Delhi liata chhôhkha manôh 11 thi chiehpa ta hmôpa ama châ
India râh khihpi Delhi liata Burari
District liata chhôhkha manôh 11-zy cha a thi chiehpa ta hmôpa châ ei ta, ama hryta
10-zy he a pa-aosaopa ta hmôpa ama châ.
Zâhnia ta he hmo rarô y kawpa a
tlôna su liana heta chhôhkha manôh 11 hryta ama nôhrâ chaipa, kô 70 rachhôhpa
cha siphiah liata a ri hmôpa châ ta, mohropa 10-zy cha Ceiling liata a
pathliahpa ta pa-aosao chiehpa ta hmôpa châ ei ta. A thipa zy he ama zydua rô
ta ama mo khupa nata ama pakah pamaipa ta hmôpa ama châ hleikhôta, ama hnôhkyh
lâta ama ku he chahrypa a châ hra.
Khâpa vâta he hawhta chhôhkha
duata hrona a la thlâh hapa ma a châ, tahpa cha Police-zy heta pahno mâh leipa
ei ta, lianycheina chhao a châ thei pyly hra ama ta. He hleikhôna heta
Police-zy chata he chhôhkhazy heta taozie anano kawpa, zyhna nahta ahniahnipa
hnei ei ta, he he ama chhôhkha duata hrona amâ lana chhâpa a châ theina ta ama
pangiasana zie chhao ama reih pyly hra. Police-zy ta he thina nahta ahniahnipa
ta châ ama papuapa liata, thina a tlôna O liana heta ku ta ropa châ hmô ei ta,
he liana heta zyhna ananopa taozie azina lâchhâh ama hmô. He thâtih
pachhuahpanoh hai nona heta thâtih siapa pahnopa châ mâh vei.
He chhôhkhanah ri he ama daoh
liata sâhpati chalei achhuahpa paw pakha ta a hmôpa a châ. He chhôhkhanah heta
ama O ry liata daoh sâno ama hnei tahpa palâsapa a châ hra.
