Siaha Bia nata Palâ Bia liata Party nano nanopazy MLA Candidate sia haw!

Biedaona ngâtlâh kawpa ta a palâsana dâh liata, atakô 2018 Mizoram Legislative Assembly atlyhna, târi 28 Phiapi 2018 liata vaw ypa liata Mara District Congress Committee (MDCC) Nomination Board, atanohta atyuhpakhypa chata, Palâ MLA Constituency Candidate awpa ta, Mizoram Legislative Assembly Speaker a châ haipa nata Palâ Biatuhpa a châ haipa, Puhpa HIPHEI ama phuah haw.

Biedaona dâhta, atakô MLA Atlyhna châta Palâ bia Candidate awpa ta INC Candidate châta moh a pangiapa he 6 rachhôh ama ypa ta pahnopa châ ta. He hryta Nomination Board ta liahsa amâ thlipasoh tawhta Puhpa Hiphei he Ticket ama pie hapa hawhta biedaona ta a palâsa.

He hawhta a châ nona heta, Siaha MLA bia liata Ticket a hnabeiseihpa 2 hryta, Cabinet Minister parohpa nata, MDCC President a châ haipa, Puhpa S.Hiatô cha Ticket piepa a châ hrapa hawhta bie eima dao.

Party hropa tawhta Siaha bia liata Official ta phuapa a y mâh taraw leipa ta, BJP tawhta Puhpa S.Vadyu a duah na ta pangiasapa châ ta; MNF tawhta Siaha biatuhpa MLA a châ haipa Dr K.Beichhua â duah aw.

Palâ bia liata MNF tawhta Puhpa M.Châkhu â duah aw ta, BJP tawhta Puhpa M.Laikaw â duah hra aw. He he Official ta ama phuapa deikua châ mâh vei.