Chanô saw thla 8 ta uhtheipa a phaoh haipa chapaw 8 ta patupakhi
Mumbai/Sangli: Maharashtra liata chapaw 8 ta chanô pakha, saw thla 8-pa phaoh haipa ama patupakhipa chata India rãh nah a charao ngaita kaw. He hmotlôpa rarô y kawpa chôchâh liana heta Maharashtra State Commission for Women chata, he hmotlôpa chôchâh he a siahlia kawpa ta report pie awpa ta Police amã haw.
He hmo he târi 1, August 2018 my dawh 6 a.m-pa ta a tlôpa kha châ ta. He chanô sawphaohpa he kô 20-ta uhtheipa châpa ta, a vahpa nahta Turchi Phata, Tasgaon, Maharashtra liata âmo rai chôchâh liata ahmôpakhyna lâ ama vaw nota he hmo khochhih lei kawpa he a tlô hapa a châ.
Tasgaon police station tawhta IANS ta bie ama daona dâhta, henah nôvah he hotel taopa ta sôhdaohna taopa châ ei ta. He hmo a tlô nona heta, ama hotel liata hriatuh awpa chyhsa a hmô awpa ta ama nôvah ta ama pua no a châ.
He patupakhina liata a hlaohlipa hryta pakha Mukund Mane, heta he chanô vahpa ge Turchi Phata tawhta vaw phone pa ta, raihriatuh awpa a hmôpa ha ei tahpa vaw chhopa ta, Rs 20,000 cha advanced ta vaw cheipâ awpa ta tah ta.
A su ama kei tlôpa cha, Mane nata a viasazy chata vaw tlahnaopa ta, pipe nata sômasih zy ta vaw tlahnaopa ta, phusá ama lapa hleikhôta, ama nô ta ngôh nata hmosôhpa hropa â baipazy chhao ama lapa khai ha hra. He khai tawhta a vahpa he buhpa ta, ano motor chhôh liata a pakah pamaipa ta, ama hraih. A vahpa motor chhôh liata ama khô chhôh heta, a lahpinô cha ama patupakhi hapa a châ.
He nô sawphaohpa heta, a saw phao haipa cha thla 8 a châ hanazie zy nata, ngiachhiepa ta a chô liata cha hawhpa hmo patlôsa lei awpa ta amâ hawnazy cha pahnolei a pachâpa ta, saw thla 8-pa phaoh haipa cha ama patupakhi hapa a châ.
Henah nôvah heta Tasgaon police station liata ama chôta hmotlôpa he tlôkheipa ta, he chanô heta moleipazy he Mukund Mane, Sagar, Javed Khan nata Vinod hleikhôta ama moh ama pahnoleipa 4 zy ama chãnazie a rei. He thâtih pachhuahpanoh hai nona heta moleipazy he patu mâh vei ei.
