EPL 2018/2019 : Manchester United ta Leicester City 2-1 ta pahniepa ta Season ama pathao pasu
Manchester United manager Jose Mourinho chata Paul Pogba cha "team châta â piepasana" vâta reithaipa ta, zâhnia zâ ta English Premier League season thiehpa pathaona akhaihna liata, Manchester United chata Paul Pogba captain-na ry liata Leicester City cha 2-1 ta pahniepa ta, Captain Pogba ta goal 1 a khô hra.
Barcelona khâ ama reipazao haipa, Pogba he France ta FIFA World Cup nyungiapa ama chalo tawhta â pahâ lymâpa ta, United Training chhao he â pazao haw kawpa kha châ ta, Leicester ama hmiachhy awpa liana heta a hmi hmô awpa chhao chyhsa hluhpi ta cha amâ hnabeiseih leipa a châ.
Akhaihna pathaopa a châ tawhta Old Trafford liata United vâhneina a pahiehpâ ha ta, minute 2-na liata Alexis Sanchez chapiepa tawhta ball a vypa ta Leicester player, Daniel Amartey ku liata khaipa ta, penalty a cheih haw.
Pogba kaw chakã papuapa ta, Kasper Schmeichel patu thei rimâ lei awpa ta kao chachâh lâ chapiepa ta, 1-0 a chã haw.
United Left-back Luke Shaw ta senior team châta a goal tua chaipa châ awpa ta Juan Mata tawhta ball a vypa za khôpa ta, 2-0 a châ ha heih.
Leicester ta Jamie Vardy cha bench tawhta za pangiasapa ta, Vardy heta Ricardo Perreira ta ball avaw chapiepa cha goal liata a luhta su pangiapa ta, 2-1 châ ta; daihti chhâ ta, United ta Season pathaona noh liata point 3 hlaopapuapa ta, Old Trafford ama pabohsa chy.
Pogba he tlyliah liata minute 84 akhaihpa ta, Marouane Fellaini ta a zâ thla ta; Fellaini heta Pogba cha, "Minute hluh chhao â khaih thei na ta ei pangiasa leipa tlai" tahpa ta, training â pazao thlâh na ta, â khaih pha kawpa cha a reithai kaw.
