CAB 2016 : Political Party 11 ta Bill adyuh lymâ awpa ta bie pathlu

Guwahati, January 29, 2019 : Atanohta ta Guwahati, Assam liata India-mawnochhi liata Political Party 11 Citizenship (Amendment) Bill 2016 chôchâh liata ahmôpakhypazy chata Citizenship (Amendment) Bill, 2016 cha khoh vei ei, tahpa phuahpa ta, Central sawhkhâ cha he Bill he phie awpa ta ama pahnosa tahpa ama phuah.

Sikkim a hlao leipa ta, India-mawnochhi State liata Political Party 11 vyuhtuapazy heta, eichhiana y leipa ta CAB 2016 adyuh awpa ta bie ama pathlu.

Political Party 11 tawhta vyuhtuapa 25 hry liana heta Meghalaya CM nata NPP President, Conrad Sangma, Atul Bora, AGP President, Keshab Mahanta, Working President of AGP, Mizoram CM Zoramthanga zy chhao amâ hlao hra.

Meghalaya Chief Minister Conrad Sangma chata, Prime Minister Narendra Modi nata President Ram Nath Kovind hnohta he CAB 2016 chôchâh liata vyuhtuapa eimâ tuah aw, tahpa ta, “He bill he Maw-nochhi liata chipho zy châna nata abohna châta chi â chhih” a ta.

Citizenship (Amendment) Bill he târi 8, Nawh 2019 khata Lok Sabha liata passed hapa châ ta, he bill kholeina he Maw-nochhi su nano nanopa liata palásapa a chá.