliazy ta râhsa pazu pavaw abyh ta, ka ngâkawpa hláta cha eima râh, a chhôh liata a ypa nata Mara chipho pabohsapa he ama biepipa a châ ha bâ, tahpa ta Lôpu khih cha pabohsana rai Forest Department ta ama hria haipa liata baokhâ chyu awpa ta a hrua ei.

He Forest Rest House pahyna, Puhpa M. Rachu, VCP ta chhihthapa liana heta Rev A. Zawngia, Lôpu Biatuhpa Pastor ta daihtizy Khazohpa láta pavaosana a hnei khai tawhta, Forest Rest House sana liata pahno angiahpazy nata Technical Report piena cha Puhpa Thaly T. Azyu, DCF, Forest Department, MADC ta hneipa ta, he Forest Rest House he 13th finance commission tawhta thysy 12 (Lakhs) ama hmôpa tawhta sapa a chânazie zy, he tlaw thysy 12 (lakhs) tawhna heta a suhmozy paryhparipa châpâpa ta, he sôh hmâpa heta Rest House he patlôpa a chânazie a reih.

He khai tawhna heta Puhpa K. Chhuabei, EM (PWD) MADC nata Biatuhpa chata biereina hneipa ta, DCF Puhpa Thaly T. Azyu he kei, buakha chhôhta Forest ei patu chhóh tawhna khata pahnopasia na ta, Dept kohki pahnie kawpa, phahnai angiah kawpa a chã. Ano hawhta mohropazy chhao he phahnai angiahpa ta dept sóh hmâh thai chyu sihla khatlu hmah eima sie vâ tly. Ano hawhpa he Department Head hnei chyu sihla eima râh he khatlu hmah a sie vâ. Mararâh he keimo eih châ ta, hneituhpa palôh phaoh chyu awpa ta ei cha hrua ei. Biatuhpa ei châna hawhta Forest Department chô liata alynabie ei reih hra, a ta.

Biatuhpa chata, "VC nata MLA atlyhna vaw y heih aw ta, he liana chhao heta ryureina cha Khazohpa eih a châ, tahpa pahnopa ta â do lei tupâ hapa ta tloh khohna váta biedoleipa reipazy chhao bâsaipa ta, biedopa liata khâchâ eimâ duah awpa a châ" a tah hra.

Puhpa Tiahlei Syuhlô, Chairman, Town Committee, MADC chhaota biereina hneipa ta, Lôpu khihsawzy cha pabohsana rai hriana kyh liata tiama papua lymâ awpa ta áhaw ei.

Lôpu Forest Rest House pahy thiehpa alyna kyhchhih pachhuahpanohpa a châ hra.

Lôpu liata Forest Rest House pahyna hnei khai tawhna heta, Forest MADC Check-Gate, India nata Myanmar arina, Ralie khih, Myanmar kiah liatapa cha tlypa ta, EM (Forest) Puhpa F. Lawmkima chata hmo byuhpa nata angiahpazy mohpa ta, hmahla nawpa nano nanopazy a mohpasia.

Lôpu khih liata MADC Forest Rest House pahyna liana heta Siaha tawhta Puhpa F. Lawmkima, EM (Forest) he Biatuhpa Puhpa K. Chhuabei, EM (PWD), Puhpa K. Hrâhmô, EM (Edu), Puhpa Tiahlei Syuhlô, Chairman, Town Committee, MADC hleikhôta MDCC Hqrs : Siaha lâ tawhta Puhpa Robert B.Syuhlô, Vice President, NSUI, District Hqrs : Siaha zy ta ama chakaochahlâ.

Lôpu Forest Rest House pahy raohpa heta khih nano nanopa tlyh laihpa ta, zawpi ahawna hawhta biereina nata Public Meeting hnei laihpa chãpâ lymâ ta, nópawpazy he khih tota kyhchhipa ta vaw dypa ta, ama vaw palyupalih lymâ.