FIFA Wold Cup 2018 : Player mo pha awpa 5 zy
FIFA World Cup 2018 cha liahsa â hnia ha bâ ta, a ziza chhao â sãh pathao kaw bâ. Khizaw liata Player pha chaipazy nata Club vâta a pachhaihpazy lôh miakha ama phaohna awpa, FIFA World Cup 2018 cha June 14 khita a tlôtuhpa, Russia ta Saudi Arabia hmiachhypa ta pathaopa a châ ha bâ aw. Atakô World Cup liata Player mo a la chai awpazy sai heih tua suh vy.
Lionel Messi (Argentina)
World Cup akhaihna zie: 3
Lionel Messi, a hmiachhypazy châta vai a ruzie nata a ball chahriachahrâpa mo a phazie cha hmô tyh pi ta, Russia World Cup liana liana chhao heta amâ khaihlâhpazy châta cha pakhâ a ru kaw heih aw. Kô 2014 World Cup liana khata Argentina a pahniehna chaipa châpa ta, Final liata deikua Messi thaina nata theina ngâlâh heta avaw daihtiah vei. Váduachhih kawpa ta daihti piechhipa liata Germany kha ams tlô hapa a châ. Atakô hleikhô he cha Messi he World Cuo vaw y heih awpa liata a hmi hmô hnabeiseih a chhih khao leipa ta, chavâta thapi phia via heih ta, mo a pha via cheingei heih aw.
Club football liata Season kha liata goal 50-hlei a khô theipa he, kó 31 châ ha bâ hra aw ta, atakô he a châta daihti hnôh chaipa a châ ha bâ aw.
Barcelona châta á pie phana zydua deikua râh châta âkhaihna liata hlaotlohkhei thei mãh leipa ta. Kô 2014 World Cup Final liata Argentina tlôkhei thei leipa ta, kô 2015 nata 2016 Copa America final liata chhao ama vâdua heih hra.
Reipachhienazy ta Messi he chado lei kaw ei ta, buakha cha International football â pahásai hmâ. Atakô World Cup liana chhao heta Argentina apahniehna châ heih aw ta, a viasanah amâ pie pha kaw hr'awpa chhao â ngiah hra aw.
Cristiano Ronaldo (Portugal)
World Cup akhaihnazie : 3
Lionel Messi nahta khâ ama pakhopâ tyhpa, Cristiano Ronaldo he a kô nata khihzy vâta chatlie chakoh khao hra vei sala, â pie pasu nohta la ahy pakhâ thei awpa châ heih aw vei. Real Madrid châta goal khô hluh kawpa heta a rãh Portugal châta World Cup liata goal 3 ngâlâh a khô chy.
Kô 34-ta uhtheipa Ronaldo he goal khô theipa nata mohropazy khô awpa pie thaipa tahpa ta khizaw ta pahno ta. A chatlie-chakohna, a ball thaina nata hnôhsy beih leina palôh a hneipa vâna heta chyhsa pasâhsa a hlao kawpa a châ.
Ronaldo he alochono daihti liata râh châta nyungiapa chalopa reikhi hnei hra leipa ta, kô 2016 European Championship nyungiapa a chalopa kha a châ chy. A locho viana daihti a khô tawhta chhao, Ballon d'Or ei 5 tlai avaw dao hapa heta UEFA Champions League liata goal 15 khôpa ta, a Club Real Madrid châta nyungiapa a chalo heih.
Neymar (Brazil)
World Cup akhaihnazie : 1
Ball hriahrâ thai kawpa nata sasyh angâna a hnei kawpa Neymar he Brazil ta World Cup nyungiapa a ei 6-na chalo achhuahpa ta ama teina liata a peimawh chaipa a chã cheingei aw. Messi liata Argentina amâ pahniehpa hawhta, Neymar apielyuzie liata Brazil chhao he â pahnieh kaw aw. Paris Saint-Germain forward heta râh châta goal 54 khô ha ta, râh châta goal khô hluhna lâta 3-na Romario cha goal khata a kho leipa ta, Brazil châta goal khô hluhna lâta a chô lâta a ypazy cha Pele nata Ronaldo zy ama chã.
Kô 2014 World Cup liata Neymar ta hmah a phaoh tawhta Germany ta 7-1 po ta semi-final liata ama taochhiepa khata Neymar peimawhzie a palâsa kaw. Brazil he khahlâ viano hawhta World Cup liata zawpi ta ama ngâ tyhpa châ khao hra vei sala, Neymar apielyuzie ta ama hmialâ daihti chhichâna liata yzie a hnei kaw aw.
Khizaw liata Player mâru chaipa he atahmâ nota khizaw footballer pha chaipa hrytapa a châ tahpa deikua sia ta. Atakô February tawhna khata PSG ta league akhaihna liata Marseille ama pahniena akhaihna liata hmah a phaohpa vâta hmahphaohpa ta a pahâ lymâ ta, avaw kua heihna akhaihna liata Brazil ta Croatia cha 2-0 ta friendly match, Anfield liata ama pahniepâ.
Eden Hazard (Belgium)
World Cup akhaihnazie : 1
Kô 27-pa, Eden Hazard heta France nata England liata League nyungiapa chalo rairie ha ta, râh châta ei 82 â khaih hmâ ha hra. Ano he atakô World Cup liata Belgium ziza pha kawna chhâpa pakha a châ.
"Belgium golden generation" ama tahpa hryta Hazard he a chatlie-chakohpa vâta a lâlua patlua ta. A ball hriahrâ thaina nata ama hmiachhypazy dahdiena a hmô thaina vâna heta, he Chelsea winger heta Red Devils ama tahpa, Belgium duasu a paphasa kaw thei aw. Defender zy châta pakhâ ru ta. A viasanah châta ball rairuah a thai kaw nota, goal chhao a khô thei pyly hra.
Hazard nata Kevin de Bruyne ta ama lochono hmâh hai ei ta, kô 2014 World Cup liata Knockout stage tawhta a tla hapa Belgium he, Russia liata cha amâ nano kaw bâ thei.
Harry Kane (England)
World Cup akhaihnazie : 0
Premier League liata striker chichhih chaipa ama tahpa, Harry Kane, kô 24-deita uhtheipa heta kô 2017/2018 chhôhta ataopasuana nano nanopa liata goal 41 a khô, tahpa deita heta hmahta defender thokha ama liathi a paniesa ngâkaw thei. Atakô World Cup liata England hmiatôhtuh awpa he nota châ aw vei.
Kane he "Three Lions"-zy ta ama mokhâh chaipa châ aw ta. Gareth Southgate mohôhpa, World Cup maihta ziza a hnei chai tyhpa England heta Harry Kane he thlah amâ palôhna kaw awpa châ ta. Atakô chhochhi England squad he hawti kaw sai ei ta, Kane theina liata amâ pahnieh kaw aw.
Marcus Rashford nata Dele Alli zy he England team liata mo a pha chaipa hrytapa ama châ nota, Kane he ama Player peimawh chaipa a châ. Kô 52 chhôh England ta World Cup nyungiapa chalo awpa ta khâ ama vaw hâ tyhpa cha, Harry Kane ngiatlâh liata â pahnieh ha bâ.
