'NA PARU AWPA CHÂ VEI' (Puasaina 20:15) - By Rev Dr Laiu Fachhai

Biepiepa Miahrawh liata a sâchariena cha “Na paru awpa châ vei” tahpa a châ. Khazohpa ta ano a ngiapâtuhpazy cha paru lei awpa ta bie maniah a pie. He biepiepa he hlâno Mara hro nahta phie â miakhapa a châ. Marapasaw he a paru thaipa chi vaw châ ma pi. Sawvâzy châhbi khaw leipa ei ta, ama sahrohzy vai ngâ kaw leipa ei ta, ama lyu nata sadôzy chhao vai ngâ kaw hlei leipa ei ta, ama o dâhdei chhao châhbi khaw leipa ta soh thlâh ha ei ta, ama sâh, sahro nata hmozy lei vei, a parupa ama vaw y leipa vâta.

Khazia suah-luah aw vâ i, atanoh Krizyhpa eima châ tawhta hmahchhah ta he tlupo ta a parutuhpa eima hluh thlâh hapa he? Chyhsa thokha ta tiama kawpa ta ngakhaoh tao ei ta, parupa ha ei; sadô tao ei ta ama âhnalasi nata theilâpazy parupa ha ei; sahroh pasa ei ta parupa ha ei; lyu tao ei ta parupa ha ei. Hmo tao awpa thapawh chhao a chhih thai khao va. Sôh dyuchei ta thô khao leipa chhao he paruna chi kha a châ hra.

He a parupazy he sahma nata thohna ia ta a zai hapazy châ khai hlei lthlyu aw veih ei. Thokha cha nôtloh pawtlohpa, Awnanopa liata â hmâh kawpazy na ama châ tahpa ta reina zy a y pâ laih heih?

“Sawhkhâ sôh, vâtlâh sôh, py sôh nata Awnanopa sôh a parupazy chhao ama y hra na” tahpa ta reina zy chhao a y heih. Cha hry liata Awnanopa liata chhituhpazy chhao amâ hlao hra na tahpa ta reina zy a y tyh. Bie do leipa rie châ se.

Khazia suah-luah aw tlyma i, eimâ chhypa Khazohpa ta paru lei awpa ta â i ngaitapa ta bie liahsa maniah a pie hapa tlai ta, ano Khazohpa a ngiapâtuhpa â tah hrapazy ta ama paru ngâ thlâh hapa cha? A maohphaona khataih liata ma a y aw tly i? Eima chi nata pho, khih nata râh, Awnanopa nata Khazohpa moh dua maw eima pachhie kaw.

Paru lei awpa ta biepiepa eima châpa dei châ leipa ta, Biesozy 1:19-na liata cha a parutuhpazy cha ama parupa hmo nata sôh ta âmo a thie ngâ kawzie a sia ngaitapa ta a roh chheih thlâh ha ta, cha chhao cha chi thai tlâ khao ei va?

Krizyhpa cha a paru awpa châ taraw vei. Khâpa ma cha hawhta a parusa ha tyh aw tly?

Chata tly! A chhâ a chhâna lâ liata cha a maohphaona Awnanopa pyly liata a y thlâh ha heihpa a lyu. A maoh a phaohtuh chaipa cha keima châ aw na ta, ECM Senior Executive Secretary châ na ta, eima Awnanopa member zydua paru tlâ lei awpa ta ei tao thei leipa vâ ei ta.

Awnanopa ta eima sahlaozy Khazohpa chi ta, a rei a ngia ta, a biepiepa zyh ta, paru lei awpa ta eimâ pachu tiama leipa vâta a châpa ta â lâ. Paru  leipa ta niedo eimâ hmô thei n’awpa ta tiama hriapasa awpa ta eimâ pachu tiama leipa vâta a châ thei hra.

Hria awpa hluhpi eima hnei.