Article : Mara reih he ahneituhpazy heta thai chyu achhuah suh vy - By ELLEN HLYCHHO

BY ELLEN HLYCHHO

Keimo chhôkha he chi hro pho hropazy hry liata khisah tyhpa châ pi ta, eima reih chhao he khoh dâh hawhta a thai leipa ei châ. Hawti via no tawhta Biehrai chhao he English reih tyhpa châ na ta, eima reih 'A Aw Y' dâdei chhao he ei chu beih leipa vâta a thai leipa ei châ tyh. Anodeikuacha, eima reih athai leipa châ awpa ei nawtawhpa vâta ei phana rakhata a vaw chu hra na ta, atahmâh cha eima reih liata hmah ei sie kaw bâ hra.

Ei palôh liata â lâhna dâhta cha keimo reih hlâhta reih hropa thai viapa he nozah â chhih tah na ta, athata eima reih he ei chu. Mararah liata ei kaw y tawhta MADC lâ zy charei na ta, nôpaw viapazy apakyh tyh na ta, eima reih ei thai thei nawpa ta primary level liata amâ chupa bu zy taih ei lah pakhy. Keimo liata thai a chhuahna palôh khâchâ eima hnei khiahtala rairu tu vei. A chhuahna a ichapa a peipawhpa ta ei pahno.

Reih thai hluhpa he a vaw pha kaw. Eima reih dei leipa ta reih hropazy chhao he eima thai hluh via khiahtacha keimo eimâ thôh nawpa pyly a châpa vâta reih thai hluhpa he a pha ngâsâ. Cha no ta ei reih khohpa cha keimo reih hlâhta reih hropa a thai viapa châpa he hmo rônah kawpa deikua a châ nahta pangiasa va na. English poetry reih thai kawpa Marasaw, Mara Biehrai a reih thai tlô leipa chysah eima châ tlamaw aw tahpa chi â chhih kaw.

Anodeikuala, he ei bie rohpa vâ heta eima reih a thai pasia mâh leipa thokha hmia cha pachhiesa awpa he ei chhuahna châ vei lah y. Keima tlai chhao he atahmâh taihta khodâ hawhta eima reih thai mâh va na. Keima chhao hmâhta he rakha he ei kaw thai theih a châ khiahtacha, nâmo chhochhi cha keima hlâhta athai soh viapa sai châ ei chi ta, ngiaroh awpa y vei tahpa he ei reih khoh kaw. Eima reih eima thai âh leipa vâta Mara eima châna nata Marareih a hneituhpa eima châna he lei tiarâ vei lah y, a hneituhpa dohta eima châ. Nama nata keima heta eima reih he eima cheih vei khiahtacha, chi hro pho hropazy heta maniah vaw cheipa aw vei ei tahpa eima pahno chyu.

Marareih a hneituhpa zy pi heta keimo eih, eima reih he cheih ei sih la, a thai pasia mâh leipazy he maochhie leipa ta ama duahmo pahnothaina chôta eima reih cheih awpa pasyu pazao lymâ ei si la, athai leipazy chhaota eima reih thai leipa he asosâhna châ vei tahpa pahnopa ta kâchhie leipa ta eima reih cheih awpa a chhuah lylia ei su u. Ei bie rohpa a reituhpa zydua chô liata alyna bie ei reih.