ARTICLE : Ngiapâtuhpa Hro - Ahy maophaohna maw? - By Rev Dr Laiu Fachhai

Atakô ECM liata Thlarâh thlâpâ Apahrana biepipa cha Rev P Riabi ropa “Ngiapâtuhpa Hro” tahpa a châ. Roh pha kaw ta, a rei chhao pha ta, novâh â chhih kaw. Cha nota, eima râh liata ngiapâtuhpazy pi ta ngiapâna kyh liata eima hro a padâh via laih lymâpa he ahy maohphaona ma a châ aw tahpa thata pachâ na ta ….

Shillong liata NEICC Executive Committee ei hlao khai tawhta, Guwahati liata Bible Translation Training Workshop liata hâta eikha chhôh tlai a hlao na ta. Biehrai mopathina (revision) tao awpa ta cha Biehrai Biezy â thu ngaitapa ta a chu awpa a byuhzie zy a chu heih pi ta. Kei nata consultantzy nata checking committee memberzy ta Biehrai eima mopathina liata châh kha châh kha tlai ta zôpha ngaitapa ta reih pi ta eimâ chu lymâ tyh. My tlamawpa a y ma, palie chheipa  a y ma, pahno ru kawpa tlâh he pahno thai via n’awpa ta kheih hawhta so awpa ma a châ, hlaphôh cha hlaphôh hawhta Mara reih ta kheih ta sopa ma a pha chai aw, tahpazy a chakhieh charieh kawpa ta eima mo lymâ.

Guwahati liata ei y nota, “Mara reih ta Biehrai eima hnei tawhta kô 60 hlei châ ha ta, eima râh he ta Biehrai Bie hawhta eima hro leina kao a vaw hluh dâh muarua cha” tahpa ei palôh liata â vaw lâ heih. He he atakô ta Apahrana biepipa nahta pachâ pakaoh na ta ….

He kyh liata Pâhstaw nata Machâzy ta ABEIPA Bie pachu tiama leipa pi ta, hrozie nôchâ ta pamopâsana chôta ABEIPA Bie hawhta hro awpa ta eima sahlaozy thatlô ngaitapa ta eima  pachu leipa vâta a châ chaipa ta ei pachâ. Maohphaona keima chô liata chhao â pahnieh lai kaw, Senior Executive Secretary ei châpa vâta. Chavâta hrozie nôchâ ta pamopâsana chôta ngiapâtuhpa hrozie dopa awpa cha sahlaozy pachu via lymâ awpa ta ei hlâ pathieh heih.

Sôh lâ chhâh ta avyuhna (corruption) moleina zy, maohphaona patlô leina moleina zy, paritheipa nata paôpazypa taopa moleina zy, thathina moleina zy, reih hluh ta haipa biezy taih rei pâ laihna moleina nata moleina hropazy kyh liata, sawhkhâ tlyma, NGOzy tlyma, pawlitisiazy tlyma, sawhkhâ rai hriapazy tlyma, khawthe rai a hriapazy tlyma maochhie awpa hlâta Awnanopa chô liata a maoh a y viapa ta â lâ. Sawhkhâ rai a hriapa, pawlitisia, khawthe rai a hriapa nata nietluana hropa rai a hriapazy he eima Awnanopa sahlao châ ei ta, Awnanopa ta â i ngaitapa nata thatlô ngaitapa nata a pha ngaitapa ta adona, ngâchhihna, pathaihna, kyhpachâna, zawngiahna, tiama hriapasana zy eima pachu awpa hawhta eima pachu leipa vâta chyhsa dopa nata ngâchhihpa ta eima papua thei leipa a châ chaipa ta â lâ.

Awnanopa ta hria awpa hluhpi eima hnei.