Kô 2018 Lyuva Khutla Chhivaw ta a lymâ daopa zydua Grace Children Home châta hlâ

Dt. 10.3.2018: Kô 2018 Lyuva Khutla cha târi 9.3.2018 (zâhnia) khata hnei khai hapa châ ta, he daihti lia heta Siaha Chhivaw châta atlypa College vaih laihsa, H. Priscilla chata Chhivaw a châna tawhta lymâ a daopa zydua cha Grace Children Home châta a hlâ khai.

Chhivaw he zâhnia Lyuva Khutla ahmâna a chhâna tai khata College vaih MTP chhihthatuhpazy Motor 2 ta hâpa ta, Chhihthatuhpa thokhazy ta College vaih MTP office liata thopi pahâh kawpa chhaota ama vaw ydy hra. College vaih MTP office lia heta alyna thopi dona ama hnei khai tawhta Chhivaw heta Grace Children Home tly awpa a khohpa vâta ama o chhao ngai tua leipa ta College vaih MTP chhihthatuhpazy chhaota Grace Children Home lia heta daihti chyupa ahmâpa châ ta, Laihsa H. Priscilla heta Chhivaw a châna tawhta lymâ a daopa Phusa zydua cha Grace Children Home châ heta phie a hlâ khai.

Lyuva Khutla 2018 Chhivaw nata Grace Children Home liata hawtipazy

Chhivaw heta a reina liata cha, "Lymâ ei dao raohpa heta Grace Children Home tly awpa ei palôh liata khâ a y. Hmialâ tawhta ei palôh liata y ha tyh ta, atanoh ei khona hlaopatloh thei awpa ta ei châpa he ei ly ngaita kaw" tahpa ta â lyna mothlih chhaota hmosai a pie. Chhivaw ta chyhsa hropazy châta byhnâ a châpa vâta â lyna mothlih chhaota hârapazy kyh a pachâna a palâsa theipa heta a hmotaopa he thâpha n'awpa taopa châ leipa ta, kyhpachâna hmeiseihpa ta a taozie a palâsa ngaita kaw.

Chhivaw a châ n'awpa daihti chhôh zydua liata College vaih MTP ta khâ deichhy lymâ awpa amâ chhuah hra.