Hiroshima khihpi liata Atom Bomb ama pathlana noh! - By T.Ngôthâ, Siaha

      Kô 70 vaw khô hapa Thlazoh noh 6 mydi dawh 8:10 liana khata Hiroshima khihpi chhôh liata thina ta a bâh pakaipa ta, US B-29 Bomber, Enola Gay ama tahpa ta Atomb Bomb ( Uranium Bomb) apathlapa a cha, Alei tawh feet 1800 âsâhpa ta a y no ta khaihna no-âh chhih kawpa pua ta, chah Bomb rarôh-y ngaitapa a pa pa chata ei khatlai ta a chheipâh liata hmo ypa zydua cha Mei paoh padipa lâta a pachâsa khai hapa a cha.

       Nohkha liata Chyhsa 70,000 tlaita hrona pahlei ei ta, No 3 khô Thlazoh noh 9 pa liata Plutonium implosion-type Bomb (Fat Man) cha Nagasaki khihpi liata pathlapa châ heih ta, Khazohpa ta ano lyupa ta ataopa chyhsapa nata chyhsapa â chadona rai y leipa ta a pahleipahlôna athiena daihti eimâ tyh hapa kha a cha. He hmo tlôpa rarôh y ngaitapa he ta, chyhsa pathipalôh liata hmahdawpa alei thai khao lei awpa Khizaw a y chhôh ta pahno ngâthlâh ha awpa chi cha avaw tu hapa a cha.

      Khah Hiroshima liata  Atom Bomb pathlapa vâta Mo manôh 90,000–166,000 likah ta Thina atyhpa ta hrona â pahleipa hawhta alaichadai tuhpazy ta ama reipa châ ta, Nagasaki liata Mo manôh 39,000–80,000 rachhôh thipa ta hrona â pahleipa hawhta reipa a cha hra. Thlazoh noh 15 liata Japan chata Adyuhna liata pahniepa achâ zie phuahpa ta a (Surrender) hapa a cha. Adyuhpi ei II-na cha avaw chhâ hapa a cha.

Hiroshima liata Atom-Bomb pathla awpa ta ama tuapa Chyhsa 12 pazy khata Chamaih, _Cyanide pills_ 12 avao paru ei ta, ama hmochhuahpa ahlao chhâ pathlei tlai khiah nata Japan Pheisaih-zy ta ahropa ta ama patu tlai khiahta cha, Chamaih nieta thi cheingei awpa ta bie piepa ama cha. Chyhsa 12 hry liata 9 pazy hnohta Atom-Bomb pathla awpa ama châzie chhopa châ hra veih ei.

     Hiroshima châta pacharôhna noh rarôh ypa athei ngâthlâh ha nawpa ta nata Atom-Bomb vâta athi hapazy athei ngâthlâh hana chô ta  taokheina noh kô tochhieh ahmâh tyh ei ta, Atamy liana chhao khata _Hiroshima's Memorial park_ liata PM Shinzo Abe, Hiroshima Mayor Kazumi Matusi nata US Ambassador to Japan Caroline Kennedy zy chata ama hmâ khei heihpa  a cha, Zawpi âpôh pakhypazy ta Achalihpa ta athihpa taokheina nata adyhna bie zy reipa ta, Pivaw papua ei ta, _Lantern_ sâh hlupi _Motoyasu_ chavah liata ama paphao sa heihpa a cha.

      Chah hawhta Japan Râh Hiroshima liata ama taona ei pachâ hai no ta chhôsoh lóh liata khâchâ avaw lâpa nata alaipa cha reih leipa ta y thei vahlâ na maw!....

    Chahawhta Khihpi rônahpa Hiroshima paraopa nata a chhôh liata mo manôh tlairaoh thyhlupi ta hrona ama vaw pahleina chhâpa ei pachâ nota apei ei tah tyh!... Châhrasala chah tluta ngiachhiena rai palâsa leipa ta ama taona daihti liata Râh chata keih chakâ tuhpazy cha maochhie thai awpa ama châ pata pahno tlôh na va!... He Râh pachha awpa machhyu mahrâhpazy palôh cha he ta ei za rohpady tyh cha maw!../Thokha ta Khizaw râh nata pho zydua cha ama biery liata so awpa khona vata ama khihpi nata ama hrona pahlei ei ta, thokha deikua ta Khizaw Râh nata pho cha Phohropa sei liah ama tâh lei nawpa ta ama hrona taih chhao i thei khao leipa ta mo manôh lu ama lapa dei châ leipa ta Khizaw khotalaipa ta a y thei nawpa ta ama hrona tlaipa chhao ama vaw hlâpa chá tlôh ta, Râh nano nanopazy cha Lôhraohpa ta Khizaw pachha n'awpa  chata keih vaw chaka pata ama chariah chhaichhi pha chaipa nata tlô chaipa chhao cha, Pahniena ama to thei nawpa ta a Sawkha dua ta nata Râh nano nanopazy cha Lôhraohpa ta keih ama vaw chakâ khohpa vâta pahniena a to thei chyu chyuhpa ama vaw cha.

      Chata a châkhiahta cha keimo he zaw Pho hropa sei lia atâh leipa ta eima pua thei nawpa ta, khotalaipa Râh eima châ thei nawpa ta cha, Asawkhâna duata nata NGO's zydua nata Marapa Zawpi zydua pheikha hy paraoh awpa he abyuh hapa chá vei ma????

    Lôhlia My thei beihlei awpa Mara Deiva Awhsi Váchhiepa Puhpa J. Vialua ta cha......

_Ei liari tlona Mara râh he ei vawsai sualuah châh ta,_
_Moto khiahlô tlâhna rai ta zapih vei;_
_Hâzoh mokuh ramâ chhao chhi lei ta, ei rohpady ty, noh ly chhiki nah hâzo chhiki,_
_Viahpa Kalâ Tlaikao chariahzy miah dôh ei, Mara saw vawthyu bâ teh u...._

_Ei sai châh ta chhôsoh lôh aza pasa tyh rimâ bao cha,_
_Viahpa kalâ Tlaikao chariahzy miah dô ei, Mara sawzy vawthyu bâ teh u;_
_Ei liari tlona râh lia he,_
_Hlâno manô mapawzy thisai ta ama chaleipa râh he,Ado ngâchhih, riapha chaihrai chaba ta;_
_Mara thyutliazy vawthyu bâ teh u,_

_Hy ahra tuh,Mara thyutlia zy,_
_Aoalaihnô Meithei achaba ta;_
_Aw thyutlia sawzy vawthyu bâ teh u.!_ tahpa ta ano cha Sihnô kua khaolei pah ta, Chhôhkhih lia valâ maniah kei zoh sai ha hrasala, Abie nata hla deikua ta cha Mara thyutliazy maniah a awsao ngâthlâh hapa a cha.

Khy khy Mara Saw, Thi khiah thi khoh, hro khiah hro khoh, pha khiah pha khoh, Chhie khiah chhie khoh tahpa ta Bâh lia acha ao pa ta, A sawkha, a Awnanopa, Apy, Mara saw keih eima chakâ paraoh awpa angiah ta, Pho hropa sei liata disaopa ei ma châ lei nawpa ta Pheichhua hy paraoh awpa he â ngiah hapa a cha.