China nata India chapawzy châta lahpinô chakâhna a tlô hai
The Washington Post thâtihbu chata India nata China râh liata chanô hlâta chapaw cha 70 million po ta ama kaw hluh via lymâ hapa vâta chapaw hluhpi ta lahpinô awpa hmô leipa ta, amã kaw phahla lymâ aw, a ta.
He hawhta lahpinô chakâhna a tlô awpa vâna heta *Yru lôhliena hripipa* (Epidemic of loneliness) a charei awpa hawhta reipatipa a châ. He heta patupakhina chhao a papôh tlamaw thei hra.
Li Shuizhou, Demographer of Xian Jiaotong University chata, chapaw thysâh hleita lahpinô awpa ama hmô lei awpa vâta ama yru kaw aw, tahpa ta, Chinese zawpi maluh 1.4 billion hry liata chapaw he 34 million ta hluh via ei ta, he he Poland nata California, USA maluh zie tlai ama châ. He hawhta chapaw ama hluh viana chhâpa he Communist Party ta *One Child Policy* hneipa ta kô 1979 tawhta 2015 taihta saw pakha ngâlâh hnei awpa ta Policy avaw siekheipa vâta a châ. He *One Child Policy* heta China râh Society athata a panano pâ ngâkawpa a châ.
India râh liata cha atliata liata maluhreina (Census) liata chapaw he chanô hlâta 37 million ta hluh via ei ta, India râh chhao chapaw zy ta lahpinô awpa ama pavia pathao haw.
Khizaw liata chyhsa hluhna râh mianopa China nata India chyhsa billion hlei yna liata chyhsa million 50 zy cha kô 25 ry lâ ama châ.
Christophe Guilmoto, French Demographer ta cha, "Kô 2050 liata cha chanô 100 hry liata chapaw 150-190 vahpa châta atlyh awpa ama y ha bá aw" a ta.
China liata thotlâh satliazy ta cha ama hro ai pathao ha bâ ei ta, "Life is boring and lonely" ama tah ngâthlâh ha bâpa ta ama reih.
He vâna heta ama Opa râhzy tawhta lahpinó awpa chanô lapangia hai ei ta, he hawhpa chanôzy he rai pha viapa - factory liata hria awpa ta bie a taihpa ta, China râh chhôh liata lahpinô ta hnei raruahna nata Human Trafficking athata a tlô ha bâ, ama ta.
He Ukraine, Russia, North Korea, Laos, Cambodia, Myanmar nata Vietnam tawhta chanô hluhpizy chata Chinese vahpa hnei awpa lapangiapa châ ei ta, he liana heta chanô hluhpi cha pachhapapuapa ama châ ha bâ.
