Maraland ngiachhie nâ chhi ngâsâ dia maw!

- By Eunice Ngophazi Azyu

Atakô 2018 he Abeipa ta chakao awpa ta eina awna a châpa ta khâchâ ei pyhpa, PACHUTUHPA rai â ipa ta ei hriana tawhta a kô 6-na a vaw châ ha bâ hra. Chhôhkhanah zy ta cha Sawhkhâ rai pha viapa hria awpa ta na khokhei tyh ei ta, anodeikua ei y na su tawhta eima râh achuna ei pachâ na heta pachuna rai he a ngiahnao leithei lei awpa duahmo liata ei duapa ta ei pahno.

Nahkhaoh deita ta ei thei tyhpa, Private siku liata ei hria no tawhta atahmã taihta ei palôh pasa chai tyhna, keima mokhaoh tlaita ei hmô hapa cha, exam-na daihti liata pachutuhpa zy pi ta hawti athata kyhpachâ via rili pi ta, phahnai eimâ ngiah tyhna he a châ. A pei ngâsâ. 

"Teachers are the builders of nation" (pachutuhpa zy he râh paduatuhpa ama châ) tahpa châ tyh pi ta, atahmâ duasu liata deikua Pachutuhpa zy he râh paduatuhpa châ leipa ta; aparaotuhpa tlao eima châ ha khiah maw ei tah tyh...

Ngâchhihna, hriapasana nata adona pachupa hlâta, a naosia kawpa ta hlaotlohna eimâ pachu khiah maw..!?

Nôpaw biephôh tawhta eima pahnopa Pachutuhpa hmiatuapazy cha khihtlâh nata Awnanopa liata za kiah ei ta, ama bie ama nahthlie kaw tyh. 

B.A tlyma M.A tlyma chã hlei vei ei. Atahmâ ta thyutlianahzy pi deikua eima degree a sâh kaw hrasala; sôhna hnei khao ma pi.

Adona nata hriapasana eima hro liata hmô awpa a y leipa vâta a châ thei tlyma? Siku hawtinahzy chhaota maniah chi za thai khao vei ei. 

Atanoh thopi daoh ei pahãna liata ei kiah liata siku hawti a tyuh penawh bielôhawpa khata a pasia kaw. 

"Pachutuh penawh hmâchhâh Fair tlã leipa ei ta, ei mopâpa kha na vaw chhu tua ei sâ, ei tah khyh thláh hr'aw ei. 'Na siku hawtinah cha bao chi, keimo maniah na patu thei hra awpa châ tiarâh vei' tahpa ta ei chhy aw, chi ngâsâ vei nah.." tahpa zy reih ei ta, pei ei tah ngâsâ ha.

Atahmâta hawh lymã ta eima sie khiahta cha, Quality hleileipa, hmâhtlãh a châ hleileipa, kuraihria a ngiaroh thlâh ha tlôpa, Graduate eima pazai via lymâ aw tahna a châ..

Hriapasana a hlao hleileipa ta a chu papuapazy cha eima râh liata Pachutuhpa rai vaw hria heih ei ta, hriapasana nata adona y leipa ta hawti avaw chhihtha heih hr'aw ei ta, Office liata biechho a ru kawpa nata râh nôpaw (Politician) eima râh hlâta sasyh kyh a pachâ viapa deita a sapapua aw. 

Chavâta atahmâ ta châ eima chuna dâh he a phapa ta mohpasia ei sihla, hriapasana nata a dona hneina chôta hlaotloh'pa a chhuah suh vy.