Article : EIMA SIETANÔZY AMÂ BOH MA?
 |
| By Daochai Mara Bydi Villa |
Atahmâ nota eima unawhpa Mizo nawhzy ta Social media liata ama buakhei chaipa cha July 5, 2018 my ta Delhi khihpi liata Overdose vàta a pahâ hapa thâtih kha a châ na ta pangiasa â chhih.
He laihsa nô he Movyhpa (Negro) viasa zy nahta Party na liata apalypa-uasa ei ta, my dawh 1 am rachhôhta Overdose vâta â pahâ hapa a châ.
He liata Delhi Mizo Welfare zy nata Uhthei viapazy ta ama rei chaipa cha ama chanô nawh he Chi hro Viahpa (Kalapa), Negro ahropazy nahta hmaohkha ta a pahlao tu ei ta, chipho moh pachhiena taihta a ypa chanô hluhpi chhao ama y, tahpa ama reih hôlô hra.
Chanô thokha rai hmeiseihpa hria leipa ta he hawhpa tawhta tâkâ sôhthih a tluapa thokha ama y hôlôpa thâtihzy ama uthei nawh tawhta theipa a châ.
He thâtih tawh heta keima chhao athata vaw pachâpasia na ta, keimo Marasawzy chhao pi he khizaw râh khihpi kao nano nanopa liata apahrâ ngâhaipa hluhpi vaw y bâ hra pi ta, kheitama he liana heta eima Sietanò zy he amâ tyudua ngâlâh tahpa he pachâna athata eina pie.
Thokha zy cha chhôhkha sanawh nata chiheihpazy y leina liata apahrâpa chhao ama y tahpazy vaw thei na ta, ei thlah na lôh thei khao vei.
Nôpaw thokhazy ta ama Sawnahzy raihria ngâhaipa a pahnoleipa chhao eima hluh ngâsâ.
A chô liata ei vaw palâsa hapa thâtih tawhna khita keimo Marasawzy chhao pi ta he hawhpa he a tlô theipa eima châ ha bâ hra.
Chavâta ei chiheihpa Mara Chanô zydua hnohta ahawna ei cha hnei kho chaipa ei cha - ngiachhiepa ta na chiheihzy hnohta na daihti zy khâ avaw hmâh hluh via la, nôpaw nata chhôhkhazy ta ama cha pahnokhei leipa hmo rai rai he rie vaw tao bei kha y.
Chihropa chapaw thokha he parih hawhta a sopa hluhpi y ei ta, na chipho nata chhôhkha moh pachhie khohna taihta na chô liata hmotao a chhuahpa ama y tahpa he vaw my bei kha y.
Achhâna liata cha, Nôpaw zy chhao ta Saw nahzy atyuduana nata ama hmo hria tyhpazy he eima mohpasiakhei via lymâ awpa a peimawh hmeiseih.
Chatawhta la, Mara Chapaw zy chhao pi ta eima Sietanô zy he chihropa tawhta amâ boh thei n'awpa ta eima deichhy lymâ awpa he abyuh hmeiseih.
Eima sietanôzy châta abôchha tlâhpa Rilâhpa châ awpa he achhuah chyu ei suh vy.
"EiMA SIETANÔZY AMÂ BOH MA" tahpa he eima pachâpasia hmeiseih awpa ângiah ngaita kaw!
