Thailand Lôkhaoh liata â tâhpa hawtipa 10 pachhapapuapa ama châ haw
Thailand Tham Luang lôkhaoh liata â tâh haipazy pachhapapuana rai noh 3-na liata hawti 10 lapapuapa ama chã haw. Ama Coach deikua atazâ lôkhaoh liata â rie heih tua awpa â ngiah thei ngyu. Atanohlâ heta hawtipa zydua lapapua aw ei ta, ama coach deikua mylâ ama lapapua awpa hawhta reipa a châ.
Atahmâ duasu liata chapaw hawtipa 4 nata ama Coach lapapuapa chã mâh leipa ei ta, zâhnia hriatua noh khata chapaw hawti 4 zy cha lapapua heihpa châ ei ta, ama zydua ta 8 ama lapapua ha.
Pachhapapuatuhpazy chata lôkhaoh liata ti a opa a hluh via lymâ hlâta, chi â chhihpa chhao pachâ khao leipa ta rai he pazao heih awpa ta ama pathlu ha heih.
He hawtipazy he târi 23, Chhiepa 2018-pa khata ama Coach sahlaota Football amâ practice khai tawhta lôkhaoh he a ngia ei ta. Saopi daihti a châpa vâta lôkhaoh he angiapazy amâ boh via thei nawpa ta a ngia theina rakha bitai ei ta; châhrasala he football team zy heta he khô lâ he a ngiapa ta, ti ta a laikhâh hapa vã ei ta ama pua thei khao leipa a chã.
Ahyzy e ama châ?
Chanin Vibulrungruang, 11 (Nickname: Titan) - Kô 7 a châ no tawhta Football ã khaih ha
Panumas Sangdee, 13 (Nickname: Mig), a nô nata paw hnohta châ a paphaopa liata : "Navy Seals zy ta eina mohôh pha kaw ei" a ta.
Duganpet Promtep, 13 (Nickname: Dom) - Wild Boars Football team Captain, Thai Professional Football club zy ta lapangia achhuahpa ta ama mo haipa
Somepong Jaiwong, 13 (nickname: Pong) - Thai national team châta akhaih awpa achhuahna a hneipa
Mongkol Booneiam, 13 (nickname: Mark) - Ama pachutuhpazy ta pachutuhpa za thai kawpa nata reingiah kawpa
Nattawut Takamrong, 14 (nickname: Tern) - A chhôhkhazy hnohta 'Na vaw pachâ tu khu vei' a ta
Ekarat Wongsukchan, 14 (nickname: Bew) - Ama pachhapapua khiahta la a nô cha a daoh liata a bao bâ aw, tahpa bie â taih.
Adul Sam-on, 14 - North Thailand-pôhpalôhpa Volleyball ataopasuana liata 2-na py liata a hlaopa
Prajak Sutham, 15 (nickname: Note) - A chhôhkhazy ta chapaw hawti sovâh kawpa ama ta
Pipat Pho, 15 (nickname: Nick) - A chhôhkhazy hnohta pachhapapuapa a châ tita Barbecue paniesa awpa ta ã haw
Pornchai Kamluang, 16 (nickname: Tee) - A chhôhkhazy hnohta 'Nama pachârôh khu vy, ei thlahzoh vei la y' a ta
Peerapat Sompiangjai, 17 (nickname: Night) - Ama lei noh kha a pihna noh châ ta, a chhôhkhazy ta Birthday cake chhaota ama mokhãh thlâh ha
Assistant coach Ekapol Chantawong (nickname Ake), 25 - Hawtipazy rairuna atyhna chhâpa cha ano a chã, tahpa ta ama nôpawzy hnohta ngiathai ahawna châ paphaopa roh ta, châhrasala, ano thai leipa châ vei, tahpa ta a hna ama pangãh.
