HERO SUPER CUP : ISL 2017/18 Champions Chennaiyin FC pahnietuhpa AIzawl FC
A eikha n'awpa ta ISL Club zy nata I-League club zy ataopasuana, *Hero Super Cup* Round of 16 akhaihna, zâhnia zâ tawhta Kalinga Stadium, Bhubaneswar, liata pathaopa liata Indian Super League champion haipa, Chennayin FC cha kô 2016/17 I-League champions, Aizawl FC ta ama pahnie!
2016/17 I-League champions Aizawl FC heta ISL champions Chennaiyin FC he daihti bitaipa liata 1-1 ta amâ pahniethai tawhta nata, daihti piechhipa liata 2-2 ta amâ pahniethai heih tawhta, 5-3 ta Penalty liata pahniepa ta, Hero Super Cup 2018 liata Quarterfinals a ngia tua chaipa ama châ haw!
Aizawl FC goal 2-pa zy he Romanian Midfielder Andrei Ionescu (22′ & 91′) ta a khôpazy châ ei ta; Brazilian Mailson Alves (89′) nata Dhanachandra Singh (115′) zy ta Chennayin FC cháta ama khô hra.
1st Half ama pathao patawnah ta Aizawl FC ta Chennai FC he tlahnaopâ lymâ ei ta. Daihti ama pathao tawhta minute 2-na liata Afghan Masih Saighani hmâpa ta Aizawl FC heta Chennaiyin FC kaohátuhpa ama pachhiparypâ ha. Aizawl FC heta 1st half hmâh pasu via lymâpa ta, anodeikua goal deikua khô thei to vei ei. 1st Half liana heta Chennaiyin FC defender-zy ama riethei kaw.
Minute 22-na châ ta, Aizawl FC ta ama hriapasana theilâpa lyupa ta, Chennaiyin FC kaochhôh liata ama pangia haw! Romanian Andrei Ionescu ta Chennaiyin FC defender zy amâ tymâ lichihta a zá ngiakheipa ta, giving the 2016/17 I-League champions cháta ISL Champions kawsao a papuah haw. He si kha ama phaoh tawhna heta Chennaiyin FC heta thapi phiapa ta achhypalie achhuahpa ta tei ei ta, châhrasala Aizawl FC defender zy siepakhô thei vei ei. 1st Half chhâ ta, Aizawl FC ta Chennaiyin FC cha 1-0 ta amá chadaisa chy.
2nd Half liata chhao Aizawl FC heta attacking game miah pamosa lymâ heih ei ta, anodeikua goal khôchhi thei vei ei. He hawhta a châ nota, Chennaiyin FC chhaota thapi phiapa ta ama si phaohpa a kaw pasu cheingei achhuahpa ta tei ei ta, Aizawl FC kaohâtuhpa Arup Debnath ama pa-ysa molo lei kaw. Chennaiyin FC heta vâhneichhih kawpa ta daihti chhâ chy, minute 89-na liata Brazilian Mailson Alves hmâpa ta a kaw pasu ei ta. Daihti bitaipa chhâ ta, 1-1 ta amâ pahniethai. Hero Super Cup he 'Knockout' akhaihpa a châpa vâta tlô viapa tlua cheingei abyuh.
'Extra-time' akhaih pazaopa châ ta, Romanian Andrei Ionescu pyly avaw luahpa ta, Aizawl FC châta hmia a sahna za khô heih ta, 2-1 a châ ha heih. Ionescu heta Chennaiyin FC defence a pana su hmô pasupa ta he a goal nona he khô ta. Extra-time 1st Half cha Aizawl FC ta 2-1 ta Chennayin FC amâ chadaisa heih chy. Extra-time 2nd Half, minute 115-na liata Chennaiyin FC ta Dhanachandra goal hmâpa ta amâ kaw pasu heih. Daihti chhâ ta, Penalty hmâpa ta tlô viapa tluana liata 5-3 ta Aizawl FC ama tlô hapa a châ.
Chennaiyin FC heta ama Mizo Striker, Jeje Lalpekhlua pakhaihsa vei ei.
MATCH STATS
Chennaiyin FC 2-2 Aizawl FC
(C: Mailson Alves 89′, Dhanachandra Singh 115′; A: Andrei Ionescu 22′,91′)
Penalty Shootout:
Chennaiyin FC: 3 (Bikramjit Singh, Dhanapal Ganesh, Dhanachandra Singh)
Aizawl FC: 5 (Andrei Ionescu, Leonce Zikahi Dodoz, Masih Saighani, Kimkima, M-Ka)
