IRA SINGHAL : Pihpasina chôta IAS TOPPER a châ theipa chanô chhyupa

Kô 2015-liata UPSC Civil Services Examination 2014 result puapa liana khata no-âhchhih kawpa ta heihlyuleipa/pihpasipa chanô pakha, zôh ru â supia leipa vâta ano khota khodâh hawhta chhaota â ;pielyu thei leipa, Ira Singhal cha a tlohpa dei châ leipa ta sâkhana a kaw châ thlâh haw. India râh liata Exam hryta tloh ru chaipa sâkha hawhta pachâpa IAS Exam-liata pihpasipa chanô tlaita sâkhana a châ thlâh hapa he chyhsa hluhpi ta â nano chhao ama tah ngaita kawpa kha a châ.

Ira Singhal he pasana chi scoliosis ama tahpa, zôh ru â supia leipa vâta a pihpasipa, âkhaihly leipa, a khodâh hawhta chhaota a pielyu pha thei leipa châ ta. Hetana chô heta hnabeidy leipa ta tei hnolo ta, school a kia chhôh zydua ta chhao record a hnei pha ngaita kaw. A chhâna liata chhochhi cha India râh pôhpalôh liata ‘ei thai’ â tahpa chyhsa thysy 5 (Lakhs) rachhôh hryta a taopha chaipa châpa ta, IAS Topper taihta a kaw châpâ hapa a châ.

A thâtih :

Ira Singhal he Mr Rajendra Singhal nata Mrs Anita Singhal-zy sawchanô châpa ta Meerut-liata vaw pih ta. A paw he Engineer châ ta, a nô he Insurance Advisor a châ hra. A pih tawhta rei leipa liata he pasana heta pabuapâ lymâ ha ta, a hrochhôhta a heihzy hawhta châ aw vei tahpa chhao ama pahnothaipâ ha hra. A palôhru pachâna cha a khaihna zie ta hmo a sai thei n’awpa ta, a hnabeidy lei n’awpa ta ama theina zydua papuapa ta ama mohôh lymâ hapa a châ. Achuna kyh liata chhao a pha chaina su liata â chu lymâ thei n’awpa ta ama theina zydua ama papua lyliah lymâ hrapa a châ.

Sophia Girls School, Meerut-liata achuna lâthlôh a kaw chhih pathao ta, cha khai tawhta Army Public School, Delhi-liata â chu heih hra. He school mianopazy liana heta Topper a châ rairie. A pha kawpa ta class XII a pass tawhta Netaji Subhas Institute of Technology-liata B.Tech a chu heih ta, a pha kawpa ta a kaw chupa ta Campus recruitment-liata chhao rai pha kawpa hmô ta, châhrasala he rai he a pazao khao leipa ta Faculty of Management Studies, Delhi-liata MBA tlao â chu pazao ha heih. IIM-liata chhao chance hnei taraw ta, a nô nata paw zy ta Delhi puasai leipa ta â chu pazao theina awpa ama pachâpa vâta IIM-liata â ngia khao leipa a châ.

IRS-liata tloh ta, sawhkhâ ta a dytha :

Kô 2010 khata Ira heta UPSC Civil Services Examination hmiachhypa ta avaw roh patloh ha ta. Châhrasala a rank a pha leipa vâta, IRS pa a châ. A palâh kawpa ta training patlôpa ta, posting tao awpa chyta liata Ministry of Finance tawhta châpaphaopa thapachhie kawtuhpa a dao haw. Pihpasipa a châpa vâta kheihawhpa post-liana hmahta so theipa châ vei (she is not fit for any posting) ama vaw tah haw. Finance Minister P. Chidambaram nata Commerce Minister hnohta châ pangiapa ta, medical report chathihpâ ta, raihria awpa ta â fit na zie athata reih taraw ta, chyh-eihna deikua dao vei. A thâtih pahnopa ta Media lâ taihta tawhpapua hra ei sala, hlaotlohna deikua y vei.

India râh liata pihpasipa thysâh hlei zy châta model apalaikheitlâh a châ kawpa chanô chô liata sawhkhâ hmotaotiana dâh he no-âh chhao â chhih kaw. Châhrasala he zydua heta Ira cha a hnabeipadysa rai rai leipa ta, fighter (teituhpa) pha viapa nata chhyu viapa lâta tlao a papua haw. Central Administrative Tribunal-liata biebuapa pangiapa ta sawhkhâ cha â kho ta, pahniena chhao a topâ ha tlai hra, kô a khô tawhta a rai cha â pazao thei ha hra. He chhôh heta UPSC he ei 2 hmiachhy heih ta, vâduachhih kawpa ta hlaotlohna deikua to vei. IRS cha â pazao ta, rai a hria tawhta chhao IAS tloh achhuahpa ta UPSC Civil Service Exam hmiachhy awpa ta a theina zydua ta achhuahnoh lymâ ta. A chhâna lâta chhao â chhuah chaipa cha a hlao a patloh thei haw. Physically handicapped hryta UPSC Civil Service Exam liata topper a châ thei tua chaipa a châ hapa a châ. Eima pahno chyupa hawhta he hawhpa Exam laipa liana chhao heta pihpasipazy châta reservation taopa lymâpa châ ei ta, Ira deikua heta he reservation he hmâh phahnai â ngiah tah leipa ta General Category candidate hawhta Exam ru kawpa he a siepahlie ha hrapa a châ.

Ira nô nata paw Rajendra nata Anita Singhal-zy palôhrupa he a vaw rônah hmeiseih. Ama sawchanô Ira vaw pih ta, daihti rei leipa liata heih â kholeina âvaw lâpâ ha ta, ama sawchanô heihlyuleipa cha hmo hropa khâpa hmahta â pakhâpadiesa leipa ta khâsia awpa ama khohpa vâta saw hropa sa khoh khao vei ei. Ama sawchanô IAS Topper a châ tahpa ama pahno thaota nota chhochhi cha a paw cha a mao-oh thei leipa ta, alyna vâta athata cha leithei vei. He hawh tlupo ta saw zy châta â hlâ ngâpa nô nata paw zy he ama sawchanô hlaotlohna thabypa cha ama vaw châ hmeiseih.

Ira biereipa hryta rônah kawpa heta a thâtih he pachhâsa tua ei suh u…

“He râh (India) he ei râh châ ta, hmah a sie n’awpa ta tei awpa he ei rai a châ. A kâ lâta avaw tyuh ta vaw seisia ngâthlâh ha awpa deita ei châpa ta â pahno vana”