Mara reih he aboh tlai sala tahpa na khoh tlai ma?

By - JB Khaisia, Siaha

He a chô biepipa liata hriahrihna palâsapa he na vaw hmô patawnah ta, chyhsa thokha palôhrupa liata la, hriahrihna hru kawpa hawhta a pachâpa eima hluh kaw na ta ei pangiasa. Anodeikua he châpaw (article) a rohtuhpa a chhuahna (palôhrupa) na pahno lei rawlawpa cha mao tiarâh va chi. Châpaw a rohtuhpa (article) khopa nata achhuahna he kheita tao sihla ma a hlaotloh thei aw? tahpa deikua nama pachâna vaw pakawh chyu ula tahpa ei khoh kawpa a châ.

            Tlai chuh! kô khazie, thla khazie chhôh nata ei khazie tlaima, Mara reih a boh n’awpa nata a laiseih lymâ n’awpa nata Mara reih dopa rodâh nata reidâh dopazy eima pakah tlai ta, Seminar nata TV. Tawhta, Talk Show  tawhta zy reih ha pi ta, thâtihbu (magazine ) liazy ta ei hluhpi tlai eima roh hôlô hapa châ ta, châhrasala pachâpa hawhta hlaotlohna y tu hlei vei tahpa a pahnotuhpa sai nama châpa ta ei pahno.

            He he mâh maw Mara zawpizy pi he rairuna chatôh ngâhthlâh lalih leipa nata chakâ papua ta hmotao awpa hoh-lalih tlâ leipa pi ta, chiehmokha (sâkha) ta liata reipa nata taopa ngâlah he pachâ hoh pi ta, he vâ mâ mawh hmo a châ n’awpa hawhta a châ thai leina chhâpa cha a châ mawh! He hawh hrata, eima râh chhihtuhpa Political Party nano nanopa chhihtuhpazy hra cha, Mara reih duasu a pachâpa/aveipa,  thapasatuhpa reipa y lalih leipa ei ta, Ruling nata opposition khiahta programme nata function liata Khichhailaipa (Chief guest ) hruana  liata cha vânohsahlâ chi kaw sai ei ta, a hlao lei awpa chhao ama chi ngaita kaw. Keima pahnona liata cha Election Campaign ama siena daihti liata râh nata ama bia chahlôna daihti liata Mara râh nata reih ama veina ama reipa hleikhôta cha, taopathina rai hmeiseihpa rai ama hriapa rai  ta pahno tlâ vana cha maw!

            Cha dei châ vei, Board of Literature, Members zy pi he, zawpi (Mara zawpi) zy ta Mara reih chôchâh lia cheingei  cha miah ngâ chai ei ta, maniah amâ pahniehna chaipa châ pi ta, keimo hra heih cha, chiehmokha liata ngâlâh liata dei reithai chhoh thai pi ta, chakâ papua awpa lâ cha hoh lalih tlâ heih hrapi vâ.

            Khâparai châ sala Mara reih a boh tlai sala, hmahsie via lymâ sala tahpa eima khoh hmeiseihpa a châ khiahta la, atahmâ ta eima sie dâh rakhapa liata eimâ chalih thlâh ha khiahta la pha thai thlyu vei tahpa eina pachâsa kaw cha maw! Suria râh liata aphawhpa 4-zy ta, “He hawhta eimâ chalih ngâthlâh ha khiah, pha aw vei, Abei chhôhkha zy lâta he thâtih lychhihpa he eima chho awpa na a châ;” ama tahpa hawhta, Keimo B.M.L member zy pi heta, Siaha town lia deita ta châ thlâh ha leipa ta nata BML thâtihbu - Hla nata bie – Magazine liata dei he châ leipa ta, eima chi pho Marapa zawpi zy lâta eima reih â boh n’awpa ta nata a laiseih via lymâ thei n’awpa ta MADC. liata Sawhkhâ a chaba haipazy ta Mara reih a boh via n’awpa nata laiseih ta hmahsiena lâ a pangai lymâ thei n’awpa ta, a pachhuahpanohna phapa nata hmahla n’awpa ta kô to Budget liata a chyh chaipa ta 20 lakhs chhâ he khô thei sala cha literature hmahsie n’awpa  châta hmahla chhao a nao via thlyu na ta hnabeiseih â chhih kaw.

            He hawhna hra heta Board of Mara Literature  heta, Mara râh chhôh khihpi viapa zy (eg. Tipâ, Zyhno, Saikao, Phurâ,  etc.) zy liata, BML. Sub-Headquartes padua lymâ sala, cha liata chhihtuhpazy liata pahniehpa ta athata hmahla awpa ta ryraona phapa tao thei sala, MADC heta Mara râh liata NGO (ie. MTP. MCHP. MSO) zy he a hrialâh awpa ta hrua sala, NGO zy ta hmia amâ sah  khiahta la, hlaotlohna he a nao chai na ta ei pangiasa kaw. He hawhna hra heta, ECM. Hqrs. Siaha  nata CCIM. Hqrs. Saikao zy chhao heta, KNP. KTP. KPP & KHP zy hmâpa ta hmahla hra ei sala cha Mara reih he â boh pha kaw nata ei pangiasa kaw. He hawh pyly hra heta, achuna/education lâ chhao Middle siku nata Primary siku zy liana heta Mara reih ta achu hluh thei viapa châ sala, pachutuhpazy chhao heta siku hawtizy liata Mara reih he cheikhei hluh via lymâ theipa châ sala kho â chhih ngaita kaw. Education Department heta Mara râh Middle Siku nata Primary siku zy  liata Mara reih hmâ chyh viana sikuzy chhao he ngia via sala, (ie Tipâ –V, Amôhbyu Zero, Tipi Ferry, Kaochao “E’)  zy lia he cha Mara rei pachutuhpa khihsa thei pâ awpazy sopa châ sala, he hawhta hmahlana eima hnei khiahta cha Mara reih he hmahsiena lâ pangai aw ta, a laiseih patoh lymâ na ta pangiasa â chhih.

            Chavâta eima reih Mara reih he a boh lymâ sala, hmahsie tlai sala tahpa eima kho hmeiseih khiahta la, chyhsapa ta eima tao theipa rakhapa he cha eima tao tua laih hrapa he a byuh. A hlaotlohna deikua cha, Abeipa Khazohpa tawhta eima mokhâh awpa a phapa ta ei pahno. Chavâta tei pachhi tua rai suh u.