Mara râh hmahsie n’awpa ta achuna

- By Beihrokhai Azyu (Apaw Azyu)

Biehmia

Mara râh hmahsie n’awpa   liata  maoh a phaohtuhpazy cha achuhaipazy eima  châ za tah ei sihla eima za reih chheih na ta pangiasa  a chhih vei. Achuhaipa tahpa yzie cha ‘hmahsiena totie â chu ngâhaipa ’ tahna châ ta. Nelson Mandela ta ‘Achuna (Education) he hmo peimawh chaipa nata hmotao thei chaipa, chaihrai pha chaipa,  khizaw taihta panano theina a châ ’ a ta. He bie heta achuna peimawh zie maniah a chho  hleikhôta, hmahsiena chaihrai a châ zie a za reih pasia hmeiseih. Chavâta,  eima râh hmah pasiesa awpa ta cha achuna (Education) he khâ eima papeimawhsa tua chai awpa a châ.

             Eima pahno khaipa hawhta, Mara râh liata hmahsiena (Development) a chyh  zie chhao pahno khai pi ta, atahmâ nota eima Income hluh chaipa  tawhta  80 percent he cha sawhkhâ  rai  a za châ chy. Châhrasala,  India râh hmahsiena zawzi ta, keimo Mara râh chhao hmahsiena lâ  pangai pathao ngâkaw bâ hra pi ta, atahmâhlâ khizaw hmahsiena liata peimawh kawpa,   Science & technology  liata chhao hmahsiena athata za hnei ha bâ hra pi ta,India râh chaki chaipa liah hmahta pahrâ hr’aw sihla, electronic pua thiehpa zy chhao eima râh liata za khichhai tiarâh khao vei. Châhrasala  za tah tua sala, hmahsie eimâ tahna zy, thai eimâ tahna zy he atahmâ tawhta daihti rei leipa liata hmahsiena vaw tlô awpa châta eima hmâh phahnai theih hr’aw  vâ ma!

               Rei leipa liata eima râh liata hmo avaw tlô awpa cha Look East Policy vâta eima râh he sôhpaliena supipa (Business Centre) avaw châ aw.  Cha ti ta cha, Mara râh liata châthaipa eima peimawh zie âvaw lâpasia via lymâ aw ta, atahmâno ta châthaipa nata athaileipa likah liata a pathluana/apananona  eima hmô tu leipazy he daihti reileipa liata â vaw pahlie kaw bâ na ta pangiasa âcchhih. Khizaw thaina Science & tehnology lâchhâh athata hmahsiena vâta,  châthaipazy châta hmotao/raihria awpa hluhpi y aw ta, athaileipazy châta khâpa hmahta tao/hria thai awpa  châ khao aw vei. Marasaw châthaileipazy châta nietluana kyh liata athata rairuna eimâ tyh cheingei na ta pangiasa â chhih ta, eima râh liata kudao awpa zy  chhao hluhpi eima y cheingei  na ta pangiasa â chhih hra. Chavâta cha hawhpa daihti eima tlô hlâta, atahmâ tawhta achuna (education) he eimâ dua papuana awpa châ ta chaihrai  pha chaipa châta eima hmâ  awpa  he ângiah hmeiseih.

Eima râh achuna  duasu eima za sai tua aw. He he Abstract of Village wise household Survey Mara Autonomous District Council (MADC) ta 30^th September 2015  ta a papuapa a châ.

         

He box chhôh liata eima hmôpa hawhta, achuna (Education) liata cha heta he tlâ eima châ chy. Eima Maluh (Population) he 64,829 châ pi ta, châhrasala, graduate, PG,Ph.D nata M.Phil  zydua he 3,777 ngâlâh eima châ chy . Eima maluh mopa ta achuna liata eimâ hnai zie âlâpasia kaw! Thyutliapazy  pih lôhpi phaohpa ta achuna liata tôhpi eima phia via lymâ awpa  abyuh hmeiseih. Châthaipazy reih dah ta “Person without education is really blind” ama ta. Chavâta achuna (Education) papeimawhsa ei sihla; eima chaihrai pha chaipa châta eima hmâ cheingei awpa a châ.

             Atahmâhlâ  Mara râh liata châ achupa/châthaipa eima hmô/sai dâh nata eimâ pasyupalina (Advice) kyh liata  chhao eima thla bâ hra awpa he abyuh hmeiseih. Chyhsa hluhpi ta cha, châthaipa a châpa  vâta sawhkhâ rai a hria cheingei awpa hawhta pachâ pi ta, Sahdô, Lyu, Sahrohzy pasa sala, daoh zy etc tao ei sala eima hmôna dâh â nano kaw chuh.

           Râh hmahsiepa nata India râh za pakhopâ tua ei sihla.  India râh  he khizaw (World) Economics hmahsiena liata sâ 6-na liata y  hai ta, Education literacy rate liata 74.23 % eima châ. Japan he khizaw Economics hmahsiepa  3 liata a hlao ta, Education literacy rate liata 99%  a châ. Eima pahno khaipa hawhta Japan râh he World War ІІ nota athata ama parao-pakei khai hapa kha châ ta, châhrasala kô rei leipa liata khizaw liata râh hmahsiepa hry liata âvaw hlao lilaw thlâh ha heih. He hawhta âvaw lâ pakhuana chhâ chaipa cha, achuna(Education) liata hmah ama sie kawpa  vâta a châ.  A chô liata eima hmôpa hawhta, Japan nata India Economics nata Education literacy rate liata  eimâ pahlie kawpa hawhta, hmahsiena kyh liata chhao   eimâ  pahlie kaw hra. Chavâta,  hmahsie awpa ta cha,  achuna he chaihrai pha chaipa a châ  tahpa â lâpasia hmeiseih.

                Eima Bible Pathaipa liata Mawsi chhao he achuna  liata hlaotlo kawpa a châ hra . Hmotaopazy 7 : 22 liata eima hmôpa hawta, châthai kawpa nata a soh ngaita kawpa,  Izi râh liata chyhsa sona zydua pachusa ei ta a patlô hapa a châ. A patlô khai tawta a thaina-sona zydua cha Izarel mo sahlao hmasie n’awhpa châta â hmâ pathao haw hra tahpa eima pahno aw. Chavâta keimo  chhao pita eima thaina nata sona zy he  Mara râh hmasie n’awpa châta eima hmâ  cheingei hra  awpa a châ.

Achuna liata peimaw kawpa thokha zy:

1.                  Daihti pasôthaina:

             Achuhaipa zy pita daihti phapa eima hnei chhôpa he  eima hmâ thai kaw awpa nata pasô thai kaw awpa  abyuh hmeisei. Noh nata daihti asie lymâ pa hawta eima noh nata   daihti  chhao sie lyma hrata, hlaphituhpa ta ‘ Na nata kei  daihti miah  hâ tlô va’ a tahpa hawta. Keimo chhao daihti maniah  hâ tlô va, chavâta, eima chutheina daihti phapa eima hnei chho pa he apha kawpata nata eima theina zydua a piepapua khai pata eima chu  lymâ awpa achâ. Benjamin franklin ta  ’ Daihti he phusa na a châ’ a ta. 

              Eima Bible Pathaipa liata chhao  daihti a sô zie  (Bichhotupa 3 ; 1 - 9 ) "Ato châta daihti raopa cha ta" tahpa eima hmôh  hra . Daihti  pasôthai awpa nata hmâthai awpa abyuh zie âlâ pasia hmeiseih. Chavâta, achuhaipa zy pita daihti phapa eima hnei chhota khei tama eima hmâ aw? Achuhaipa châ tlôta class kia awpa hlâta Park liata tlymâ, College leipa liata tlymâ hmô awpa he eima hlu via âma tahpa he eima mopakha no châ tah eima hiahri chyu awpa a châ.  India râh ta hmasiena lâ apangaina zawzi ta,  keimo Marasawzy chhaopi hmasiena lata pangai pathao lymâ haw hra pita, eima phanopa hawta Kolodyne Project zy he  daihti reileipa liata a hlao vawh tloh awta,  cha châta Marasawzy châta  hmasiena (Development) pha kawpa  vaw tlôkhei awhta , cha ti tah, Marasaw châthaipa nata hmâtlâ châ hmeisei pa  eima hnei /ylei khiata cha, hmahsiena cha   eima râh châta chi âchhih kawpa nata Mara râh raona awpa  vaw tlôkheituhpa deita tlao achâ hri aw. Chavâta Marasaw zy he hawpa daihti avaw tlô hlâta, daihti phapa eima hneichhôpa zy he pasôthai ei sila, eima chuna liata quality kwpa ta nata hmâtlâ châh hmeiseih awpata  eima chu awpa he abyuh hmeiseih

2.                  Ngâchhina:   

            A chuhaipa zy pita hlaotlohna phapa eima tothei n’awpa ta  ngâchhina he eima za hnei tua chai awpa byu. Ngâchhina he peimaw kawpa nata khizaw chyhsa tota eima hnei kho/byuh  kawpa a châ. Benjamin Franklin ta ‘ Honesty is the best policy ’ ata. Achuhaipa/raihriapa eima châ nota  ngâchhina hro eima hnei khiatala khei hawpa hmo rai eima taona lia maihta eima hlaotlo lymâ awta eima  ti nata râh châta raihria thei aw pita, hmasiena lathlô liata eima tha chhao atlô  hra aw.

              Atahmâhlâ eima hroh zie zasai tua ei sila, achuhaipazy nata raihriapazy pi ngâchhina hro eima hnei ma? Raih eima hriana suh zy, châ eima chuna suh zy ado ma?Nô nata Paw zy châta ngâtlâ awpata eimâ chu/hria mâ? tahpa he eima mo pakha no châta eima hiahri chyu awpa a châ.

              Eima Bible pathaipa  ( Athaona 39 : 7 - 12 ) liata eima za mo khiatala, Zawsi  ngâchhina   zyh kha   pahno aw pita. Ngâchhina vâta âchhâna liata Izi ( Egypt ) râh chho liata abei chaipa pazipa chhao vaw châ thei tahpa eima hmô, â ngâchhina vâ tlai kha ta,  â râh châta byhna tlôkheituhpa avaw châ. Chavâta, keimo chhao pita eima chuna/raihriana  daihti liata  â chu/hria thlâthlituhpa châ leipa ta, hmâtlâ châ awpa nata ngâchhina hro eima pahro lylia awpa a châ. Cha hawhta eima hriah khiatala, eima chhuana  nata saduthliena zy chhao hlao patloh thei aw pita, Mara  râh châta hmasiena ( Development) atlôhkheituhpa nata byhna atlôkheitupa chhao eima châ thei cheingei hra aw.

3. Tiamana nata hriapasana:

            Mara râh hmasie  awhpa ta cha tiamana nata hriapasana he eima hnei tuah chai awpa abyuh. Gordon B Hinckley ta ‘ Tiamana nata hriapasan’ âhlao leipa ta khâpa hmâta chi cheipa  laisei thei vei ’ a ta.

            Atahmâ hlâ thyutlia zy pita tiamana nata hriapasana he eima hrozie liata hmô awpa a chy kaw bâ. Marva Collins ta ‘ Hlaotlona he mia vawh  pangai awpa châ leipa ta keimo ta hlaotloh awpa ta eima hria awpa a châ’ a ta. Chavâta,hlaotlohna hmô awpa ta keimo liata  tiamana nata hriapsana eima  hnei cheingei awpa a châ.

           Eima Bible Pathaipa  (Athaona 3 ; 17) liata eima za mo khiatala, Khazopa ta Ada hnota, 'Na khi mathlai a lei hlâlei ta nie a hmô aw va chi' ata hapa vâta eima hriapasa lei khiatala hmo eima taona/chuna liata hlaotlona rai hneithei leipa aw pita, eima chhuanazy, achuna nata sahduthliena zy, etc  hraolei pa dei tlao avawh châ aw.

            Atahmâ hlâ eima râh duasuh eima zasai khiatala, Marasawzy tiamana nata hriapasana kyh liata hnô eima khaw kaw pata âlâ hmeiseih. Nelson Mandela he chyhsa tiama pa nata hriapasa kawpa   châta, a hriapasana vâ tlai cha ta mongyu nata movyh likaw liata adyna chhao atlokhei ngâ kaw khaw! He adyna tlôkhei awpa ta kô hlupi tlai ta riethei vaw taota, achhâna liata a hlaotlo ta, tih nata râh chata byhna tlokheituhpa a vaw châ haw.

         4.Achhuana phapa;

           Hmahsiena liata sie hra awpa ta cha achhuana phapa he eima za hnei tua chai awpa achâ. Chyhsa hro liata hlaotlona maniah tlokheitu pa cha "achhuana" he a châ. APJ  Abdul Kalam ta  ‘Achhuana saduthliena  âsâh pa cha a hlaotlona chhao âsâh hra ’ a ta. Chavâta keimo chhaota hmo eima taona liata achhuana (dream) hmeiseih pa nata lai kawpa eima hnei hra awpa byuh ta, cha eima chhuana cha pahnopasia sila, hlao pa tloh cheingei awpa ta eima chu/ hria hmeisei hra awpa a châ.

           Marasawzy hmo eima taona/achuna  liata palôpi phao hmeiseih pata eima tao/chu hmeisei awpa he abyu hmeisei bâ. Achuhaipazy pita eima chuna liata eima thyudy class 10 tawta palôpi phao pata subject la awpazy eima tly thai hmeisei awpa abyuh hmeiseih. Chyhsa thokhazy Science/Commerce /Arts  apha ama tahpa vâta class 10 to 12/UG taita la eita châsala, amo liata pahâna hmeiseipa y leipa vâta a hnâ lâta ama subject ama panano/thla hei eita,  cha cha ta achuna liata hlaotlona phapa nata quality hmeisei za châ theih khao tyh vei ei. Khizaw liata  châ âthaipa scientist rôna kawpa ama kaw châtheina chhâpa cha, achuna liata âmâ thao dyu ta tawta, achhuana pa kawpa ama vaw hnei chhielie  khai ha pa vâ avawh châ. Chavâta, keimo achuhaipazy chhao pita eima chhuana zy  pahnopasia  ei sila cha achhuana liata palôpi phao pata hriapasana chôta hlaotloh eima chhuah cheingei awpa a châ. Cha hawhpa chyhsa eima châ theih ti ta la, eima râh châta hmasiena atlôkheituhpa eima châ  thei cheingei aw.

              Eima Malu (Population) tawta eima zasai khiata cha  80% he cha lyu tao pata nietluapa eima châ (Mizoram Economic Survey 2012-13). Lyu/Sado tao hmeiseipa y hlei mapi 80% cha agriculture ta raw pita, âhna-lasizy  70% to 90% he cha district hro lâ tawta eima la pangia pa achâ cha maw!. Chavâta  Mara râh liata  khei hawpa tlai he maw eima nietluana cha vâ tly i? New Land Use Policy ma? Job Card maw? New Land Use Policy nata Job Card he eima râh liata vaw chhâ hasala, Marasawzy kheita eima y aw vâ tly i! tahpa he eima za hia hri chyu awpa a peimaw hmeiseih. Chavâta  daihti phapa eima hnei chhô he patu thai pata eima pachâpasia awpa abyuh hmeisei bâ.  Râh hropa zy eima zasai khiatala,  Isreal rah zy he lyu hneituhpa zy he châthaipa châ ei ta,cha ama thai vâta ama Lyu/Sado liata ahna-lasi nata chi chei  awpazy  ama pahnopasia hleikhô ta,ama chi cheipazy chhao hlao a tloh pha kaw hra .Keimo Mara râh liata chaâthaipa zy pi he kheitama eima palôru eima phao hraw vâ tly i! Sawkha raih ngâlâ he ma eimâ mocha ma? Lyu/ Sado zy tao awpa he châthai leipazy tao awpa chima eima pachâ vâ tly i? tahpa  he eima pacha pasia tuah awpa abyuh.

             Mahatma Gandhi ta ‘ Eima hmia lâta hmo avaw tlô awpa cha atanoh ta hmo eima taopa liata â pahnie a ta’. Chavâta Marasawzy eima bohna/hmasien’ awpa ta cha tanoh ta eima chuna liata hmâtlâ châ hmeiseipa, Quality kaw pata achu ta ,vatiepa tawta ti lo papua ta, a chahryna maita byhna tlôkheituhpa châ lymâ pa hawhta, keimo chhao ta  achu thlâthlipa châ lei pata, achu hmeiseipa châ ta eima yna maihta chyhsa châta byhna atlôkheituhpa nata Mara râh hmasiena tlôkheituhpa cha awpa eima chhua lymâ awpa a châ.