Article : HY! LÔHLIENA.... - By Loren Hlychho

Saopi vasuapa chhao pai ha ta, châhvâ my noh chhi phana ry lia, a tyuhpachho pata tlyhmia lia eima ky noh sa pa-aih pita, Chôhânô Sadah iah pha kawpa eima dâh lia zahnaoh pita, thokha chho chhi apuah pha dah Awhtachhi vawh sao theina khi tlai a cha aw�.. Cha nota thokha Viakho chôna lâ tawh ama sahria puah pâ thlâh ha pata vaw tlô ei ta, "Nama hlaotlo ma, tamy pôkhazie nama pa-ao, khâpa pazu? " tahpa hiahrina cha thathyu ngasä pata "Zuraw, Zalei, Zachyu etc" vaw tah ngakaw hra ei ta, chasipaw roh chhao liahsa apahnâh ha bâ na.. Sâh hmao saih ha ta, Hmiakhupaw chhao liahsa apakai haw. Thothei niepa pazu pavaw nata Cha-ia cha-u zy chhao liahsa ama thaw ha bâ..

Nôpaw hluh via ta ama kô-1 chhôh raihriana theilâpa â awpa ta lyupih lia riehmo paryh ei ta, sâh tai n'awpa *Kaichhie*  thiehpa sa ngâpa zy, lyupâh châhhry liata *Hmâhkhy* hy ngâpa zy, sâh tly n'awpa *Sahrua* sa ngâpa zy, Karao theih pazy na chôta *Hmiakhu* pahrie ngâpa zy, Lyu chao Vatie liata *Cha-ia* pahao ngâpa zy, *Aoh-mâ* pachawh ngâpa zy nata *Chhiehrie* vaw chakhy ngâpa zy chhao ama zydua ta chasipaw pa chasipawsatuhpa sai ama vaw châ. He haw no he mâh *Lômao* daihti ei zâthei ha heih tyh my.

Awhhro kho tawta exer la pata khiliah eima râhreih na zy, mydi thlachhâna dawh a paro raoh ta Simona Mahpaw sahdô lâ *Cha-aw paw* ahuah awpa ta diati hry lia eimâ râ chhiechhu tyh no zy, bazaar shed-lia *Cha-aw lubyuh* eima kuphei kohna taih eima patusa tyh no zy, nohchhô Siku lia *Hmiakhuti saihpa & Chabu tho* eima ri tyh no zy, *Rathô* lia *Hmiakhuthei&Chini* pahlaopa Eima hmao & ókhai saihna taita eima palie tyhpa zy, Siku bâ tawta *Eimârônô* ochahrih lia chartin taipachhupa ta taopa,Motor nohthla eima hao tyhpa zy, Tia-aosaika liata Teak thih nohdi phana ry lia Tawlailirh eimâ râpasua tyh no zy, Pachhy tikhao lia hmopasu pita pioneer motor â vaw rá nah ta lâpi laikathi lá Superman zy hawta eimâ zaw tyhpa zy, eima mokhao saih padina taih Biaka sahdô lia titohpa eimâ kaw zaw tyh no zy, Ngôhry titopa&Sia-u titopa liata tlaikao rei thai leina chôta  *"Kapu, tui kan lo thlawk"* eima tah tyh no zy, Thuachhie zua awpa tlua pata opâh eima chhei tyh no zy, vâsua apadaoh ta tihry eima toh tyh no zy, eima tla-uah tlamaw lei n'awpa ta *Biebu* chhôh lia ti soh pita, eima phei liahsa pachie ha pata châ eimâ chu tyh no zy khaw ummmmm naaaaaaa.

Maniah chhô ta, pasana miah pie thei awpa *Ahloh,Chuahmi, Thlalâ keina etc* khápa hma pachâ tlá leipa ta Eima chochanao tyh pa *Tlâsâpaw* chhao chasipaw aly awpa ta ângiana kaw pakai pathao ha ta, eima palôru chhao liahsa Bethlehem lá aheih ha ba hra, *Bu* sa n'awpa *Buara&Pasawbyh* chhiepa zy pakhy heih pita,thokha ochahrih lia,thokha sahdô su rypaona lia, apy py ta Bu sa pathao pita, a zo ta pakhaih awpa Sathaw mei-ô tlôna eima hmô chhopazy eimâ ly tyh zie kha.

Dawkaobyh chhiepa liata *Seisachhupa* hlaoh awpa eima paphasa tyh zie khaw... Masôh seihpa&Ribai dyuhnazy achaba pata chavia tyh chaimâh pita, thokha Beihâkâh vi ngá bá, ti thai ngâ bâ, thopahrei pakhy ngâ bá eima châkari ta eima bua kaw tyh hra hnai bao kha. Hlakie&bôh hna chatypa nie pita, *Ia-chia* meithei chhao ta, Maitlia kó lia abalei-balâ chaimâh tyh pita. Dokao ahuana lâthlôh lia zy commando training pita eima pakhu&kuchakhi ta alyh tyh pi. K. H. P tlârai lia Ngasatin&lâchao eima nie khai tawh *Sahria* hmokha sâh eima kaw phaopa, phaoh thei eimá tah dah tyh rimá kha la..

Hazo vaw chhi ta, eima châbu chhiepa tho, pakah biena taih cha-eih pita, *Phaipahlaipa* nata eimâ dyuh tyh no zy khaw, tahmâla ramá haw dei chá khai ha ta, lôhkhy viasa thokha zy chhao bôzyuh lytlâh khó pata, tláh to, su to&ráh to lia eimá chhaih khai ha na...

Hnôla daihti pahno ngâthláh ha awpa&angiah ngathlâh ha awpa deileipa ta cha ei châta khâpa hma paryu vei ei... Lôhlie âchhih bao cha..kheita ei tao rai aw...

Theipa châ mawh sala chhôkhih Kiah awpa ta, zâ sidiahna ry lia, chhaolei chakuapa hâ awpa ta, pathupazao pata, ei cha pahleipadia thlâh hawpa tlai *Hy!! lôhliena.*

1) A khô hnola daihti,
   A lo meihbie daihti,
   Ei rohpady kôparo daihti,
   Ei vâ lômaona noh daihti.

Laila lôkhyzy chhao,
Chhôso lôhkipa ta;
Eima laizaolaona daihti zy,
Keila ei zâthei khai hei tyh.

2) Yru khiahlô lie châh,
   Opi chhôhno ry Lia,
   Nama hnazô sahmia vaw saina,
   Raithli vâpiati haw a loh.

3) Hazo avaw chhi châh,
    Tyh khaolei pa hnazô,
    Tluapa ta valâ za zoh tyh na,
    Khiahlôlie apasa bao cha.

3) Rikha laila zydua,
   Khatai lia nama y?
   Khilia keidei lôhiah hrei laina,
   Khatai lytlâh ma nama khô