Article : Awnanopa Taopathina - By Rev Dr Laiu Fachhai
Khazohpa hlâta keimo kyh a pachâ via ha sih la, Awnanopa pha n’awpa hlâta keimo duahmo a boh n’awpa nata pha n’awpa eima pachâ via ha khiata cha taopathina tlô thei aw vei. Taopathina a dyuhtuhpa lâta eima pua ha aw.
A yzie cha, eimâ ngiapâna eimâ taopathi tlôh leipa khiata cha, siezie thiehpa nata taozie thiehpa pha ngaitapazy ta yzie hnei tu aw vei. Savo thitheih chypa (parohpa) liata kresawti thiehpa ryhpa hawh châ aw ta, a theilâpa (result) awpa cha rei byuh leipa ta eima pahno khai (Maka 2:22).
Chavâta Awnanopa taopathina (reformation) tlô sala hmasiena thiehpa (change) a y thei n’awpa ta, siezie nata taozie pananopa dei châ leipa ta, maohphaona a chabatuhpa chyhsazy eimâ ngiapana nata khizaw saizie (worldview) thla awpa a byuh pâ hra; he he tlao a byuh via hri thei. Cha hawhta eimâ ngiapana nata khizaw saizie eima thla thlei leipa khiata cha, a chyhsa panano leipa ta cha taopathina nata hmasiena thiehpa y thai aw vei.
Eima Awnanopa duahmo moh na ta, kei SES chaipa he eima Awnanopa hmasiena a pakhâtuhpa châ tlamaw lah na, tahpa pachâ nata thlah thata ei chhâ tyh. Senior Executive Secretary term ei pachhâ n’awpa kô kha hleita y bâ ta, kô 3 terim ei patlô tawhta cha einâ thla awpa ei he a daihti a châ kawpa ta ei pahno. Chataleipa ta la eima Awnanopa hmah pasiesa leipa ta ei y tlamaw aw.
Chavata ei term vaw chhâ sala, term heihpa liata pahâna thiehpa, thatlôna thiehpa, hmiasai thiehpa, taozie thiehpa nata asaomâna thiehpa a hneipa chhituh thiehpazy ta eima Awnanopa he maniah chhihtha aw ei ta, keima daihti notapa hlâta hmah thata ama pasiesa via awpa hmô awpa a ngiahtiah va na. Chhituh thiehpa a vaw châ awpazy châta atahma tawhta thlah ei chhâpa chhilelie ei.
