LÔHIAH Â CHHIH RIMÂ CHY!!
Thyudyupa ta hmahta châ chy hrasala, a kyhpachâpa, a vâ-iapaw thina lytlâh khô ha awpa cha a chhã n'awpa ta "Eikha ta chhá" tahpa, tlãhleina rakhô liata a zia thlâh hapa cha chaku leithei vei!
Blake Ward, kô 16 ta uhtheipa cha Wales liata ama O kiah liata ti amâ zaw nota rairuna atyhpa ta, thachhâpa ta thohna-O ngaikheipa châ ta. Dawhtynah ta ama theina zydua papua taraw hra ei sala, pachha thei khao vei ei.
A vâ-ianô, Stephanie Ray, kô 15, chata a kyhpachâpa, Black Ward, thina lytlâh a khô ha awpa pathliena châta pasaih lei kawpa ta thohna-O rakhô liata â ziakhei nopa cha Facebook liata tawhpapuapa ta, hetana heta a rohpâ :
“Atanoh he keima châta la daihti riethei a chhih chaina noh châ ta, ei hro chhôhta my khao aw vana,” tahpa ta, “A kiah liata khâ y lymâ na ta, thyusai thei vana. As you all know Blake he ano hlâta mohropazy pachâ viapa, mohropazy châta khâpa hmo rai a tao ngâhpa a châ tahpa nama pahno. Zâhnia khata dawhtyzy ta Blake he pha papua khao aw vei, a lathli ta raihria beih khao leipa aw ta, chavâta, a hrona ama patu chyna Oxygen cha phiapa ta, eima pathlie thlâh ha awpa â ngiah aw tahpa miah ama chho. Blake he keima châta chyhsa pihpatluapa châ ta, a châ ngâthlâh ha hra aw. Eima pano ta riethei rairuna chatôh khoh pi ta, eima chatôh pathlah lymâ tyh hra.
“Anodeikua khâpa pasana hmahta pahno khao leipa ta, a chhôhkha nata kyhpachãpazy ypâna hryta bôhzyu lytlâh khô ha aw ta, chhâzaw ta vâ aw na ta, chhôhso liata myna noh y aw vei! Cha vaw my beih aw vana Blake; Ei Dao, chô lâ cha kiah ha la, na châta chanô apalaikheitlâh châ aw na ta, kyh ei cha pachâ ngâthlâh ha hra aw" tahpa ta!
