Saw 2 hlâta hluh viapa a hneipazy cha Vote ama hnei awpa pasaipa châ kha sy - Baba Ramdev

Lok Sabha elections 2019 saipâpa ta bie a reina liata, Hindu theihthaipa, Yoga Pachutuhpa (Guru) Ramdev chata, nôvah saw 2 hlâta hluh viapa a hneipazy cha sawhkhâ ta Vote ama hnei awpa a pasaih awpa châ vei, a ta. He Yoga Guru he Patanjali Paridhan, Aligarh liata biereina hneipa ta, “Saw pano hlâta hluh viapa a hneipazy cha Vote ama hnei awpa châ leipa ta. Atlyhna liata amâ duah (Contest) thei lei n'awpa ta sawhkhâ ta hmah a la awpa a chá” a tah hra.

Ramdev heta India maluh pôh chatlie tu hapa pachyhsa via n'awpa dâh liata a pachâdâh a rei hrapa châ ta; saw pano hlâta hluh viapa a hneipazy cha sawhkhâ siku, thohna-O nata ahropa liata amâ ngia awpa pasaipa châ leipa sala, sawhkhâ rai chhao pahriasa pasaipa châ kha ei se, a tah hra.

Baba Ramdev pyly heta zâkô November liana khata, “India râh heta, keima hawhta lahpinô a hnei rai leipazy heta palyupalihna hleikhôta tovyuh phapa ama dao awpa a chá" tahpa reikah avaw pathlie ha heihpa kha a chá.