Article : Masidonia râh la avy la, miah bao teh - By Beimozachhi Hlychho

Avaw pasa-pâ kawpa chhaota na vaw pahnothai muh vy. Thâtih sianôpa he vaw pahno hlei leipa na ta, ei vaw pahnopa cha ei palôh a keichheih kaw! Facebook group sâkha "Maraland Christian Network" DMCF nata DMSO liata chhithatuhpa châna vaw patu tyhpa  eima uhta Gospel Thalai Nohro ta vaw post ta ei palôh eina hria kaw. Pahno leipazy chhao eima y thlyu aw, DMCF chhithatuhpazy ta Marasaw Delhi liata  achuhaipazy châta Revival Camping pachhuahpanoh khoh ei ta, amâ pachhuapanohna zy chhaota akih a tlô ha thlyu aw. Vâduachhih kawpa ta October liata hnei awpa amâ chhuahpa cha sôh aphahlana vâta hnei thei khao vei ei. Pachâna hluhpi eina pahneisa. Ei palôh chhao âtymâ kaw. Student thlâthlipa ei châ hlâh chy hapa vâta deikua taotheipa hnei va na. Ei palôh deikua a hroh chaimâh.

Kei he Indore, Madhya Pradesh liata y haipa châ na ta, ei yna su lia heta Fellowship eima hnei hra. Cha lia chata kô 6 tlai chhithatuhpa ta y na ta, atahmâ chhao Overseer châna patu haipa ei châ. Achuna liata Khazohpa eimâ ngiahzie he hmôpasia kaw bâ na ta, "Abeipa khinarâh nata siana tlua ha tua u la, chatanachata he hawhpa hmo zydua he A cha baichha aw ei" tahpa ta Zisu bie miah pachupa he a hmeiseihpa tlaita âdozie ei hmô ngâkaw, keima hro lia cheingeita chhao. Cha hawhpa palôh phaohpa ta, eima unawh Delhi achuhaipazy hnabeidyzie, ama khohpahâna nata ama dâhphina heta eina pazei pasa ngaita kaw.

"Khe he maw, na hlao a hluh kaw kha maw, miah vaw bao hra tua bao" tahpa ta  ku adao thai awpa chi châ vei. Kâchhie âchhihzie he ei pahnopasia kaw. Châhrasala, he hi ei reih khoh kaw. Keimo ngiapâtuhpazy pi hi eimâ nano kaw bâ. Eima O chhôh tobi n'awpa ta sôh eima hnei hlâh ha nota Abeipa Khinarâh châta deikua eima i kaw tyh cha maw. Mohpha n'awpa âhlaona liata zy eima sóh pachhipa pyu aru khoh kaw tyh. He bie zy hi ei thei hluh ha bâ, pho hropazy la naw Khazohpa chyhsazy ta byhnâ ama to thei n'awpa ta ama sôhzy pachhi n'awpa su ama tlua tyh cha maw! Chakaona he apakhypa nata Khazohpa bie reipa ngâlâh lia heta chhâ cheita vei. Piena kyh liata zy chhao a châ khai hra.

Eima râh apahniehna cha achuhaipazy he ama châ, tah tyh pi ta âdo kaw. Achuhaipazy ta eimâ pahniehna he zaw? Abeipa Jehova Khazohpa liata a châ vei khiahta cha ahy he maw eima pangai hlei aw! Abeipa liata apahra awpa eimâ ngiahzie he ei thlahpa nata ei palôh heta a pahnopasia kaw. Eima râh heta Khati ta ma Abeipa Bie he hmo hropa zydua hlâta eima vâ viana noh a tlô hr'aw vâ i, tahpazy he ei saduthlie tyh. Chata a châ nota DMCF zy ta Abeipa liata ahrana, âmo lôhthai tlaita ama vâpa, ama chana ao heta kei hawtipa palôh he eina pahra ngaita kaw, eina pazei pasa kaw. Sôh amâ phahla vâta postpond-pa a châ tahpazy vaw thei na ta, ei palôh a pasa kaw, taotheipa deikua hnei va na. Marasaw zy ngiapâna kyh liata eima tlapahnaizie he hmô via ngâkaw na ta, palôh pasa âchhih hmeiseih. He hawhpa lâ liata ahra hapa Marasaw pakha zie tlaima y hr'aw vâ pi he?!

(Keima palôh hiahna ei vaw ropa châta vaw pahnothai kaw muh vy)