ALZHEIMER'S PASANA : MARASAW TA EIMA PAHNO AWPA Â NGIAH

Na nô tlyma na paw tlyma, na mahnô tlyma na mahpaw tlyma kha a ynadâh avaw nano ta, nâma nata a chhôhkhanah tlai vaw pahno khao leipa ta, a yna dâh avaw tymâ ta, paphôh ngâthlâh ha ta, bie yzie hnei leipa reihpa ta athata a chiabulu ta, hawti chhiepa hawhta ypa ta, ngaisipa nata apathaipathâ awpazy taihta uasa leipa ta, â tymâ kawpa ta a y tyh ma? "A kô uhthei ha ta, a maorih hapa a châ hih" tah chakhyh kha y. Alzheimer's pasana a hneipa chhao a châ thei la y.

Khizaw asosâh lymâpa liata Marasawzy chhao pasana nano nanopa ta miah â ngiahnao lymâ ta, thokha cha thlaita patlâh theipa a châ nota, thokha deikua thohna ta chhaota a patlâh thei leipazy ama y tyh. Atahmâhlâ khizaw liata pasana a kaw lâluah kawpa miakha cha, Alzheimer pasana he a châ thlyu aw.

He pasana he Mararâh liata chhao kô uhthei lâ tawhta a hneipa eima y hôlô na ta pangiasa a chhih ta; eima pahnothai mâh leipa váta alâluah tu mâh leipa chhao a châ thei hra aw.

Alzheimer's pasana cha khâpa maw?

Nôpi-pawpipa, kô uhtheipa zy ta ama hnei tyhpa, he pasana heta Mararâh chhôhkha hluhpi cha maniah â ngiahnao ha bâ ngyu thei aw.

Na nô/paw, mahnô-mahpaw, maorih kawpa nata hmo â thei parei thei khao leipa, chyhsa moh tlyma, hmo kheihawhpa tlyma thlaita my thlâh ha tyhpa ama y ma? "Uhthei ha ta, a maorih hapa a châ hih" tahpa ta uasa leipa ta y kha y; Alzheimer's pasana a hnei tahpa na pahno leipa vâta a châ thei la y.

Alzheimer’s pasana eima tahpa cha pasana adaih parei kawpa, dusawta ta lathli parao lymâ ta, achhâna lâta tlokhuh lathli pahnona zydua parao khai tyhpa pasana a châ. Alzheimer's pasana a hneipazy cha ama palôh lei (Memory loss) ta, hmoto ama pahlaopahli khai ha tyh.

He pasana a hneipazy ta cha hmo pahno parei thei khao leipa ei ta, ama saw nata pahrâlâhpazy taihta hmahta pahno thei khao vei ei. Biereipa nata châropa liata rairuna a tyh ei ta, âmo mopakha pathaihna nata hri-iah pathaihna chhao a thata tlapahnai ta, ama palôhphaozie nata nôchâ chhao â thla para ngâthlâh ha ta, viasa nata chhôhkhazy kiah liata y awpa chhao khoh tyh vei ei.

Alzheimer's pasana he ano khota paru via lymâna lâ a ngai tyhpa a châpa vâta a buabâ kaw.

Ahyrai ta he Alzheimer’s pasana he ama hnei thei tarawpa ta, atlâhpipa kô 65 chô lâpazy nata he pasana avaw hnei hapa chhôhkha apathlapachhuahpazy ta ama hnei via chai tyh.

Alzheimer’s pasana vaw tlôkheituhpa he a sia kawpa ta pahnopa a châ taraw leipa ta scientist zy ta cha apathlapachhuahna, hrozie khihsadâh (lifestyle) nata eima chheipâh hmozy tawhta avaw thaopa hawhta ama pahno.

Alzheimer’s pasana he a patlâhna thohna y leipa ta, anodeikua thohna hmâpa ta nata amohôhna phapa hmâpa ta a paru via lymâ awpa a pakhâ thei.

Alzheimer's pasana a hneipazy ta cha :

Hmo â thei ngâthlâh hana kyh liata athata tla pahnai ei ta. Hmo pachâpalina kyh nata pahnothaina kyh liata â hnai ei ta, atlâhpipa ta zâlâ daihti liata hmo ama pahlaopahli nao kaw tyh. Hmo a thei parei leipa ei ta, ama hmô tyhpa nata pahrâlâhpazy taihta ama my thlâh ha tyh.

Khihsazie/nôchâ liata : Chyhsa khâchâ adyuhpa hawhta y ei ta, âtymâ ei ta, âmosasyh amohôh arairu tah ei ta, ama hiehâh patoh ta, bie ama rei hmopa reih ngâthlâh ha ei ta, ama hrozie athata â nano ta, y molo thei leipa ei ta, su kha liata pa-ysa molo ama rairu ta, amâ khiekhâ-hlaihlâ ngâthlâh ha tyh.

Palôhphao (Mood)-na: A châhta eikhapi ta ama hiehâh ta, khâpa hmahta uasa leipa ei ta, hmoto a hao ei ta, ama yru kaw tyh.

Palôhrupa lâta a hriana dâh : Hnabeidyna (depression) ta bie ei ta, ama mo sia leipa ta, hmo a y leipa pi hmôpa hawhta y ei ta, a châhta chyhsa kheihawhpa pi hawhta ma a kaw pachása ei, a châhta chyhsa ta thie amâ chhuahpa hawhta khihsa ei, amâ tymâ kaw tyh.

A châhta ama pôhpa apielyuna kyh liata rairuna a tyh ei ta, biereipa nata hmotaopazy ama paraiparusa kaw tyh.

Nama chhôhkha liata ahy tlyma Alzheimer's pasana a hneipa hawhta na pahno khiahta Dawhty nata he hawhpa lâchhâh a pahnopa thlai a saohiah ma y.