Asian Games 2018 liata NT Biakkima : Boxing khizaw liata a kaw laiseih laihna dâh
Dusmatov a pahnie hlâ via khata Boxing khizaw liata pahnotuhpa (India ráh pahlypa ta) y tu mâh leipa ei ta. President's Cup quarter-final bout liata pahniena a to tawhta deikua boxing khizaw liata awhsi khaih pathaopa a kaw châ ha bâ. Kô 22-ta uhtheipa heta Boxing khizaw liata mopahreihpa, kô 2016 Rio Olympic Games lightflyweight Gold Medallist nata World No.1 Dusmatov a pahniepa vâna heta, Boxing khizaw liata hniehnôh phie thai khao lei awpa a siesai ha bâ.
President's Cup liana heta Lalbiakkima heta Kg 49 category liats 4-1 ta Uzbek boxer phapa he pahnie ta. Biakkima ta a pahniepa Dusmatov heta Rio Olympic Games liana khata Colombia boxer Yuberjen Martinez pahniepa ta Gold vaw la ta, zâkô World Championship liana khata Cuban boxer Joahnys Argilagos pahnie leipa ta Silver avaw la heih. He hawhta a châ nona heta Lalbiakkima deikua heta kô 2017 liata Senior National Boxing, Visakhapatnam liana khata Bronze avaw la.
Lalbiakkima heta Dusmatov a hmiachhy awpa chy heta athata achhuahnoh ta, Dusmatov âvaw chô ha chiehna video zydua avaw moh chhielie khai ha.
"Dusmatov a chôna video zydua moh khai na ta, ei pahniepa he kei châta cha hmo sôh patluapa a châ" tahpa ta kô 22-ta uhtheipa Biakkima heta Times of India ta ama hiahrihna ã chhy.
LAISEIHNA
Lalbiakkima he Siaha liata a pihpa châ ta. Chhôhkha nawh kawpa tah thei awpa liata vaw laiseihpa ta, a nô heta New Siaha Bazaar liata Ngasa zuahpa ta chhôhkha chyh ta, hro phasa kawpa tawhta laiseihpa la châ taraw hra vei. Manipur ta MC Mary Kom zy hawhpa papuapa ta Boxing ama pasâhsapa hawhta Mizoram liata cha Boxing pasâhsatuhpa he hluh muarua leipa ei ta, Mizoram liata Semi Professional League (LPS Profigt zy hawhpa) liata puapa ta, boxing khitlyna lâthlôh â kaw chhih lymâ, tahpa ta ESPN ta ama palása.
BOXING KHIZAW KHITLYNA
Kô 2011 khata Mizoram Regional Sports Authority Centre a pazao ta, he liana heta Hostel liata a ypâ haw. Kô 2015 Senior Nationals liata â pielyuzie chata Navy Boxing coach zy moh la kaw ta, âmo reikheina ta Navy Nagar, Colaba, Mumbai â pazao hapa a chã.
He liana heta Navy head coach nata 2010 Commonwealth Games gold medallist Suranjoy Singh ta vaw hmô pasupa ta, 'Little Tyson', tahpa ta a aw tyhpa Biakkima cháta cha Boxing khizaw liata a 'Paw' hawh tlupo avaw châ hapa a chã.
"Boxer thai chaipa la châ taraw vei, anodeikua Boxer tiama chaipa la a châ aw. Tiamana he keima châta cha a peimawh chai. Thaina (skill) la na pachu thei aw; tiamana deikua boxer zy achhuahna a châ" tahpa ta Suranjoy heta Biakkima â tyh tuana thâtih cha ESPN a chho.
Lalbiakkima heta Commonwealth Games, Gold Coast liata a hlao thei awpa tluana liata Amit Panghal cha India Open semi-finals, New Delhi liata Hmypi thlâpâ liata hneipa liana khata vaw pahnie leipa ta. Light flyweight category he cha India râh liata Boxing category liata chatôh rairu chaipa châ ta, Shyam Kumar Kakara nata Himanshu Sharma moh apahripaziahpa hry liata Biakkima moh a za ypa chhao he a rônah kaw bâ.
Olympic Champion Dusmatov a pahnie tawhta deikua nata President's Cup liata Bronze Medal a la tawhta deikua, atakô Asian Games, Thlazoh nata Thlarâh chhóhta Indonesia liata hnei awpa liata hnei awpa liata deikua India vyuhpa ta Siaha satlia Biakkima he hmô aw pi ta, he liata á pielyuzie heta India Boxing khizaw liata Awhsi khaihpatluapa lâta a papua thei nata thei lei a pasia ha bâ aw.
Source: First post
Image credit: Twitter/@BFI_official
