Article : MARAPA EIMA CHÂ - By DR.SASA
Pre-Independent daihti liata British, Burma nata India politician zy ta Maraland cha Nochhi nata Notla ta miah hrie, miah vaw patlaw ha chy hra ei sala, Marapa thikha sâkha pôhkha eima châna deikua ahy hmahta mia pachhaih thei beih aw vei ei.
India nata Burma political thlihpipa zy heta Marapa râh zy cha tlawno ta miah patlawpa ta, ryureina mia 2 ry liata ryu maniah reihpa ta y chy hra ei sihla, mylâ eima tlô awpa Maraland cha KHAZOHPA ku lia a ypa vâta ahy hmahta parao thei khao vei ei.
Keimo thisaihta pazaopa thisaih azaopa Marasaw pakha nata pakha kyh eimâ châh via lymâ aw. Marasaw nata Marasaw eima likah liata KHAZOHPA ta Vârâh tawhta avaw pathla hapa KYHPACHâNA he viahpa zy nata chihro phohropa zy rai rai ta ama parao thei beih awpa châ vei.
Marasaw nata Marasaw likah, eima tlohleina zy a vaw y tlamaw tita chhao pakha nata pakha adeichhy lymâ aw pi ta, KHAZOHPA tawhta Vâ byhnâ zy a vaw tla tita chhao Marasaw pakha nata pakha eimâ hly lymâ aw.
"Marasaw kei chhao nâ eih, nâ chhao kei eih"
"Eima thisaih chhao Marapa thisaih eima phaoh"
"Eima reih chhao Marapa reih eima cheih"
"Eima hla chhao Marapa hla a châ"
"Eima tihâh chhao Marapa tihâh eima nie"
"Eima hmisâ chhao Marapa hmisâ eima châ"
"Eima khih chhao Marapa khih a châ"
"Eima rãh cha Maraland a châ"
"Marapa tlâh a châ, Mara tlâh zy a châ"
"Eima lyu chhao Marapa lyu a châ"
"Eima O chhao Marapa O a châ"
"Eima chhyna O chhao Marapa KHAZOHPA achhyna O a châ"
"Eima Awnano chhao Marapa Awnano a châ"
"Marapa ti ( water) Maraland ti eima doh"
"Thlih chhao Marapa thlih eima chahâ"
"Mara Jerusalem cha Maraland a châ"
Marapa hryta achhaihna rairai a y lei n'awpa ta nohchareih KHAZOHPA lâ thlahchhâpa ta KHAZOHPA nahta vaihpa ta Thlahpa pathaihpa nahta akaopa ta, tiama papuapa ta eimâ dua lymâ aw.
Mylâ Mara châta atanoh Marapa zydua ku liata tovyuh a y, he eima tovyuh rônah ngaita kawpa KHAZOHPA ta miah a piepa he mylâ Mara châta eima hmâ lyma aw.
KHAZOHPA ta Maraland nata Marapa byhnâ pie mawh sy, AMEN.
