FIFA World Cup bielôhawhpa : Player alâluahpa Red Card avaw hmô hapazy
Tári 14, Chhiepa 2018 tawhta Russia liata akhaih pathao bâ awpa, FIFA World Cup cha raopachhuapa ta khizaw ta a mokhâh thlâh ha bâ. Kheihawhpa rãh ma nyungiapa a dikhei aw ei? Player ahyzy ma a pie pha heih aw ei? tahpa pachãpa ta khizaw ta a khipâh a chahnao ngâkaw nota, World Cup avaw y hapa liata Player alâluahpa, avaw piechhei kaw hrapazy nata fans zy hie pahâh kawtuhpazy eima palâsa heih tua.
ZIDANE TA A LUH TA MARCO MATERRAZI A SU PAPAO
2006 FIFA World Cup Final châ ta, 1998 liata France champion-kheituhpa, Zinedine Zidane cha akhaih pha kaw heih ta, âpielyuzie chhao â ngia kaw heih. France he amâ pielyuzie mopa ta 2006 World Cup chalo awpa chhao ama lyu kaw. Châhrasala, hmo khochhih lei kawpa tlôpa ta, khizaw football fans zy pahlawtuhpa eima hmô haw!
French captain Zinedine Zidane nata Italy player Marco Materazzi zy cha reikah a ngia leipa ta ma amâ zotla ha ma? Zidane heta Materrazi he a luhta tapôh a su thlâh haw!
Ama goal â kho ta, penalty hmâpa ta tlô viapa tlua awpa ama lyu ha bâ. French midfielder he Italian defender heta reikah pha leipa ta ma a diah ha ma, Zidane heta kei ngaipa ta, a chachôhna liata tapôh a luhta kei su ta, Materrazi he tlyliah chô liata a diepâ ha ta, Zidane cha Red Card hmôpa ta papuapa châ ta, Italy he penalty liata tlôpâ ei ta, World Cup nyungiapa ama chalo hapa a châ.
SUAREZ TA CHYHSA A SIE
Uruguay Striker Luis Suarez cha Italian defender a hâ ta siepa ta baipa a châ! Suarez heta Italian defender Giorgio Chielleni cha kô 2014 World Cup liata a ngiatlâh liata siepa ta, thla palih chhôh football akhaih thei lei awpa ta hriepa a châpâ ha hra.
DAVID BECKHAM RED CARD
Kô 1998 World Cup châ ta, England nata Argentina zy cha 2-2 rairie ta amâ pahniethai chy. England zawpi mokhâhpa, David Beckham cha palôh hnei lei kawpa ta a pielyupa ta, Argentina player, Diego Simeone nahta amâ chakhopâpa cha Simeone heta nâ ta. Beckham he pao ta, tlyliah liata â thy thlâh hapa cha a phei ta Simeone cha kaw khai chhei ta, Red Card a hmô haw!
Buana puapâ ta!
Argentina heta penalty liata 4-2 pahniena topa ta, David Beckham cha England tlô leina chhâ chaipa hawhta baipa a châpâ hapa a châ.
