Article : Foreign lâta a siepazy he ngiapãna a hnei viapa châ khiah maw!

By K.Vabeihmôsa

Tao hualuana or Palòh pasina or reingiana or pasa taona or tiamana-maoh oh theina or achhuahpa liata thatlòna ahneipa  or achhuahna liata ngiapàna hro tlòkhuh ahneipa nata kyhpachàna biepa ahneipa.....etc chyhsa nahzy he ahyzy kha vachà leipa ei ta, atanoh ta foreign liata maniah apaihsai hapenah zy he chà thlàh ha khia ei maw, tahpa pachàna maniah apahneisa. Achhàpa cha àmo he ;

1) Khazohpa liata apahnihpa ta amà chhuahna pi apatlohsa thei tuhpa chyhsazy ama chà.

2) Khazohpa liata amà Ngiapàna apahnih thei tuhpa nata ama chàna tlòkhuh ahlàkhai thei tuhpazy ama chà.

3) Àmo raihriana theilàpa tawhta chhòhkha-sanawh, viasa-vaih-khihtlàh-ràh nata chieleipa nata baongiahpazy abao lymàpa ama chà.

Cha pahno theina chhàpa cha -Marasaw foreign atlòpenahzy  heta foreign liata ama y tawhta ama hro pitloh ta amà nano thei kaw. Chavàta sapa nata thlahpa là kyh liata amopàtlàh chàpa Marasawzy ( ngiapàtuhpazy) chà hmeiseih ei ta, Sapa nata thlahpa mokhao là tawh mopa ta pasàhsa tlàhpa nata reithai tlàh chàpa

 ngiapàtuhpazy ama vaw chà hmeiseih.

Pakhopakhàhna:

1)Mararàh liata thokhazypi cha keimo athopàna awpa nata hmiamo làkhà a y viapazy deita bao khoh pi ta, school kiana awpa pie khoh pi ta, phusàzy pie khoh-pahmà khoh pi ta, achhohia khoh pi ta, àmo deikua cha cha hawhta ama palóhphao chà leipa ta ama ochhóh-sanawh-viasa-khihtlàh  liata baongiah hmeiseihpazy liata abaokhà theituhpa-adychhy thei tuhpa chyhsa quality ahneipazy tlao ama vaw chà. 

2)Àmo he ochhóh-sanawh-rinò , viasa-khihtlàh zy abaokhà awpa ta foreign asiepa chà hlei taraw vei ei, a keimopa hawhta sawkhà raih ahria hrapa, nietluana chàta phusà ahlao hrapa, chhòhkha apadua hrapa chyhsa  la ama chà hra taraw. 

Ama palóhphao-ama hrozie, ama chakaona dàh he ngiapàna kyh liata amòtlàh chàpa nata achutlàh chàpa chyhsa ama chàpa hleikho ta he hawhpa palóhphao pitloh viapa ta hnei hra awpa heta maniah ama pahao hmeiseih.