Article : Mara reih thai leipazy Mara reih pachuna dâh - By Collin C.Ngôhai

Mawrâh liata a pahrapa Marapa sawzy châta achah ta luhlai avaw chhih kaw tyhpa hmo sakha cha, eima viasa rihchahpa zy ta, “ Siaha lam in Kawlchaw Theihai chu atui bik e.” maniah ama tah tyhpa he a châ. Zahnia lâ(Last weekend) liana kha eima mahpaw maniah â pahasaipa vâta Laki khih lâ ri kiapa ta eima râh lâ kaw tlô na tah. Adaihti tano avaw châpa heih hrapa ta, ei hrialahpa zy chakiepa pata Kaochao lia Iphô cha Rs.200/- tlai chalei na ta. Eina baipa zydua chhao ei ta cha Rs. 300/- ma hlei a châ cheingei aw.

Atanoh office liata eima nie awpa thei 10 tlai ei va cheih. He hawhna he ta ei chho ei. “ Kawlchaw Theihai ah pawh, atui chi a ni a. Ahming pawh ‘Iphô’ a ni hi.” tah ei na ta. Nohro hla ta Iphô kha avaw hmoh via hâpa vâta, vaw thlôh via hra ta. Kaochao Iphô ‘Rangkawi’ anie tyhpa zy chhao ta. “ E! a ni hi, Iphô hi Kawlchaw Theihai dang ka ei tawh zingah chuan a tui ber.” tahpa ta eina chhy hôlô ei. Iphô daihti lia eima râh lâ ei kaw sie heih tita cha, “ Kawlchaw Theihai ‘Iphô’ kha lo hawn leh ngei ang che.” eina tah cheingei thlyu aw ei tahpa ei pachâ. Iphô=Theihai tahpa chho hlei vei ei na..

Marapasaw châ pi ta Khizaw khei hawpa su lia rai pahra hraw ei sih la, eima reih nata hmo moh zy he pasôpa ta, eima tu nata saw hleikhô ta viasa-richâh zy chhao Mara reih nata Mara mochho zy chhao eima pachu lymâ thei zie athiehpa ta ei palôh lia â vaw la.