Eima mâ (Dream) nata a yzie : Na zo ma?

Chyhsapa hro liana heta mâ heta yzie â pathuh kawpa a hnei tahpa cha Biehrai liata Phirao mâ sapa tawhna khata pahno thei pi ta. Hlâno Marapazy ta chhao mâ chhopasiana nano nanopa eima vaw hnei tyh hra. ‘Chasipaw mâ’ tahpa ta eima pahneisaopa a y nota, thokha deikua ama mâ sapa vâta bua kawpazy chhao ama y pyly hra. He ary liata mâ chhopasiana nano nanopazy tawhna heta na mâ sapa kha vaw pachâpazi la, â do na tah hra tlyma :

Mâ lâta Nô (Mother) châpa hawhta hmôpa

Na mâ lâta nô (Mother) a châ hapa hawhta nâ hmô khiahta cha, na hro (Chhôhkha, raihriana lia nata siku achuna) liata maophaohna na hnei/la bâ hr’awpa â ngiah ha bâ, tahna a châ.

Râhsa/sahroh mâ lâta hmôpa

Na mâ lâta O sa (Domestic animal) – I (dog) nata a hropazy na hmô khiahta cha, na palôh panyuhna zie a palâsa tahna châ ta. Nôvah tlyma, nama chhôhkha chô liata na palôh panyuhna a palâsa tahna a châ. Na mâ lâta sahroh na hmôpa cha a lao na vaw piepa ta a châ khiahta cha, atahmâ tlyma hmialâ daihti liata tlyma alyna nâ tyh aw, tahna châ ta; na mâ lâta râhsa/sahroh na vaw thie deikua khiahta cha, vâduana tlyma alyleina tlyma nâ tyh thei, tahpa a palâsa.

Mâ lâta chyhsa sypa/apahnâpa (Kiss)

Na mâ lâta ta chyhsa thi chiehpa na vaw sy/nâ vaw pahnâ (Kiss) khiahta cha vâhneina nâ tyh aw, tahna châ ta; hawtipa tlyma hawsaihpa tlyma nâ vaw pahnâ/sy deikua khiahta la, na hro lâthlôh liata rairuna nâ tyh aw, tahna a châ.

Mâ lâta hâh tlopa

Sasyh liata chiehleina (Weakness) tlyma hlaotlohleina china tlyma a pamosa. Hâh heta angâna (Trust) pamosa ta, na mâ lâta na hâh a tlopa khata, nâma sasyh nâ ngâna na pahlei tahpa a pamosa.

Mâ lâta chyhsapa tlyma hmohropa ta tlyma amâ châ chadaipa

He he eima mâ lâta eima sa hluhpâ pa py châ ta, mâchhie kawpa hawhta eimâ kaw hrapapuapâ ngâkaw tyh. He hawhta na mâ lâta chyhsa ta tlyma, râhsa ta tlyma, hmohropazy ta tlyma amâ châ vaw chadai khiahta cha, na hro ta buana â tyhpa, na pathlâpazi thei tlô leipa pamosa ta. He na hro liata buana nâ tyhpazy cha mâ hawhta sapa ta, mâ lâta amâ châ vaw chadai tyhpa a châ.

Mâ lâta â zawpa

He hawhpa mâ chhao he eima sa hluh kawpa pyly a châ. He hawhta na mâ lâta nâ vaw zaw ngâkaw khiahta cha, na hro rie cha patheituhpa tlyma na hro liata rairuna cha tlôkheituhpa tawhta na khotalai ha tahna a châ.