Emiliano Sala : A THI MA A HROH MAW?

Argentine footballer Emiliano Sala nata a kiana zawtheina pilot David Ibbotson zy tluana rai cha BBC chata a chalihsai chypa a châ tahpa a palâsa.

French Club Nantes tawhta Premier League club Cardiff City ta ama lapangia thiehpa, Cardiff châta ball chhao a chapie hlâta vâduana atyh hapa, Argentine striker, kô 28-pa Sala nata zawtheina Pilot Ibbotson, Crowle, Lincolnshire liata pahrâpazy he Hriatua noh khata ama kiana zawtheina yna chybia pahnopa a châ khao leipa vâta tluapa châ ei ta; ama thi ma ama hroh ma tahpa pahnopa châ khao vei.

Ama kiana zawtheina

Noh 3 chhôh tlai tluatuhpazy ta amâ piepasina su rachhôh hawhta pachâpa English Channel chaby ama tlua tawhta, a tluana rai he atanoh khata biehneituhpa lâ tawhta a chalihsai awpa ta ama tah hapa hawhta BBC ta a palâsa.

Châhrasala Sala sietanô Romina chata tluatuhpazy cha a rilâhpa tluana rai cha a chalihsai leipa ta, tlua via chy awpa athata â haw.

A sietanô Romina

Tluatuhpa hrytapa Harbourmaster Capt David Barker chata, a tlâhbohpa ta hmô awpa a hnabeiseihna a chyh ngaita kaw a ta.

Emiliano Sala he a Club thiehpa Cardiff pangaipa ta Nantes tawhta zawtheina chyhpa chi, chyhsa 2 kiana hmâpa ta a zaw ta; English Channel chô liata amâ zaw nota ama thâtih chybia pahno khao lei awpa phie ama lei syulyu hapa a châ.

Sala sietanô, Romina heta tluatuhpazy cha tlua via chy awpa ta mothlih chhaota â hawpa ta, "Ei rilâhpa he a hroh thlâh ha chy na tahpa ei pahno" a tah hra.

Chyhsa hluh viapazy ta cha Sala nata pilot zy he ama hroh khao na ta pangiasa khao leipa ei ta. Ama zawtheina bie amâ chho theina hnóh chaipa tawhta pachâpadypa ta, hrohpapua khao vei ei, tahpa cha chyhsa hluh viapa pachâdâh a châ hai.

Cardiff City FC chata ama player lapangia thiehpa, âmo châta akhaih hmâ leipa ta a yna chybia pahno leipa ta a y haipa, Sala ama izie reihpa ta, a club parohpa Nantes hleikhôta club nata footballer nano nanopazy ta Sala ama inazie ama palása.