“A kôchareihta eima râh nohkhih yzie â nano lymâ ta; chasipaw, sao, châhvâh nata nopi ziza chhao tao a ru via lymâ ha bâ” – CEM, MADC

Atamy dawh 11:30 khata MADC Forest Hall, Siaha liata “Râh pakâ lei awpa ta moto a sohsi suh vy” tahpa biepipa hmâpa ta Fire Prevention Week pahyna apakhyna hneipa a châ.

Atanohta Fire Prevention Week pahyna apakhyna he Puhpa Vanlalrova, Election Officer ta chhihthapa ta, Puhpa N.Zakhai CEM, MADC cha khichhailaipa a châ.

Puhpa N.Zakhai chata MADC Forest Dept Road site Plantation cha Mawrâh liata pahno hlao via lymâ ta, meikâpa tawhta atanoh taihna heta a boh ta, a chhâpa cha zawpizy ta asohaohna (awareness) eima hnei pha via hapa vâta a châpa ta â lâ, a ta. Thotlâh lâ chhao awareness hluh viapa piepa ta, meikâpa tawhta râhhmâhpazy pabohsa leipa ta, meikâpa ta eima râhhmâhpazy a parao lymâpa ta a châ khiahta cha eima ti lana hnawh-zy chhao thlaita a kua aw tahpa eimâ pahnosa awpa â ngiah. Atahmâ chhao eima râh nohkhih phasa achhih kaw tyhpa kha lei pathao ha ta. A kôchareihta nopi, chasipaw, sao nata châhvâh ziza chhao â nano lymâ ha bâ. India râh khihpi hluhpi hawhta sahroh nata chyhsapa châta ziza pathaihpa sy awpa a y khao leina daihtizy chhao a y aw, tahpa ta zawpi avypakhypazy cha meikâpa tawhta râhhmâhpazy pabohsa lymâ awpa ta bie a ta ei.

Puhpa F.Lawmkima EM (Forest), MADC ta chhao biereipa ta, Zisu â vy hlâ via cha Siaha District he eima District a châ ngâthlâh ha aw, nâma nata keima hleikhô heta râh kyhpachâtuhpa hropa y hraoh khao vei ei. Râh pakâ leipa la, vaihtuhpa liata y la; Siaha District ti nata râh chyhsa phapa châ pazao lymâ ma y, tahpa ta zawpizy a hrua hra.

Puhpa Thaly T.Azyu. DFC(H), MADC chata he daihti liana heta District Level Fire Crisis Management Committee, Siaha hmahlana nata tao awpa amâ sopazy Report a pie hra.