MA Gold Medallist Laihsa Nôki thâtih na pshno mâh leipazy

Kô kha chhôhta liata ano kyhpachâ ngaitatuhpa, a nô nata paw ta â pahâsai ei ta; rairuna nata vâduana hryta MA (Pol.Sc) liata Mizoram University liata Topper châpa ta, Gold Medallist a châ. A hlaotlohna he a nô nata paw ta hrolâhpa ta, vaw hmô hra mawh ei sala, khatluta â lyna â ki via heih vâ he! Châhrasala, chanô chhyupa, Laihsa Nôki heta, Khazohpa liata khâchâ a ngâna pahnieh ta, Khazohpa ta khâ a ypâ lymâ.

Mizoram University ta August8, 2018 khata Master of Arts result papua ta. MA (Political Science) liata Mara laihsa, S. Nôki chata 7.943 hmôpa ta, MZU ry liata MA Political Science achuhaipa hry liata â sâh chaipa ta Gold Medallist a chã.

S.Nôki, a chhôhkha nata viasazy ta "Aki, Kiki" tahpa ta ama awpa he April 15, 1994-liata Puhpa VB Sachai Syhly (L) nata Pihnô C. Khainy (L) zy sawchanô panona nata uhthei chai pazipa châ awpa ta vaw pih ta. Unawh papalih châpa ta, chanô 2 nata chapaw 2 ama châ.

Class X he Don Bosco, Siaha tawhta 1st division liata passed-pa ta, Class 12 Arts he Govt. Mizo Higher Secondary School, Aizawl tawhta distinction liata passed ta, Mizoram pôpalôhpa liata 1-na a châ.

B.A he St. Edmunds College, Shillong liata achupa ta, 1st division liata passed ta, NEHU lista Top 3 liata â kaw khaih.

Laihsa Kiki heta MA Gold Medallist a châpa liana heta a chalih a chhuah leipa ta, Civil Service exam awpa ta â chhuahnoh hainazie a rei.

MZU Topper a châpa he â pangiasa leipa ta, "Pua ei no-âh khai ha" tahpa ta, Khazohpa lâta alynabie a reih tua chainazie a rei hra.

Laihsa Kiki heta he duasu kaw to awpa heta rairuna nata atymâna athata atyh ta. MA 4th semester exam chyta liana heta a paw cha tlâh leina vâta mohôhpa châ ta, palôhru riethei kawpa nata atymâ kawna chôta Exam hmiachhypa a chãpa vâta Topper lia ngâsâ ta â kaw khaih awpa he a pangiasa vei. Châhrasala, Khazohpa chhihthana vâta he duasu he a kaw to theipa a châ, tahpa a rei.

Laihsa Kiki heta châ â chuna dâh a reina liata, "MA he cha class 12 , BA zy ei chu no hawh muaruata cha achu khao leipa na ta, class explanation he a sia kawpa ta ei pahnothai theipa vâta exam chyta liata tlâ ei pathieh-pahlâh heih tyh" a ta.

Nôki chata achuna kyh liata a chhôhkhazy ta ama baokhâ phanazie reihpa ta, "Ei nâ nata ei pâ ta châ ei chuna he pachâ peimawh kaw ei ta, châ ei chu thei n'awpa a châ khiahta cha zakha liata zakha ta eina baokhâ tyh ei. He hawhta eina pahâkheina ei hmeiseihpa ei hmôpa vâta kei chhaota thapawh kawpa ta ei chu thei tyh" a ta.

Nôki heta achuna lâthlôh â chhihna kyh liata rairuna hluhpi a kaw tyh ta. Atakô (2018) April khata a nô C.Khainy ta cancer pasana vâta avaw pahâsai ha ta, a nô ta â pahâsai tawhta atakô liana pyly khata a paw Puhpa VB Sachai ta â vaw pahâsai lao ha heih. Chyhsapa tao awpa ta vâsâh chhâna tlai châ ta; chanô liata hmahta nô nata paw liata khâ â pahnieh thlâh ha chypa châta cha hmialâ siena awpa a zoh kaw tlai aw!

Châhrasala, chanô chhyupa, Nôki chata he rairuna nata vâduana â tyhpazy he "Rairuna, pachârôhna nata nôpona hryta Khazohpa eimâ hniana heta, A hmotaotheizie miah pahnosa tyh" tahpa ta, Khazohpa khâchâ â hniana zie a rei.

Laihsa Nôki chata, "Hlaotloh awpa ta peimawh chaipa cha Khazohpa châ ta, a pazipa ta hriapasana, apiepasana nata ngâchhihna he a châ," tahpa ta, "He hmo mia palih zy he khâchâ eima hnei khiahta cha, hlaotlohna ta miah pazi cheingei aw" a ta.

Laihsa Kiki chata, Civil Service a roh patloh awpa cha â chhuah chaipa a châ, a tah hra.