FIFA WORLD CUP 2018 : England Vs Tunisia saichhieliena (11:30PM/IST)
Kô 52 chhôh cha hnabeiseih â sâh chaipa hneipa ta FIFA World Cup vaw hmiachhy tyh ei ta; châhrasala kuruapa ta ama vaw kua ha heih tyh.
Kô 1966 liata Jules Rimet Trophy ama chalo tawhta, FIFA World Cup liata ama kaw tlô pasâh heih chaina daihti cha kô 1990 Italy World Cup Semi finals liata Germany ta Penalty hmâpa ta tlô viapa tluana liata ama pahniepa kha châ ta. He tawh rakha heta cha Semi Finals lia ama hmi rai a lâ pazao khao vei.
Atakô chhao he hnabeiseihna hryta ziza ama hnei kaw heih. Gareth Southgate mohôhna ry liata kô 2016 tawhta y pathao ei ta, Southgate bietluna maih amâ pyh lymâ chy hra.
Senior player Joe Hart nata Jack Wilshere pahlaopa châ leipa ei ta, Wayne Rooney hra ta kô 2017 khata rãh cháta a khaih khao lei awpa ta bietluna vaw tao ha heih hra ta.
Russia liana chhao heta, England he ama yna Group liata amâ ngâcho via awpa, Tunisia nata Panama ama pahnie thei khiahta cha Group stage khawna liata ama hmiachhy awpa Belgium ama pahnie leipa chhaota, Round of 16 cha amâ ngia thei ngyu.
Harry Kane ta hmiatôh aw ta, EPL liata Season pha kawpa a hmâhpa Raheem Sterling chhao hnabeiseih a chhih kaw ta, England heta World Cup khitlyna ama pathaona noh liata Tunisia pahniepa ta, Point 3 sôh kawpa ta hmô amâ chhuah kaw aw.
Eric Dier nata Jordan Henderson zy ta Dele Alli cha central midfield liata deichhy aw ei ta, Southgate ta a kho chaipa, Defender 3 paduasapa chhao eima hmô thei ngyu aw. Kyle Walker ta Defence pa-ipacha ta diahsua a ichapa a padua thei ma?, Trent Alexander-Arnold cha Right wing-back liata a duah ngyu ta, Danny Rose cha hiakha lâ â duah thei hra.
Tunisia fans-nah heih hra ta, “Khaziri chhaopamei hawhta ia hai ta, nama diahsua zy chipa ta amâ chalyu (Khazri’s on fire, your defence is terrified),” tahpa ta Moscow khihpi Tverskaya rachhôh liata chyhusana hlapi pathluah ngâkaw ei ta. Tunisia forward Wahbi Khazri hla ama phihnâpa he, kô 2016 Euro liata Wigan Athletic nata Northern Ireland forward Will Grigg châta fans zy ta hlapi ama vaw pathluah chiehpa kha a châ.
Atazâ ta England ta Volgograd liata a hmiachhy awpa Tunisia heta atakô he World Cup ei 5 amâ khaihna châ ta. Ama fans-nah pyury pha ta, ama palopasah kaw aw.
He hawhta a châ nona heta, âmo lyu leipa England fans deikua ama pyury dia kaw chy ta, England flag chhao hmô awpa a chyh kaw chy. England fans he cha peihriana nahta khâ a pazipa ama châpa vâta amâ chadopa chhao a châ thei hra.
Tunisia he amâ khaihna liata ball rairuahna rai a hriatuhps Youssef Msakni cha hmah a phaohpa vâta a khaih thei leipa aw ta, Saif-Eddine Khaoui ta a duasu â thla thei ma?.
Fans zy apahniehna Rennes forward Khazri he Sunderland liata a piepha hra vei sala, France liata deikua ramâ râh hmâh ta, á pie pha chaimã.
Tunisia heta kô 1978 World Cup tawhta World Cup akhaihna liata pahniena to mâh leipa ei ta. England heta ama taodâh tyhpa hawhta diathlâ kawpa ta World Cup ama pathao heih tlai khiahta la, kô 2004 African Champion Tunisia heta ama pahlaw tlamaw aw tahpa chi â chhih kaw.
