FA Cup 4th Round : Nyungiapa 4 chalo thei awpa duasu liata Man City amâ duah pazao lymâ

League One liata â hnai chaipa liata a y haipa AFC Wimbledon ta Premier League club West Ham pahniepa ta FA Cup 5^th Round â ngia ei ta, Championship club Millwall ta Premier League club Everton ama panie hra.

AFC Wimbledon heta Kwesi Appiah nata Scott Wagstaff zy goal zawzi ta West Ham he 3-0 ta â chadaisa lymâ ei ta; anodeikua West Ham ta Lucas Perez nata Felipe Anderson zy goal hmâpa ta a kaw chhypalie heih hra ei ta. West Ham heta amâ kaw pasu thlâh ha thlyna aw tahpa ta zawpi ta ama sai thlâh ha nota, AFC Wimbledon châta kô 19-ta uhtheipa Toby Sibbick ta daihti chhâ chy, minute 2 deita a y bâ tahpa liata za khô chhi heihpa ta, Kingsmeadow tlyliah liata West Ham cha 4-2 ta pahniepa ta ama y haw.

Millwall tlyliah, ‘The Den’ liata khichhaipa Everton ta Richarlison nata Cenk Tosun zy goal hmâpa ta 2-0 ta hmia a sah tua ei ta; châhrasala Millwall châta Lee Gregory ta a luh ta supangiapa ta si kha a kaw pasu ta. He khai tawhta Millwall pyly ta za khô chhipa ta, Jake Cooper ta reipasipasua thei kaw awpa ta â lâpa, a ku ta ball a vei tah thei awpa ta ball a veivâna dâh a sianô lei tawhta, za khô heih hrapa ta, 2-2 a kaw châ ha heih. Millwall tlôna goal he Murray Wallace ta daihti chhâ chyta liata a khôpa a châ. Millwall heta ama khichhaipa Everton he 3-2 ta pahniepa ta, FA Cup tawhta ama chatipapua ha heih hra.

Premier League Club West Ham nata Everton zy ta pahniena ama to thei lei nota, Manchester City ta Premier League club pyly Burnley cha 5-0 ta ama pahnie. Premier League champions haipa City heta Gabriel Jesus, Bernardo Silva, Kevin de Bruyne, Burnley player Kevin Long ta ama kao lâta a pangia tlamawpa nata Sergio Aguero goal hmâpa ta 5-0 ta pahniena ama to.