SERMON - THÂTIHPHA - MARARÂH CHÂTA BYHNÂ - Rev Dr Laiu Fachhai
Kei deikua cha eima nô Vanoh Nô nahta Pinô Vaili a o liata eima za hmâkhei aw. Dawh 6 ta Siaha puasai aw pi ta, zâlâ ta eimâ kaw lie heih aw.
Khihchhôh Awnanopa tota atamy amâ pakhyna liata rei awpa ta parosapa ei châpa hawhta, ei ropa he su to râh to liata a ypa Marapa sawzy nama rei thei hra awpa ta ei vaw palâsa.
------------------------
THÂTIHPHA – MARA RÂH CHÂTA BYHNÂ
By: Laiu Fachhai,
Senior Executive Secretary
ECM Assembly
(26 September, 2018)
Mara râh Thâtihpha ta pakhaihsa awpa ta kô 1905 ta Mongyuh râh (England) liata paduapa Lakher Pioneer Mission (LPM) tuapa ta, nôvah a hnei duapa Rev Reginald Arthur Lorrain (Vaili mapaw) nata Pinô Maud Lorrain (Vaili manô) cha Thlarâh 26, 1907 ta Mara râh Saikao khih a vaw ngia ei ta. Khizaw hmasiena kyh liata, kha daihti nota Mongyuh râh nata Mara râh duahmo â nano awpazie cha rei byuh leipa ta eima pahno khai. Cha chôna chata Mara râh liata a pahrapa chyhsazy Krista eima pahno thei n’awpa ta âmo cha Krista ta Mara râh lâ a tuazie ei a sia ngaitapa ta amâ pahnopa vâta Mara râh lâ a vy ei ta, rairuna hluhpi hry liata Mara râh liata pahrâ ei ta, Mara râh liata thi ei ta, Mara râh liata ama luh amâ pabu haw.
Hnôhlâ ta Mongyuh râh tawhta Satlia Albert Bruce Foxall chhao Mara râh lâ misawnâri ta a vy hra ta, Mara râh liata a pihpa Rev Lorrain sawchanônô Laihsa Tlôsai nahta a hnei ei ta, sawchanô pakha Vaili ama hnei. Vaili nô nata paw chhao he ama thina taihta Mara râh liata chakao ei ta, Mara râh liata ama luh a pabu pâpazy ama châ hra.
Atahmâ misawnâri hnôhchaipa Pinô Vaili (Freddy Nô) maniah hro lâh chy ta, Mara râh châta byhnâ maniah a awpa lymâ.
Misawnâri papangawhpazy, Laihsa Gladys Ramsey, Laihsa Yule Mark, Laihsa Gladys E Gorst, Laihsa Irene Hadley nata Pupa Jelly nata a sawchanô pano Mary nata Sudan nata a sawchapawpa Johnny zy chhao Mara râh lâ a vy hra ei ta, Mara râh liata vâropi tlai ama chakao hra. Âmo deikua cha Mara râh liata ama chakaona term a chhâ nahta Mongyuh râh lâ amâ lie haw.
Misawnârizy chakaona a bao awpa ta Kraws Pheisaihzy paduapa châ ta, âmo heta Mara râh doh nah hâ liata Thâtihpha chho lymâ ei ta, ngiapâtuhpa hmiatuapazy chhaota ama chhôhkha nata khihsaw a ngiapâ mâh leipazy hnohta Thâtihpha pahâ ngaitapa ta ama reih lymâ hra.
Khazohpa ta misawnârizy, Kraws Pheisaihzy nata Awnanopa hmiatuapazy chakaona byhnâ pie ta, chatanachata misawnârizy ama vaw tlô tawhta kô 50 chhôh ta nochhi notla, maw nata chho Mara râh zydua cha “Krizyhpa Râh” tah thei awpa a vaw châ haw. ABEIPA cha reithaipa ta y se!
Thâtihpha vâta Mara râh he byhnâ thata to pi ta, byhnâ eima topazy cha a chyuta ta reipapua eimâ chhuah aw:
1. Chhâzaw hrona eima hnei
Zisu Krista pachhana pahno leipa ta, lyurah hripazy a chhy ta, lyurâh hripazy hie pahâh tlamaw awpa chipa ta, thlahzo pachârôhpa ta ypa ta, sahroh eima hnei tlakaihpazy ta atheihna liata hmâh ta, lyurâh hripa sei ta a vaw y tyhpa râh kha, Thâtihpha vâta lyurâh hripa sei châna tawhta pua pi ta, chhâzaw hrona hneipa ta, thlalôhpa nata alypa ta eima y haw.
2. Râh liata adyryhna nata thlâlohna a charei
Thâtihpha a vaw tlô hlâta cha Mara râh he chi hropazy siehnaohpa ta nata âmo chhaota maniah siehnaoh hrapa ta, chariah chakeih hry liata chipa nata thlahzopa ta a vaw y tyhpa eima châ. Chi hropazy eima siehnaohpa nata âmo ta maniah ama siehnaohpa dei châ leipa ta, keimo nata keimo liata chhao khih kha nata khih kha khâ ta a zâ siehnaoh tyhpa eima châ. British sawhkhâ chhaota he he a buakhei ngaitapa a châ hra. Thâtihpha a vaw tlô tawhta deikua cha Krista liata unawh sai eima châpa vaw pahno pi ta, chatanachata a siehnaoh khao leipa pi ta, a dyryhpa ta y ha bâ pi ta, a râh chhao thlalôhpa ta a vaw y haw.
3. Hnatlâna a kaw pha laih
Thâtihpha a vaw tlô hlâta cha Mara râh liata a pahrâpazy pi he vaw pathaih pathaoh tu leipa pi ta, hnatlâna a parao thei awpa hmo pualeipazy chhao vaw pahno tu ma pi. Eima pasa tita eima ngai awpa dawhtyzy hnei leipa pi ta, thohna ia-upa chhao hnei ma pi.
Chavâta pasa panana hluh ta, thi hluh pi ta, maluh eima pôh awpa hawhta chhao pôh thei ma pi. Thâtihpha a vaw tlô tawhta deikua cha misawnârizy ta hnatlâna miah pachu ei ta, thohnazy ta maniah mohô ei ta, eima hnatlâ kaw pha via laih ta, eima hro kaw pasi via laih ta, maluh chhao eima pôh via laih lymâ.
4. Thaina sona liata eimâ kaw chhua laih
Thâtihpha a vaw tlô hlâta cha Mara râh liata a pahrâpazy he châthaipa eima y leipa cha rei byuh lei ta, châ a roh thaipa chhao eima vaw y leizie eima pahno khai.
Misawnârizy ta sakuzy maniah paduapa ei ta, Mara râh liata a pahrâpazy châ kaw thai pathao laih pi ta, atahmâ cha châ a roh thai leipa nata a reih thai leipa eima y tu khao leipa dei châ leipa ta, châthaipa hluhpi kaw pua ha pi ta, he heta kyh toti liata Mara râh hmah a pasiesa.
5. Mara Châ eima hnei
Thâtihpha a vaw tlô hlâta Mara reih he a châ ta ropa châ mâh vei. A yzie cha Mara reih cha y ta, Mara châ deikua y mâh vei. Misawnârizy ta Mara reih cha a châ ta ro thei awpa ta “Mara Châ” maniah taopa ei ta, Mara reih ta achuna sakuzy maniah paduapa ei ta, Mara Biehrai nata Mara Hlabu zy maniah taopa ei ta, Thâtihpha vâta atanoh Mara Châ he hnei thei pi ta, a laiseih lymâpa a châ.
6. Ryureina eihpa eima hnei
Mara râh liata a pahrâpazy châta ryureina eihpa nata laipa Mara Autonomous District Council eima hnei theipa he Thâtihpha vâta a châ. Reih eihpa a hneipa chipho eima châpa cha Mara Biehrai nata Hlabu liata a sia ngaitapa ta hmô theipa a châpa vâta India Sawhkhâ ta keimo tata ryu a reina Mara Autonomous District Council he maniah a pie theipa a châ. Cha dei châ vei. Eima nôpaw hmiatuapazy ta ryureina eihpa hiana châh ama vaw pahnopa chhao kha, misawnârizy ta saku maniah ama paduapapa tawhta châ a kaw chu laih ei ta, achuna a sâh viapa lazy sie laih ei ta, chavâta kha hawhta chipho kyhpachâna nata chipho châta hmo phapa hiana châh kha ama vaw pahnopa a châ.
7. Mo hropazy châta byhnâ eima châ
Keimo ta Thâtihpha eima daopa he a phazie pahno pasia pi ta, eima padi hapa vâta chipho hropazy lâta chhao Thâtihpha he chho laih lymâ pi ta, âmo chhao Thâtihpha vâta sapa nata thlahpa kyh liata byhnâ ama to lymâ hra.
ALYNA BIEREINA NATA A HLÂ PATHIEHNA
Chavâta he Mara Râh Thâtihpha Tlô Noh liana heta, a hmiatua chai ta Mara râh liata a pahrâpazy Thâtihpha chho awpa ta Vaili manô nata Vaili mapaw Mara râh lâ a vaw tuahtuhpa Khazohpa lâta alyna bie reih ei suh u. Vaili nô nata paw, Vaili nata misawnâri hropazy vâta nata Kraws Pheisaihzy vâta ABEIPA lâta alyna bie reih hra ei suh u.
Cha dei châ vei.
Misawnârizy Mara râh lâ a vypa ta Thâtihpha maniah ama chho thei n’awpa ta Lakher Pioneer Mission (LPM) a paduatuhpazy nata chhituhpa a vaw châ laih lymâpazy nata Mara râh Thâtihpha chhona chakaona châta thlahchhâna nata hmopiepa ta thata maniah a baopa England nata America nata râh hropazy liata ngiapâtuhpazy vâta ABEIPA lâ alyna bie reih sih la, a eih pachaipa ta kyh toti liata LPM a vaw deichhytuh chaipa Vaili Mapaw nata Vaili Manô Awnanopa London Khihpi liata Penge Congregational Church vâta ABEIPA lâ alyna bie reih sih la, England râh Bridgnorth Khihpi liata Vaili Paw Awnanopa People’s Hall Independent Evangelical Church vâta ABEIPA lâta alyna bie reih hra ei suh u.
A chhâna liata cha, he Mara Râh Thâtihpha Tlô Noh liana heta misawnârizy vaw tlôkheipa Thâtihpha, Khazohpa bie hawhta Mara râh liata a pahrâpazy ta adona, ngâchhihna, pathaihna, kyhpachâna nata tiama hriapasana hrozy ta hroh pazao lymâ sih la, Thâtihpha vâta byhnâ eima topazy he a to pazao tlâhpa eima châ lymâ thei n’awpa ta ABEIPA lâ a hlâ ei suh u!
No comments