Silbo Gomero reih lei daihmâpa

- By L.Beinawsa

Silbo Gomero reih he reih nano patlua kawpa nata reih no-âhchhih kawpa, ama reih aony siezie/parosa dâh he pavaw (bird) sâ reih nata â lyu kawpa châ ta, Silbo Gomero pahipa reih/ku tôpa reih (whistling language of Silbo Gomero) tahpa ta pahnopa a châ. Pahipa reih (whistling language) a châ tarawpa ta yzie (meaning) a hneipa, hawrawh (Alphabet) â kipa ta hnei ta, aobôna (consonant) 4-10 nata aopuana (vowel) 2-4 a hneipa châ ta, khizaw ta â pyhpa reih pitlohpa a châ.

Silbo Gomero reih cheihpazy he Spain râh La Gomera, Canary Island liata a pahrâpa chipho maluh chyhpatazy ama châ. Silbo Gomero reih cheihpa La Gomero, Canary Island liata pahrâpazy maluh he 21,952 (Census in 2006) deita ama châ.

Pavaw reih lyu thlâhpa Silbo Gomero reih he paro thei kaw ta, 2-5 km taih chhao a thei theipa a châ. Kha hlâ tawhta La Gomero, Canary Island liata a vaw pahrâpazy ta lâhla nata lâhnia bie amâ chhona (communicate)  tyhpa châ ta, reih hlô kawpa a châ. Ama reih he ku nata hmao hmâpa ta parosapa châ ta, Roman daihti no tawhta ama vaw hnei/hmâ hapa hawhta reipa a châ. Reina liata cha Spanish-nah ama vaw pahrâ hlâta he su lia heta vaw y ha ei ta, he ama reih he ama vaw hmâh syulyu ha tahpa a châ.

Daihti rei vaw sie chiehpa rakha tawh khata Silbo Gomero pahipa reih (Whistling Language of Silbo Gomero) a thaipa uthei viapa hluhpi cha ama sôhpalie raihriana vâta ama râh puasaipa ta râh hro lâzy y laih ei ta, ama râh liata Silbo Gomero reih a thaipa chyh via lymâ ei ta, cha hleikhôta Information Technology (IT) tha vaw tlô via lymâ ta Telephone zy a vaw y laih tawh chhochhi cha  Silbo Gomero reih he a hmâna vaw chyh via lymâ ta, a thaipa chhao y lihthâ khao leipa ei ta, reih leidia thei awpa (Endangered Language) duasu liata a y haw. He dei châ leipa ta middle class family zyta he reih he lyu taotuhpazy (peasants) hmâpa reih a châpa hawhta pachâpa ta ama sawnahzy ama pacheisa khoh khao leipa vâta sawtliapazy ta thai khao leipa ei ta, he vâta reih lei thei awpa duasu liata a yna chhâpa miakha a cha hrâ.

Ama reih a cheihtuhpa chyh via laih lymâ ei ta, kô zabi 21st chhâna (late 21st century) lâchhâh tawh kha cha kô 1950 hlâta a pihpazy deita Silbo Gomero reih he cheih thei bâ ei ta, kô 1950-1980 likah liata a pihpazy cha he reih he pahnothai taraw ei ta cheih thei khao v’ei. Thyudyu viapazy cha amâ chu tua leipa ta cheih thai khao leipa ei ta, pahnothai khao hra v’ei. Ama reih a thaipazy ama chyhtu ha bâpa vâta  reih leidia thei awpa chichhih kawpa duasu liata a y ha bâpa a châ.

Châhrasala a hawhtu hlâta a hneituhpa a zipazy ta a vaw hra ei ta, ama reih pabohsa ta palaiseihsana châh ama vaw pahno pathao haw. Târi  26 June 1997 tawh khata Canary Islands Sawhkhâ (the Parliament of the Canary Islands) ta Silbo Gomero reih cha siku liata a chu awpa ta Siku Curriculum liata ama vaw pahlao pathao. Kô 1999, July tawh chhochhi kha cha Silbo Gomero reih cha primary nata secondary level liata achu ngiathia awpa compulsory subject ta ama tao haw.

Siku liata amâ vaw chu rakha tawhta cha thyudyu viapazy Silbo Gomero reih a thaipa vaw hluh via lymâ bâ ei ta, cheih thai ei ta, ama vaw pahnothai (understand) tawh cha reih leidia thei awpa (endangered language) châ khao leipa ta, reih a laiseih lymâpa nata reih hmahsie chatlie kawpa, reih â bohpa a vaw châ haw. He dei châ vei; Post-Secondary student zy professional instructors ama châ theina taihta Silbo Gomero reih â chu pazao khohpa châta  “An Island School of Silbo Gomero” siku paduapa châ heih ta, Island School of Silbo Gomero student zy ta ama chi heihzy ama reih ama pachu theipa dei châ leipa ta, ama râh La Gomera tlytuhpa khichhai (tourist/visitor) zy chhao taih ama reih ama pachu thei haw. He heta thata ama reih pabohsa ta hmah a pasiesa chatlie.

Ei rei khoh chaipa cha reih nata châ he phopi â dua lymâ thei n’awpa liata a peimawh chaipa châ ta, khizaw liata chipho a lei hawpa ama tahpazy he ama reih nata châ a pahlei hapa chiphozy ama châ. Marapa chhaopi he chipho sianôpa nata chipho pitlohpa eima châ thei n’awpa ta ABEIPA eima Khazohpa ta Mongyu-râh London khihpi tawhta mongyuh nôvah (R.A. Lorrain nata a lahpinô) maniah vaw tuapa ta, âmo ta A AW Y B CH maniah taopa ei ta, châ eima vaw hnei haw. Khizaw liata phopi rônahpa hluhpi hry liata Khazohpa ta reih nata châ maniah pie ta, Mara phopi maniah a paduapa he a rônah ngaita kaw.

Mara phopi ta maniah paduatuhpa cha ABEIPA ta maniah a piepa Mara reih he a châ tahpa cha rei chanei byuh leipa ta eima pahno khai. Reih nata châ eima hneipa vâta Mara phopi â duah thei chyu chyupa châ pi ta, eima reih eima pahlei noh he Mara phopi eima leidia noh a châ aw. Chavâta eima chipho â boh lymâ thei n’awpa ta eima reih he eima pabohsa lymâ awpa a peimawh. Khazohpa ta reih nata châ maniah pie ta, Mara phopi maniah  padua ha ta, eima chipho â boh thei n’awpa ta eima reih pabohsa ta palaiseihsa awpa deikua a hneituh a zipa nâ nata kei maophaona a châ. Eima reih nata châ eima pahlei khiahta cha Khazohpa ta hmo paraona vâta khizaw liata chyhsapa a vaw taopa â ngiapachhipa (Athaona 6:6) hawhta reih miah pie ta, Mara phopi  miah a vaw paduapa he a ngiapachhi aw ta a palôh apasa ngai’ta kaw aw. Chavâta eima reih he pasô ta khâ eima pabohsa lymâ awpa a peimawh.

            Khazohpa ta Mara reih cheihtuh awpa ta Marapa ta maniah tao no ta, eima thyutlia lâhpa thokha Mara reih a thai khao leipa nata Mara reih hlâta reih hropa a cheih khoh viapazy eima y hôlô ha bâ. Ngiachhie âchhih ta, palôh pasa chhao âchhih ngaita kaw. He hawh penahzy he reih hropa sei liata a tâhpazy tah thei’pa ama châ. Eima thyutlia heihzy reih hropa sei liata â tâh haipazy pachha ta, Mara reih pathaisa awpa he Mara thyutlia, nâ nata keima ngiatlâh lia â pahnieh hmeiseih.

Reih lâchhâh ta a thaipazy (linguists) ta amâ laichadai dâh ta cha khizaw liata reih 6000-7000 rachhôh a ypa hawhta pahnopa châ ta, cha hryta reih 2500 rachhôh he cha a rei leipa (in the end of 21st century) liata a lei thei awpa hawhta ama reih. He châpaw ro haino heta India râh liata reih lei thei awpa reih 198 hry liata Mara reih chhao thlaita a lei thei awpa (Definitely endangered language) liata a y hai hra. Palôh pasa âchhih ngai’ta. Marareih a leidia thei awpa duasu liata a sohtuhpa he ahy pho hropa châ leipa ei ta, a hneituh azipa, nâ nata kei eima châ. Chavâta reih lei thei awpa duasu tawhta thao papua awpa ta nâ nata kei tlai he eima peimawh.

Eima nôpaw uthei viapazy ta maniah chho tyh ei ta, tanoh ta thyutliazy pi he mylâ eima râh chhihthatuh a vaw châ awpa nama châ maniah ama tah tyh. Mylâ ta eima râh chhihthatuh awpa nâ nata kei heta Mara reih thai leipa ta Mararâh he pho hropa reih ta chhihtha thlâh hâ mawh sih la, Marareih maniah pietuhpa nata mâty thisaih ta Mararâh vaw paduatuhpa chyhsa hmiatuapazy ama palôh pasa aw ta, eima râh chhao aboh thei leipa aw ta, hmia lâ pangai thei aw mapi.

Chavâta, mylâ khih a vaw deih awpa liata eima râh chhihthatuh a vaw châ awpa thyutlia  nâ nata keima heta eima râh nata phopi pabohsa thei n’awpa ta eima reih he pasôpa ta khâsia via lymâ sih la, buakhei sih la eima pabohsa lymâ awpa a châ.

La Gomera, Canary Island liata pahrâpa maluh thyno hleipa hmahta ama reih a lei daihmâpa ama pabohsa thei khiahta cha nochhi, notla nata khizaw râh hropa liata Mara saw a ypa eima zydua thyhrawh hlei pi heta Mara reih lei thei awpa duasu tawh heta khazia eima thao papua thei aw vei? Eima thao papua thei ngiathia awpa a châ. Marapa eima châ khiah cha eima châna zakhei leipa ta, eima châna hawhta y ta, eima reih cheichalo pabohsa ta cheih lymâ achhuah suh vy.