LITERATURE VS LAIHSARATURE

- By FC Henry

LITERATURE HE KHÂPA MAW?

Khizaw liata chyhsa athaisopa hluhpizy ta Literature tahpa biesâ he chhopasia phulu ei ta, amâ chhuahna miakhapa tlai kha ama chhopasiana dâh deikua alyu tu tlâ vei. Chahawhta achâ vâ chata Literature yzie he achyusia kawpa ta chhopasia thai awpa chi châ vei tahpa alâ pasia kaw ta, Literature chhopasia awpa ta Châpaw pasih kawpa tlaita roh ta, kao nano nanopa ta chhopasia awpa angiah ta, chavâta biesâ hry liata rônah chaipa cha Literature he a châ thlâh ha aw khiahma tah thei awpa a châ. 

"Literature yzie na pahno ma? tahpa ta ahiahri ei sila, "Literature yzie tlai cha ma ei pahno vei tly." tahpa ta eimâ chhy chyu thlâh h'aw nata ei pangiasa. Anodeikua cha achyusia kawpa ta chhopasia awpa ta la eima chhopasiana dâh â lyu tlâ nata pangiasa va na. He vâna heta keima chhaota he ei châpaw ropa eima pahnothai thei n'awpa rakhata ta ei thaina hawhta Literature biesâ he duah vaw chhopasia hra tua sah y. Literature cha chôkhazohpa hmo taopa, khizaw nata a chhôh liata a ypazy a châna nata rônah zie hawhta phualuahna, hmo a y hlei leipazy a ypa hawhta pachâ ta, mothlawpa ta ahmeiseihpa râh maniah patlysa thei awpa, alypa nata thathyu kawpa ta maniah pa ysa ta, maniah pachasa ta vâpiahti hawhta raithlihti palosa ta, maniah pahneisa heih thei tyhpa hla nata biezy he Literature cha a châ.

LAIHSARATURE HE KHÂPA MAW?

Literature khizaw liata mohpathâh kawpa, a châbu ropa vâta khizaw râh thokhazy ta amâ hao kawpa nata luh mâ taihta ahneipa, muslim nahzy ta thie awpa taihta amâ chhuahpa Salma Rusdhie ta he Laihsarature biesâ he chhopasia thai tiarâh leipa aw ta, India râh liata Literature vâta ama mohpathâh kawpa Shushwant Singh, Anita Desai nata RK. Narayan-zy chhaota chhopasia thai hra leipa aw ei ta, Profesor Dr. Laltluangliana Khiangte nata H. Lalrinfela (Mafa-a) zy chhaota chhopasia thai hr'aw veih ei. Âmo dei châ leipa ta he Laihsarature biesâ he Proffessor Dr. K. Zohra chhaota pahno hra leipa aw ta, mara Literature khizaw liata eimâ bôchhâ chaipa nata eimâ pahniehna chaipa châ haipa Puhpa. A. Zakia chhaota pahno hlei hra aw vei. Khazia maw? Reikah apua thiehpa na a châ ha.

Laihsarature biesâ yzie nata a vaw puana chhâpa he mara thyutlia achyhtazy ngâlâh ta ama pahnopa vâta Literature liata mohpathâhpa nata alâluahpa moh eima palâsapazy heta cha pahno tlai aw veih ei. Anodeikua cha Laihsarature biesâ he Literature reikah angia kawpa nata yzie hnei kawpa, khizaw chyhsa hluhpi ta ama patuapalua papha beih lei awpa châ ta, Literature a vaw puana kaokha nata chhopasiana kaokha chhao a châ hra.

Laihsarature yzie cha he hawhta vaw chhopasia tua sah y. 'Laihsa (girl)' tahpa biesâ nata 'Literature' tahpa biesâ apahlyhpa/pazaopa he 'Laihsarature' cha tlâ a châ.

'Laihsarature he kheihawhpa tawhta vaw puapa ma a châ?' tahpa ma na pachâ. Atlia tawh khata mara thyutlia hluhpi ta marareih he Literature hmâpa ta palaiseihsa awpa achhuahpa ta thata hmala lymâ ei ta, cha zawhzi chata chyhsa phahnangiah viapa thokhazy ta “Mara Writters Club” vaw padua ei ta, MWC nahzy heta ama theina zydua papuapa ta keih eima chakâ lymâ hra. Ama hmalana kyh liata phahnai awpa pachâpa ta MWC Whatsapp Group chhao pahypa châ ta, he group lia heta MWC manôh nata manôh liata aroh mâh leipa thyutlia hluhpi cha eima y hai. MWC whatsapp group liata a ypazy he thyutliapa sairô eima châpa vâta bielôhawhpa reipa ta satlia nata laihsazy thata eimâ pakyh tyh.

Eikha cha Literature kyh eima reihpahmaoh haino heta satlia thokha heta group liata laihsa nah cha thata avaw charia heih ei ta, eima bielôhawh reipa chhao pahâh thei khao leipa pi ta, group manôh liata pakha chata cha hawhta Literature kyh rei haino ta laihsa nahzy vâta satlia nah ta bierao ama vaw tai thlâh hapa cha satlia nah tahchakiapâpa ta nata hiehâh saisopa ta, "He group liata satlia a ypazy ei chi he Literature buakhei leipa ta tlao Laihsarature nama buakhei via hripa he." tahpa ta a vaw paphôh pâ. He hawhta vaw paphôhtuhpa he Puhpa B. Ngursanga, P/S to Speaker, Mizoram Legislative Assembly Speaker châ haipa he a châ. He he 'Laihsarature' biesâ ei thei tua chaina, pahno tua chaina nata a vaw puana cha a châ.

Puhpa Ngura ta a saisobie a rei chakhyhpa tlai he akhô lâta thata pachâ pazi na ta, he Laihsarature biesâh he yzie ahnei kawpa nata angia kawpa, Literature vaw puana chikha nata Literature parônahsatuhpa kaokha tlai châ ta, biesâ yzie hnei kawpa nata rônah kawpa a châ tahpa he ei hmô papua.

'Khâpa ma Literature nata Laihsarature azaona nata ahniahnina cha?' tahpa ta na pachâna kha na vaw hmâh ngâh thlyu nata ei pangiasa. No âhchhih kaw tlôh ta hmo dopa châ thlâh ha tlôhpa cha he tlai he a châ.

"Chyhsa heta khazia ma ama zyhna vâ heta mâty awpa he ama chi thai tyh vei tly? tahpa ta ei pachâ tyh. Atahmâ deikua cha liahsa ei pahnothai ha bâ. Keima chhaota ei zyhna vâ heta mâty awpa he chi tiarâh khao va na, cha ei zyhna cha Kyhpachâna he a châ." tahpa ta Literature khizaw liata mohpathâh kawpa, William Shakespear chata a reih.

He reikah angia kawpa nata rônah kawpa, mâty yzie nata satlia nata laihsa likah liata kyhpachâna rônah kawpa vaw pih tyhpa, cha kyhpachâna adopa nata angia kawpa vâta apie khaina zawhzi ta ato ahlâna nata angâna vâta thina vaw tlô tyhpa he 'Mâty' tahpa ta William Shakespear ta a vaw reih.

Tlai chuh, Zisu Krista kyhpachâna vâta ano châta apie khaina nata ahlâ khaina vâta ama hrona taihta ahlâ khaina he 'Mâtyh' ama tah tyhpa châ ta, chahawh khiahta cha satlia nata laihsa likah liata kyhpachâna vâta thina vaw tlô tyhpa chhao he ahy ta e 'Mâty' châ vei tahpa ta chakhiah ngâhpa y ei chi?

William Shakespear chata laihsa hmipha kawpa nata sia vovâ kawpa cha kyhpachâ kaw ta, ama likah lia chhaota nohto ta kyhpachâna pawngiapa cha a pakai rili tyh. Cha kyhpachâna vâ chata a kyhpachâpa châ chata apie khai ta, ahlâ khai awpa khoh ta, a daihti nata noh dei chhao châ leipa ta a hneina zydua nata a hrona taih chhaota hlâ awpa chi leipa ta, cha kyhpachâna cha a zyhna châta phie a pyh ta, cha a zyhna vâ chata mâty awpa chhao chi khao vei!

Literature khizaw liata bie rônah kawpa nata angia kawpa, kyhpachâna ta hmo a tao thei zie nata a rônah zie dei châ leipa ta, kyhpachâna vâta ama hrona hlâ thlâh hapazy cha ama zyhna vâta mâtypa amâ châ zie William Shakespear ta a vaw reih papua pâ ngâna chhâpa he ahy vâ maw? Khizaw nokhaihpa pahmôsa ta, kyhpachâ kawpa ta a hawti no tawhta vaw mohôhtuhpa a nô nata paw tlyma châ leipa ta, a pilâhpazy vâta chhao châ hra leipa ta, a laihsa kyhpachâpa vâ deita ta a châ.

"Viahchao machâpa chhaota sipanyuhpa ama khoh tyh." ama tahpa hawhta satliapazy dei châ leipa ta pawhrâhpa, kô hluh hapazy chhaota laihsa hmiphapa ama vaw pahno thei kaw tyh. Laihsa pitlohpa cha rei leipa ta thyudyupazy heta tlao ama mo a vaw la via tyh hra. Thokhazy ta laihsa thyudyu hmipha kawpa ama charia-charâpa heta ama hro aly kaw tyh ta, thokhazy chhochhi cha ahmeiseihpa râh taihta tlôkheipa ta, kyhpachâna pawti azykhei hapazy chhao ama y chili hra. Kô uhtheipa, laihsa thyudyu hmihpa kawpa iadi ta a zai hapazy heta tao thai aru ama tah kawpa a châ thlyu aw;

"Meikiah lo ta hnazô tlei khai ha hrasala, Ei chhôsoh nah ei mokhaoh deikua a pawh via rili." tahpa bôzyu maniah kia sai hapa J. Vialua khata a vâsâhna bie hlata a vaw tlâ-awhkhei pâ ngâ kawpa kha. He dei châ vei, laihsa hmiphapa nata samiepazy heta ama pachâna a la kaw hra tahpa pa-isa via heih awpa ta, "Ei phuh lei pawmaihdinô nah akei pawlâh pi, Thyudyu pawna araoh mawh sala ei châ ti awpa tlai." tahpa ta thyudyu hmiphanô chô liata a saduthliena cha za ahripaziah heih ta,

"Tlâhzaw noh-ri pazawh laihna ei khiahlôlynô, Hrozô chhâ lia rai ta chaw my beih aw va na." tahpa thyudyu hmiphanô, â chyulâh thei tlôh lei awpa nata a khiahlôh liata arie thlâh ha tyhpa cha pasai lei kawna chôta a pathlie ha.

Tlai chuh, mara Literature liata biesâ angia kawpa hneirôh kawpa thokhazy he cha Mizo nata English ta palie awpa a chhuah m’awh sila akho awpa nata atlu awpa bie raita y thei lei awpazy a hluh kaw. "Noh-ri pazawh" tahpa biesâzy he cha khizaw liata kheihawhpa reih hmah pakhopâ awpa y leipa biesâ châsala ei pangiasa, a rônah zie chhao thliepakho thai rimâ awpa châ hra vei. He dei châ leipa ta, "Meikiah-lo" tahpa nata "Hnazôtlei" tahpazy he bie alyu thlâh hapa châ tlôh âpakaohpa ta achhuahna miakhapa rei papua n'awpa ta J. Vialua (L) ta a za paryh-pari thai thlâh hapa he no-âchhih kawpa nata rônah kawpa chhao a châ hra. He hawhta marareih Literature rônah kawpa nata hneirôh kawpazy no-âchhih kawpa nata angia kawpa ta hla ta phipa a vaw châna chhâpa he khâpa hro vâta châ vei, Laihsa vâ pyly ta a châ.

“Viasinô vâ raisâh ei sa no, Thlihuah nai zualuah ta vaw pathli e;Ei lôhdunô khiahma tah na, Hmialia thlaisah chhao hi khai e.” tahpa zy he kheihawhpa reih raita hmahta paliepa châ ha mawh sala a châna hawh tlaita thaoh papua thai khao rimâ awpa châ vei. He hawhpa Literature phapa nata angiapa, rônah kawpa he a vaw puana cha khâpa hro vâta châ vei, laihsa vâ pyly tlâ a châ heih.

Chyhsa athaisopazy ta cha “Khizaw liata chyhsa mo ala chaipa cha laihsa hmipha kawpa he a châ” ama tah. Hla nata bie pha kawpa nata rônah kawpa hluhpi vaw puana he Laihsa vâta a châ, cha vâna chata Literature khizaw lia heta laihsa nah heta tovyuh pha kawpa to ei ta, he ama tovyuh pha kawpa heta khizaw chyhsa hluhpizy cha pahneisa tyh ta, a châhta cha a pachâsa heih tyh hra. Cha hawh tlupo ta peimawhpa nata hmo taotheipa a châ vâna chata ama châna nata rônahnazy, khochhihna nata pawngianazy cha thai kawpa ta phualuahpa ta a yna daihti liata cha Literature he a vaw hneirôh via ha heih tyh.

He vâna heta Laihsa hmipha kawpa nahzy heta Literature he pahneirôhsa tyh ei ta, ama pasôhsa tyhpa vâ heta laihsa hmipha kaw pazy ahlao leipa ta cha Literature khizaw he thata a yru tyh. Chata achâ khiahta cha, “Literature nata Laihsarature he chhôhkha ahnia kawpa nata azaokhi kawpa, unawh ahnia kawpa nata nô kha saw châ veih ei.” tahpa ta na ei ngâhpa nama y khiahta cha atahmâ tlai he âsâh kawpa ta nama bâh duah vaw chaluah tua rai u?