Mawrâh tawhta thyutliapa râh hropa lâta raihriapa 2000 tloh ha ‘He hawhpa râh hro lâta raihriapa he a boh vei’ : POLICE DEPTT

Aizawl : Mizoram Police-zy ta ama ngiana dâh liata nochhi lâta Mawrâh thyutlia âhlaopa ta a ypazie cha 2000 hlei tloh ha ei ta, râh hropa lâta â hlaopa he â boh lei kawpa hawhta ama rei.

Mawrâh Police hyutuhpazy chata Mawrâh thyutliapazy he Singapore, China, Macau, Hongkong, Dubai nata Kyrgystan liatazy raihria awpa ta y ei ta, he hryta a hluh chaipazy cha Singapore liata hria ei ta, a tlâhpipa ta chyhsa ypâpa (house maid) ama châ via chai, ama ta. Mizoram Police-zy ta atliata liata bie ama papuapa liata râh hropa lâta rai pahriasa theipa, dâh hawhta sawhkhâ pasaina a hneipa registered placement agency y mâh vei ei, tahpa reihpa ta, agent hawhta â reipazy ta thai kawpa nata sie byuh a chhih kawpa hawhta reihpa ta chyhsa hluhpi dôvei ei ta, raihria awpa ta nochhi lâta a siepazy ta rairuna amâ tyhna ta baona kyh liata rairuna a y tyh, ama ta.

Police hyutuhpazy chata chyhsa thokha document nohthlahpa hmâpa ta Myanmar passport hmâpa ta a siepa ama y tyh tahpa reihpa ta henahzy heta rairuna amâ vaw tyhpa chhao ta buakhei theipa châ leipa ei ta, a chhie chaipa chhao vaw tlôpa châ sala ama ri la awpa rairu ta, a buabâ kaw. Chavâta, raihria awpa ta ama siepa chhaota India passport ngâlâh hmâh ei sala ama khoh, tahpa ama reih. Raihriapa ta siepazy heta ama siena mâ liata ama hryuhpazy cha ama hlao tawhta thô heih awpa â ngiah tyhpa vâta vaw kua heih awpa hmahta châ hra ei sala thlaita vaw kua thei tyh leipa ei ta, âmo nata ama chhôhkhazy châta rairuna ama tlôkhei tyhpa hawhta ama rei hra.

Police-zy ngiana dâhta râh khôtholâ ta raihriapa ta chyhsa tuah tyhpa agent he 22 ngia hai ei ta, âmo hleikhôna heta chyhsa thokha chhao ama ypa ta ama pahnonazie reih ei ta. Agent hleikhôna heta Singapore-liata a y hapa chyhsa ahyzy tlyma nahta bie a chhopa ta raihria awpa he ama paphao tyh hra. Râh hropa lâta raihria awpa ta a siepazy he a tlâhpipa ta châ âchu sâh leipa ama châpa vâta rairuna amâ tyhna ta a buakhei a rairu via ha tyh tahpa Police-zy heta reih ei ta. Zokhawthar, Champhai liata duty police-zy chhao a hrohrua awpa ta ama pahnosa tyh, ama ta.

Râh khôtho lâta raihriapazy hryta chanô chapaw châna kyh liata mohchhiena tlyma he hawhpa liata â aopa ama ypa ama pahno mâh leizie reihpa ta, India râh chhôh liata deikua ama y tahpa Police hyutuhpazy chata ama rei.

- Zalen