UP : Saw hri-iah pathaihpa sa khohna vâta ama sawchanô kô 6-pa ama thie
Moradabad, Uttar Pradesh liata nôvah baokhazy chata ama sawchanô, kô 6-ta uhtheipa cha a hnatlâna a pha leipa vâta, saw hropa, hnatlâna pha viapa sa awpa ama khohpa vâta, atheihna châta hlâpa ta ama thie.
He hawhta ama sawchanô hrona la awpa ta palôh ama taona chhãpa he, Hindu theihthaipa (Tantrik) ta ama sawchanô ri cha ama O liata ama pabu khiahta la, saw hropa, hri-iah pha viapa ama sa thei aw, tahpa ta a chhopa vâ ei ta a châ, tahpa ANI ta a palâsa.
Henah nôvah chô liana heta FIR pangiapa châ ta, FIR liana heta henah nôvah heta ama sawchanô he a rao liata ama riesao, tahpa palâsapa a chã. Ama sawchanô ri he theihthaipa ta a chhopa hawhta ama O chhôh liata ama pabu.
He ama sawchanô kô 6-pa, Tara tahpa ta ama awpa he pati phapa â phahlapa vâta Ricket pasana hnei ta, athata a zaoh.
He chôchâh he henah nôvah opa zy ta ama reipasipasua tawhta Police zy pahnosapa châ ei ta. Police zy ta chanô hawtipa ri he ama O chhôh liata ama pabuna chhiahpa ta ama thaohpapua heih.
A nô ta a reina dãhta cha, "A sawchanô ri he ama kiah liata pabu awpa ama khona chhâpa cha, amâ dai thei leipa vâta a chã" tah ta. "Thohna nano nanopa eima paniesa tawhta chhao pha thei leipa ta, chiehlei viana lâ ngai a lymâ" tahpa ta a manô (grandmother) ta a reih hra.
Post mortem tawhta â lâna dãhta cha, chanô hawti Tara he a rao liata riesaopa a chã.
A nô nata paw he Police zy ta ama patu ha hra.
