KEICHÔ TLÂH (PHUSÂ TLÂH) O CHHÔH

- By Beirapha L.Mara

KEICHÔ TLÂH he Phusa khih nata Iana khih likawh liata a ypa achâ. .a tlâh ôna chhôh liata ryusôhpa a ypa zyh he, MARA saw thohkha hlu pi ta cha ama hmô mâh nata pangiasa achhih vei,  chavâta ei thai na rakha ta he tlâh ôna chhôh liata hmo a y pa zyh nata  a thâtih  chyuta, keima ta ei hmôna dâh ei vaw pahri paziah tua aw..

1. RÂHNGIAH LÔKHAOH: Rahngia lôkhaoh tahpa tah amoh avaw puana chhâ pa cha, Puhpa M.Râhngia s/o M.Tôsa (Founder of Keichôtlâh lôkhaoh secret cave) Phusa khih puapa châ tah 2001 liata ahmô papua pa a châ. M.Râhngia he tahma taihta miah hro lah chy ta, Chhaolo khih liata a lapi nata saw zy chhaota ama pahra hai. Phusa khih liata ama pahra nota, Phusa khih paw pakha he lei ha ta, phusa khih chheipâh liata khih y pa,Chhaolo,Iana,Lobo MTP member tlyhngiahpy zyta atluana rai thata  ama hria nota, M.Râhngia heta  atluana liata he lôkhaoh ahy hmâh ta ama tly beih leipa nata ama hmô leipa he hmô ta achhôh lâ angia ta azoh kaluh thlâh hapa vâta achhâna taihta angia thei lei pata khihsawzy pahnosa pata ama pahno nata akhaihpa achei pata ama kaw ngia hôlô pa achâ., he lôkhaoh he chhah no(2 floor) tah a y. kha daihti kha tahma hawhta internet(social media, facebook, whatsapp,etc..) zy ymawh sala âlâluahkaw nata eipangiasa.

Date 15-18 march 2017 liata Youth Adventure Club, Govt. Saiha Colege, Siaha zyta Cave Exploration and natures study hneipa châta M.Râhngia lôkhaoh apathuna zie thlieh pa achâ. Lôkhaoh he 132ft tlaita athu ta, achhâh khana pa (First floor) akwhna la he 7ft châ tah., âsâhna la he 20ft tlaita âsâh, achhâh nona(second floor) he 8ft tlaita kawhta asâhna la he thlie theipa acha leipa vâta 70ft. rachhôh asâh nata pangiasa âchhih. Mara rah liata lôkhaoh athu chaipa achâ nata eipangiasa.. he hla tah athu viapa pahno mah vana, a ykhiah na ngiahthai ula. 

2. LÔBAIBA: He alô he lô-baiba ama tahna chhâ pa cha alô apachopa baiba alyu kawpa achâ,chavâta lôbaiba tahpa moh ama paphaosa nata eipangiasa.,  a y na su aza po tupa vâ nata aza pâhtaw tuhpa vâta zu theileipa pita,. lâpaw tawhta viasa lôkhyh zy chhaota sai khoh pita eima mo miah ala kaw sai angiana dah he reihka ta chhopasia aru kaw, 16ft rahchhôh âsâh nata eipangiasa.

3. VAHIAH HMAOTHY:Vahiah hmaothy he achanô(female) nata achapaw(male) pata pachhaihta, achapaw pa he 30ft tlaita seih ta achanô pa he 42ft. tlaita aseih. He a lô seihkawpa hmaothy liata atyuh nata khih hluhpi(Iana,siata,chakhei nata Burma râh khih,.hluhpi etc) hmô thei nata, mara rah liata chavah lai chaipa Beino chhao eityuna ry lia asia kawpata eihmô thei hra. tlaikaoh(mizo) nata ama rei tyhpa (LIANCHHIARI LUNGLEN TLANG) nata api zie amâlyu kaw,. Lianchhiari lunglen tlang cha tahma hlâ chhochhi cha alô zyh kei ta chyhsa pasari tawhta chô la kia pasai khaoleipa eita, cement hmâpa ta thata ama pluster asôna alei kaw ba. Cha vâta vahiah hmaothy ta akhu nata eipangiasa.

4. CHYVA PAPAHLIE: Chyva pâpahlie he ei hmô tuah noh ta cha tikhaoh chakhy pa khia maw ta nata mo pasia aw pata ei vaw pa cha ti rairai hmô  aw pa y vei. Keichôh tlâh o chhôh liata ryuhsôhpa a ypa na zyh hry liata ei no na¬-âh chaipa  a châ. A thâhtih ama reih na dâh liata cha parihpi khaoh(chyva lih nata keichô tlâh asie pahliena lâthlôh) achâ pata ama reih, Chyva lih (Beinô chava ) taihta a za pahlie ta âkhophie (Half) tawh chhochhih cha âlâ(hmô) theih pa hawta reih pa achâ.

5. KHâCHHAO THIH : Keichô tlah liana hetah khâchhao chyhsa tah ama chheileipa he athihpi ta a y, khâchhao he seih kaw tah chyhsa pitlohpa rao taih dehma aseihpa achâ.

6. Pawchha paw râhpa nata asaihpa chhao ahluh ngâsa.. makei thei chhao ahluhpi a y. 

Kha rakha kha (CAVE EXPLORATION AND NATURE STUDY) eima hnei chhôhta eima tlyh viapa nata athâhtih eima chu viapa zyh cha châta,he hleihkhôhpa chhao ryuhsôhpa hmô theih awpa  a y hôlô na tahpa pahno pa achâ.

Hmo sâkha ei palôh liata y kawh tyh pa cha TOURISM he a cha.Râh hro zyh sai ei sila hmô thei aw pata ama ti nata râh zyh asosa chatlieta ,ama râh ryuhsôhpa zyh hmâ phahnai eita thata sôh zyh chhao ama la pangia . Khaziah mawh râh hro pa na zyh khao amâ sosâh chatlie kaw?  eimata khiahla Tourism ama pachâ peimawhsa vâ acha,cha khiahla eima râh he za sai ei sila tourism lia he khaziah maw eima hnai kaw va tlyh i? Achhâpa ta eipahnopa cha,eima râh liata hmo sôhpa  a ypa zyh he cheih chalo ta,eima palahâ tuh lei vâta a cha. He Keichôh tlâh liata ryuhsôhpa y pa zyh he a sie vaw na(Transportation) pha kaw pa ta taohpa châ sala,Tourist attrack theih awpa taihta biehneihtuhpa zyh ta hma la ei sala,tahma ta duahsu hlâta eima râh he hmasie via awta â lâluah via na chhao ei hna beisei.